“Mi go proà leder la Bìblia, ma sol de veder quanto granda che la ze son restada desanimada!” — Briana, 15 ani.

 Te séntito cossita anca ti? Alora, questo artìcolo el va giutarte.

•  Parché l’è bon leder la Bìblia?

•  Come che posso leder la Bìblia?

•  Cossa altri gióveni i dise

 Te dà misèria sol de pensar in leder la Bìblia? No l’è fadiga capir parché che te te senti cossita. La Bìblia la ga de pi de mila pàgine, tante létere, tante parole e gnanca una ilustrassion, cossita no la ciama tanta atension come i vìdei ntela TV e ntela internet.

 Ma pensa cossita: se te catesse un grando baù antigo, no te daria voia de saver cossa che el ga rento?

 La Bìblia la ze come un baù pien de tesori. La ga tante cose pressiose che va giutarte a:

•   Far bone dessision

•   Darse ben col pupà e cola mama

•   Catar veri amighi

•   Dàrghene fora cole ansietà

 Come che un libro tanto antigo el pol esser ùtile par noantri ancoi? L’è parché “tuta la Scritura la ze ispirada par Dio.” (2 Timòteo 3:16) Questo vol dir che i consili dela Bìblia i vien dela meio Fonte che se pol gaver.

 Una maniera de leder la ze del scomìnsio al fin. Questo el va giutarte a saver sora el messàgio che la Bìblia la parla. Ghen’è tante maniere de leder la Bìblia intiera. Ndemo veder due:

•    Te pol leder i 66 libri ntela òrdine che i ze ntela Bìblia, de Génesi a Apocalisse.

•    Te pol leder ntela òrdine cronològica, o sia, ntela òrdine che la stòria la ga sucedesto.

 Una idea par ti: Ntel Apéndisse A7 dela Tradução do Novo Mundo te cati una lista dele robe prinsipai dela vita de Gesù ntela òrdine che le ga sucedesto.

 Una seconda maniera la ze leder un toco dela Bìblia che parla sora un problema che te sì drio infrontar. Par esémpio:

•   Vuto gaver veri amighi? Ledi la stòria de Davi e Gionatan. (1 Samuel, capìtoli 18-20) Proa catar quale qualità che Davi el gavea che ga fato Gionatan voler esser so amigo.

•   Vuto gaver forsa par resister una tentassion? Ledi la stòria de Giusepe e varda come che lu l’è stato bon de farlo. (Génesi, capìtolo 39) Dopo, varda cossa che ga dato forsa a Giusepe par resister ala tentassion.

•   Vuto saver come la orassion la pol giutarte? Ledi la stòria de Neemia. (Neemia, capìtolo 2) Dopo, proa veder come che Dio el ga rispondesto la so orassion.

 Una idea par ti: Quando te vè leder la Bìblia, va nte un posto calmo par esser bon de consentrarte.

 Una tersa maniera la ze leder una stòria o un salmo e dopo veder come che el ga de veder con ti. Par esémpio, domàndate:

•    Parché Geovà el ga volesto che questo el fusse scrito ntela Bìblia?

•    Cossa che questo me insegna sora la personalità de Geovà e la so maniera de far le cose?

•    Come che posso doperar quel che go imparà ntela me vita?

 Una idea par ti: Scrivi el giorno che te vol scominsiar a leder la Bìblia e dopera la Programassion par leder la Bìblia che ghen’è ntel site jw.org.