Quando el sposo e la sposa i laora insieme, lori i ze come un piloto e un copiloto de un avion che i va drio ale medèsime orientassion del volo. Quando lori i infronta problemi, lori no i pensa sol in si stessi, ma i pensa un nel altro.

COSSA LA BÌBLIA LA DISE: “No i ze mia pi due, ma una sol carne.” — Mateo 19:6.

“El sposo e la sposa i ga de laorar insieme par gaver um matrimònio felice.” — Christopher.

I maridadi che no i laora insieme, quando i barufa, i se consentra sora quel che el altro el ga sbalià invesse de risolver el problema. Cossita i problemi pìcoli i deventa tanto grandi.

“Saver laorar insieme l’è tanto importante par el matrimònio. Se mi e el me sposo no laoremo insieme, saremo sol amighi che i ze de star nela medèsima casa e nò un sposo e una sposa che i fà le dessision importante insieme.” — Alexandra.

DOMÀNDATE

• Sarà che mi penso che i soldi che mi guadagno i ze “i me soldi”?

• Sarà che mi son bon de restar tranquilo sol quando che mi son distante del me sposo o dela me sposa?

• Sarà che mi, anca se mi sò che el me sposo o la me sposa ghe piase restar insieme ala so fameia, mi fao de tuto par no star con lori?

PARLÉ INTRÀ DE VALTRI

• In cossa che semo boni de laorar insieme?

• In cossa che noantri podemo far meio?

• Cossa che ghemo de far par far meio?

PROA FAR QUESTO

• No stà pensar che ti e el to sposo o la to sposa sì nte un giugo drio giugar un contra el altro. Ma valtri gavé de giugar insieme contra i vostri problemi.

• Invesse de pensar ‘Come che mi posso vinser?’, pensa ‘Come che noantri due podemo vinser?’

“No stà ndar in serca de chi che ga fato giusto o chi che ga fato sbalià. La roba pi importante l’è che el matrimònio el resta in pace e union.” — Ethan.

COSSA LA BÌBLIA LA DISE: “No stà ndar in serca sol de quel che l’è meio par ti, ma anca quel che l’è meio par i altri.” — Filipensi 2:3, 4.