Anca se quei che i stùdia i dise che ghen’è una maniera giusta de infrontar el dolor, cada persona la ga la so maniera de darghene fora. Se due persone le sente el dolor difarente, sarà che questo ghe vol dir che una de lore la ze drio sentir manco dolor o la ze drio sconder i so sentimenti? No podemo dirlo. L’è vera che acetar la situassion e no sconder la tristessa pol giutar. Ma no ghen’è una maniera giusta de darghene fora col dolor. Dipende de come la persona la ze stata slevada, de come che la ze, dipende de quel che la ga passà nela vita e chi che la ga perso.

Quel che el ga perso qualchedun nela morte no’l sa quel che vegnarà pi avanti ma ghen’è emossion e sfide che le ze compagne par tuti. Vedemo arquanti esempi de quel che pol suceder:

Fadiga de controlar le emossion. L’è normal piander tanto, de colpo restar contenti, de colpo restar tristi e sentir tanto la mancansa dela persona che ghemo perso. Questi sentimenti i pol restar ancora pi forti quando te te insogni o te pensi nela persona. Ma fursi la prima roba che te fè l’è no creder che questa persona la ze morta. Vedi el esémpio de Tina. El so sposo Timo l’è morto de colpo. Ela la dise: “Nel scomìnsio no savea cossa far. No era bona gnanca de piander. Son restada tanto mal che no era gnanca bona de tirar el fià. Mi no era bona de creder in quel che gavea sucedesto.”

Crise de ansietà, ràbia e colpa. Ivan el dise: “El nostro fiol Eric el gavea 24 ani quando l’è morto. Par un tempo semo restadi tanto inrabiadi. No speteino restar inrabiadi parché mi e la me sposa Yolanda no saveino cossa che la era la ràbia. Anca semo restadi con colpa parché penseino che podarissino gaver fato de pi par lu.” Anca Alejandro el ga sentio colpa quando la so sposa la ze morta, dopo de gaver tribolà tanto par causa de una malatia. Alejandro el dise: “Nel scomìnsio, go pensà che Dio el ga assà questo suceder parché mi ero una persona rugna. Ma dopo me go sentio mal parché saria come se fusse drio darghe la colpa a Dio de quel che el gavea sucedesto.” E Kostas, che l’è stà mensionà in quelaltro artìcolo, el dise: “Arquante volte go sentio ràbia de Sophia parché la era morta. Dopo go sentio colpa parché go bio ràbia. Alora go pensà che no la era colpa sua.”

Pensieri sensa senso. Ghen’è arquante volte che la persona che la ga perso qualchedun nela morte la ga pensieri sensa senso. Par esémpio, ela la pensa che la sente, la scolta e la vede la persona che la ze morta. La pol sentir che l’è fadiga consentrarse e ricordarse dele cose. Tina la dise: “Dele volte mi era drio parlar con qualchedun ma la me testa la era de nantra banda. La me testa la era disturbada parché mi seitea pensar in tuto quel che gavea sucedesto con Timo quando l’è morto. Mi no era bona de consentrarme e questo me fea mal.”

Voia de restar distante de tuti. La persona che la ga perso qualchedun nela morte la pol sentirse mal quando la ze insieme coi altri. Vedi quel che Kostas el ga dito: “Quando mi ero insieme coi me amighi maridadi me sentia fora posto e questo el sucedea anca quando mi ero insieme con quei che no i era maridadi.” Yolanda, la sposa de Ivan, la ricorda: “L’era tanto difìcile star insieme con persone che le seitea sbrontolar par pìcole robe. Anca no l’era mia fàcile scoltar arquanti genitori che i parlea che i so fioi i ndea sempre ben. Mi era felice de saver dei so fioi, ma l’era difìcile par mi scoltar queste robe. Mi e el me sposo saveino che la vita la gavea de seitar ndar avanti, ma noantri no gaveino gnanca la voia, gnanca la passiensa de infrontar tuta questa situassion.”

Problemi de salute. Pol suceder cambiamenti cola voia de magnar, col peso e col dormir. Aaron el se ricorda del primo ano che so pare l’è morto: “Mi fea  fadiga dormir. Tute le note me desmissiea nela medèsima ora e pensea nela morte de me pare.”

Alejandro, sensa gnanca un motivo, el ga scominsià a gaver problemi. Lu el dise: “Son ndato arquante volte al dotor ma lu no’l ga mai catà gnente de sbalià. Alora go visto che me sentia cossita parché gavea perso la me sposa.” Col tempo lu no’l se sentia pi cossita, ma l’è stà bon che l’è ndato al dotor. El dolor de perder una persona nela morte pol assar el corpo pi fiaco, assar pedo una malatia che la persona la ga o fin vegner fora nantra malatia.

Fadiga de far laori importanti. Ivan el dise: “Dopo dela morte de Eric ne ga tocà avisar nò sol i nostri parenti ma anca altre persone, come el paron dela casa ndove lu l’era de star e el paron de ndove che el laorea. Anca ghemo bio de completar arquanti documenti e de organisar le cose che lu el gavea. Par far tuto questo ghe volea consentrassion. Ma no l’è mia stato fàcile parché èrino sensa forsa fìsica, mental e emossional.”

Arquanti i cata che le pi grande dificoltà le vien dopo. Par lori l’è tanto difìcile de tender dei laori che la persona che la ze morta la fea. L’è stà questo che ga sucedesto con Tina. Ela la dise: “Timo el ga sempre tendesto dei assunti nel banco e anca le altre robe che ghe volea i soldi. E adesso l’è tuto con mi. Restea cada volta de pi stressada e mi pensea se era bona de far tuto polito e sensa far gnente de sbalià.”

Queste dificoltà de maniera fìsica, mental e emossional pol assar con paura quel che el ga perso qualchedun nela morte. Pol esser che el dolor che sentimo par una persona che la ze morta el sìpia tanto grando. Ma saver vanti de queste sfide pol giutar quel che l’è drio sofrir. L’è bon de ricordar che gnanca tuti i passa par tute queste dificoltà che ghemo parlà. Anca quei che i ga perso qualchedun nela morte i pol sentirse consoladi parché questi sentimenti i ze normai.

Cossa che te pol spetar: Questa tristessa no la ndarà durar par sempre. Questo no ghe vol dir che te ndarè sentirte del tuto ben. E gnanca che te vè desmentegarte dela persona che la ze morta. Ma pin pianeto sarà pi fàcile darghene fora col dolor. Pol esser che el dolor el ritorne in qualche momento o nte una data spessial. Ma ancora cossita tante persone le ze bone de recuperarse de maniera emossional e far le robe come vanti. Questo el sucede col aiuto dei so amighi o dela so fameia o quando le fà qualcossa par giutar a infrontar el so dolor.

Fin quando ndarò sentirme cossita? Par tanti, el dolor el passa dopo de arquanti mesi. Ma par altre persone, sol le se sente meio dopo de un ano o due ani. Altri i ga bisogno de ancora de de pi tempo. a Alejandro el dise: “Mi go sofrio tanto par intorno de tre ani.”

Porta passiensa e vivi un di dopo l’altro. Rispeta quel che te sì bon de far. La tristessa no la ndarà durar par sempre. Sarà che te pol far qualcossa adesso par sentir manco dolor par no sofrir de pi de quel che ghe vol?