La bruta notìssia: La vergogna la pol farte perder la oportunità de gaver boni amighi e bone speriense.

 La bona notìssia: Gaver vergogna no l’è mia sempre una roba rugna. Ela la pol giutarte a pensar vanti de parlar, a esser pi atento e a scoltar de pi.

 La meio notìssia: Se te ghè massa vergogna adesso, no vol mia dir che te sarè sempre cossita, te pol controlarla. Questo artìcolo el va mostrarte come.

•  De cossa che te ghè paura?

•  Cossa far par darghene fora cola vergogna?

•  Cossa altri gióveni i dise

 Sol de pensar in parlar con nantra persona, la vergogna la pol farte restar fermo de tanta paura. Par quela, te pol sentirte distante dei altri, come se te fusse ti sol nte un quarto scuro. Ma se te impissi la luce de questo quarto, te podarè veder che no te ocore mia gaver tanta paura. Varda tre esempi.

•   1. “Mi no sò cossa dir.”

   Cossa te toca saver: Quel che le persone le se ricorda de pi no l’è mia quel che te ghè dito, ma si come che le se ga sentio de parlar con ti. Se te sì pi atento a quel che la persona la te dise e te ghe mostri interesse, te podarè controlar la paura.

   Pensaghe sora: Che tipo de amigo che ti te piase de pi? Un che l’è sol lu che el parla o un che el te dà atension e el ghe piase de scoltarte?

•   2. “Le persone le va catar che mi son un sgionfo.”

   Cossa te toca saver: Le persone sempre le va pensar qualcossa de ti, no importa mia se te ghè vergogna o nò. Alora, la meio roba che te pol far l’è assar le persone cognósserte meio e saver la verità sora ti. Cossita, te sarè bon de controlar la paura e sarà pi fàcile che le ndarà pensar robe bone sora ti.

   Pensaghe sora: Se te cati che le persone no le ndarà piaserghe de ti, sarà che no te sì ti che te ghè la idea sbaliada sora lore?

•   3. “E se mi parlo una roba sbaliada? Mi vao sentir vergogna.”

   Cossa te toca saver: L’è normal, sucede a tuti. Te pol controlar la paura se te vedi i to sbali come una oportunità par esser ùmile e mostrar ai altri che te sè che no te sì mia perfeto.

   Pensaghe sora: No te cati meio esser insieme de persone che le ricognosse quando le fà un sbàlio?

 Seto questo? Arquante persone le cata che no le ga mia vergogna de parlar coi altri sol parché le ze bone de parlar tanto par meso de messagi. Ma l’è pi fàcile de gaver veri amighi quando te parli con lori fàcia a fàcia. La psicòloga Sherry Turkle la ga scrito: “L’è quando noantri vedemo la fàcia e scoltemo la voce un del altro che semo boni de cognosser del bon i so sentimenti e le so qualità.” a

•   No stà far comparassion cole altre persone. No te ocore mia deventar una persona che ghe piase de parlar e schersar con tuti. Ma te pol proar gaver manco vergogna par no assarla intrigarte de goder del tempo che te sì coi amighi e de far robe difarente.

   “Par far una bona ciàcola, no ghe ocore mia tirarla longa, e no te ocore mia farte veder a tuti. Te pol sol dir el to nome a nantra persona e farghe qualche domande.” — Alicia.

   La Bìblia la dise: “Stà atento a quel che ti te sì bon de far. Alora, ti te restarè contento con ti stesso e nò in comparassion con nantra persona.” — Gàlati 6:4.

•   Varda come i altri i fà. Proa imparar cole persone che ghe piase de ciacolar coi altri. Cossa che va ben par lore? Cossa che no va mia ben? Cossa che ti te piaseria de far compagno a lore?

   “Varda come che le persone che le ze bone de far amighi le fà e proa imparar con lore. Stà atento a quel che le dise quando le cognosse nantra persona.” — Aaron.

   La Bìblia la dise: “Cossita come el fero el gusa el fero, anca el omo el giuta el so amigo.” — Proverbi 27:17.

•   Fà domande. Questa la ze una bona maniera de scominsiar a parlar coi altri, parché le persone le ghe piase de parlar sora quel che le pensa. Cossita, la atension la sarà par i altri, no par ti.

   “Par restar pi tranquilo, pensa vanti in quel che te vol parlar. Par esémpio, vanti de ndar a una festa, te pol pensar sora arquanti assunti che te vè parlar cole persone. Se te fè cossita, cognosser altre persone sarà pi fàcile.” — Alana.

   La Bìblia la dise: “No sté preocuparve sol con quel che valtri volé, ma anca con quel che i altri i vol.” — Filipensi 2:4.