“Dopo de lotar tanto con una malatia, la me sposa Sophia a la ze morta. L’era 39 ani che èrino maridadi. I me amighi i me ga giutà tanto, i era sempre drio far qualcossa con mi. Ma par un ano intiero go tribolà tanto. Un colpo stea ben e nantro stea mal. E fin ancoi, tre ani dopo, ancora me vien de colpo un grando dolor.” — Kostas.

Gheto belche perso qualchedun nela morte? Se la to risposta la ze si, alora te capissi quel che ga sucedesto con Kostas. La morte dela sposa, del sposo, de un parente o de un caro amigo l’è una dele robe che ne assa de pi stressadi e con dolor. Anca quei che i stùdia el dolor dela morte i pensa cossita. Un artìcolo publicà nte una revista de psicologia, b dei Stati Unidi, el ga dito che la morte l’è el pedo dolor che ghen’è e el dura par sempre. Quando una persona la infronta questo grando dolor, fursi la se domanda: ‘Fin quando che vao sentirme cossita? Sarà che qualche di vao sentirme felice nantra volta? Cossa che posso far par sentirme meio?’

In questa revista ghen’è le risposte de queste domande. Sito drio sentir el dolor par gaver perso una persona che te amei? El pròssimo artìcolo el ndarà parlar de come che le se sente le persone che le ga perso qualchedun nela morte e che sfide lore le infronta. E queialtri artìcoli i ndarà giutarte a saver come darghene fora con quel che te senti.

Ghemo caro che questa revista la possa giutar a tuti quei che i ga questo dolor.