Come vedemo nela ilustrassion ala drita, ghen’è tante persone che le pensa che, ntel Giorno del Giulgamento, bilioni de ànime le sarà portade davanti del trono de Dio par esser giulgade de acordo cole robe che le gavea fato ntel passà. Arquante le riceverà la ricompensa dela vita ntel cielo e quelaltre le sarà castigade ntel inferno. Ma la Bìblia la mostra che el ogetivo del Giorno del Giulgamento l’è salvar le persone dela ingiustìssia. (Salmo 96:13) Dio el ga scoliesto Gesù par esser el Giuis che ndarà portar giustìssia a tuta la umanità. — Ledi Isaia 11:1-5; Ati 17:31.

Quando el primo omo Adon el se ga rebelà contra Dio, el ga passà par tuti noantri el pecato, el sofrimento e la morte. (Romani 5:12) Par risolver questo problema, Gesù el ndarà ressussitar bilioni de persone. El libro de Apocalisse el mostra che queste ressuression le ndarà suceder intanto che Gesù el ndarà governar par mila ani. — Ledi Apocalisse 20:4, 11, 12.

I ressussitadi no i sarà mia giulgadi de acordo con quel che i ga fato vanti de morir. Invesse, lori i sarà giulgadi de acordo con quel che i ndarà far dopo de esser ressussitadi. Lori i ghe tocarà obedir ale istrussion che ghen sarà nei roli de che se parla in Apocalisse 20. (Romani 6:7) De acordo con quel che el apòstolo Paolo el ga dito, intrà quei che i tornarà a viver e i gavarà la oportunità de imparar sora Dio ‘ghen sarà tanto i giusti come i ingiusti’. — Ledi Ati 24:15.

Le persone che le ze morte sensa mai cognosser gnanca adorar a Geovà Dio le gavarà la oportunità de cambiar e far quel che l’è giusto. Se lore le fà cossita, le gavarà una “ressuression de vita”. Ma ghen sarà ressussitadi che no i volarà obedir a Geovà. Par lori, la ressuression la sarà de “giulgamento”. — Ledi Gioani 5:28, 29; Isaia 26:10; 65:20.

Nel fin dei mila ani del Giorno del Giulgamento, Geovà el gavarà fato i umani obedienti deventar perfeti, come el volea nel scomìnsio. (1 Corinti 15:24-28) Che speransa maraveiosa par tute le persone obediente! Par far una prova final, Dio el ndarà molar Sàtana, el Diaol, del abismo, dopo de assarlo preso lì par mila ani. Sàtana el proarà imbroiar le persone nantra volta, ma quei che seitarà dela banda de Geovà i riceverà la vita eterna ntela Tera. — Ledi Isaia 25:8; Apocalisse 20:7-9.

La Bìblia la dise che el fin de questo sistema de cose anca el sarà un “giorno de giulgamento”. Questo giorno de giulgamento el vegnarà de colpo, come el Dilùvio dei giorni de Noè, che el ga finio fora con tute le persone rugne de quel tempo. Semo contenti de saver che suito le persone rugne le sarà destrute e noantri poderemo viver nte una Tera ndove “ghen sarà la giustìssia”. — Ledi 2 Piero 3:6, 7, 13.