Te toca viver con manco soldi par causa de una crise econòmica? Pandemia, disastri dela naturesa, problemi nela polìtica, problemi nei governi e guere i pol farne gaver tanti problemi econòmichi. Restar sensa soldi de una ora par altra pol assarne tanto stressadi, ma la Bìblia la ga arquanti consili che i pol giutarte a viver con manco soldi.

 Cossa la Bìblia la dise: “Mi go imparà el segreto . . . de gaver tanto e de passar par nessessità.” — Filipensi 4:12.

 Anca se adesso te ghè manco soldi che tempo indrio te pol imparar a viver in questa nova situassion. Quanto pi presto te aceti questa situassion, pi fàcile sarà par ti e la to fameia darghene fora.

 Va in serca se el governo el pol darte qualche aiuto. Fà questo suito, parché tante volte el tempo par cadastrarse in questi programi del governo el se finisse presto.

 Cossa la Bìblia la dise: “Quel che te vol far no’l ndarà ben se no te parli coi altri. Ma ghen sarà boni resultadi se te scolti consili.” — Proverbi 15:22.

 Parla col to omo o la to dona e coi to fioi. Quando quei dela fameia i capisse la situassion, sarà pi fàcile par lori acetar el cambiamento. Quando tuti i se sforsa par sparagnar o no butar via soldi in robe che no ghe ocore, se pol vansar de pi soldi.

 Cossa la Bìblia la dise: “Vanti el se senta e el pensa quanto el va guastar.” — Luca 14:28.

 Quando te ghè pochi soldi l’è tanto importante saver par ndove tuti i soldi i va. Primo, scrivi quanti soldi che te ndarè ricever nel mese. Dopo scrivi le spese che te gavarè, anca se te pol cambiar nel futuro. Se te pol, meti via tuti i mesi un pochetin de soldi par i imprevisti e le emergense.

 Idea: Quando te fè el càlculo de quel che te guasti, no stà desmentegarte de meter anca le pìcole robe che te ghè comprà. Anca le pìcole robe le pol far la difarensa. Par esémpio, un omo el ga visto che el ga guastà tanti soldi in un ano sol par comprar siclete (goma de mastegar).

 Cossa la Bìblia la dise: “Che sìpie sicuri de quale che le ze le robe pi importante.” — Filipensi 1:10.

 Fà una comparassion dei soldi che te guadagni con quel che te guasti e varda quel che te pol far par tirar via o guastar manco par restar nel to orsamento. Pensa in questi esémpi:

•   Transporte. Se te ghè de pi de un auto, sarà che te podarissi venderghene uno? Sarà che te podarissi cambiar el to auto par un pi econcómico? Te podarissi doperar un ònibus, una bisicleta o anca ndar a pié?

•   Diversion. Te podarissi restar sensa, almanco par un tempo, le robe come el canal de TV, filmi e mùsiche che te paghi? Ghen’è robe pi barate che te pol far. Par esémpio, te pol catar i libri o filmi sensa pagar nele biblioteche o sentri de cultura.

•   Conte dela casa. Parla cola to fameia come sparagnar aqua, luce e el gàs. Smorsar la luce e lavarse pi presto te giutarà a sparagnar tanti soldi.

•   Magnar. Invesse de ndar magnar in ristorante, fà el magnar casa. Pensa vanti in quel che te vè magnar. Fà tanto magnar nte una volta sol e meti via quel che vansa. Vanti de ndar al mercado scrivi quel che te ghè de comprar, cossita no te ndarè comprar quel che no te ghè de bisogno. Compra magnar dela staion parché l’è pi barato. No stà magnar robe che no le fà ben par la salute. Se te pol pianta un orto.

•   Robe de vestir. Compra robe de vestir sol se te ghè bisogno, nò sol par esser nela moda. Te pol comprar robe quando le ze con desconto o robe belche doperade che le ze in bone condission. Meti le to robe sugarse al ària, cossita te guasti manco luce cola secadora.

•   Compre. Prima de comprar qualche roba, domandate: ‘Mi posso pagarla? Go pròpio bisogno de questo?’ Sarà che te pol spetar un poco prima de cambiar el auto o el selular par un novo? Cossa càtito de vender qualche roba che no te doperi pi? Cossita te pol far la to vita pi sémplisse e anca te ndarè guadagnar un poco de soldi.

 Idea: Se te ghè pochi soldi, dopera questa oportunità par fermarte de far le robe che fà mal ala salute e che te guasti tanti soldi, come par esémpio doperar sigri, giugar par guadagnar soldi o bever massa bebide alcòliche. Fermarte de far questo ndarà giutarte a gaver pi soldi e anca a gaver la salute meio.

 Cossa la Bìblia la dise: “Felici i ze quei che i ricognosse le so nessessità spirituai.” — Mateo 5:3.

 La Bìblia la dà questo consìlio: “Parché la sabedoria la ze par protession, compagno i soldi i ze una protession, ma la cognossensa la ze meio parché la sabedoria la assa vivi quei che i la ga.” (Eclesiasti 7:12) Podemo catar questa sabedoria nela Bìblia. Tante persone le ga visto che i consili dela Bìblia i pol giutar nei problemi coi soldi e anca a gaver manco ansietà. — Mateo 6:31, 32.