I GIÓVENI I DOMANDA
Sarà che l’è sbalià esser omossessual?
“Quando mi ero un toso, una dele pedo dificoltà che mi go infrontà la ze stata che me piasea de altri tosi. Mi pensea che quel lì ndea passar, ma mi go ancora questi sentimenti.” — David, 23 ani.
David el vol far quel che ghe piase a Dio. Sarà che el pol contentar a Dio ancora che el ghe piase de altri tosi? Cossa che Dio el pensa sora el omossessualismo?
Cossa che la Bìblia la dise?
Quel che le persone le pensa sora el omossessualismo pol cambiar de acordo cola cultura o cola època che lore le ga vivesto. Ma quei che i vol contentar a Dio no i va drio a quel che la pi granda parte dele persone la dise. (Efesi 4:14) Invesse, lori i va drio a quel che la Bìblia la insegna sora el omossessualismo o sora tuti i altri assunti dela vita.
Quel che la Bìblia la dise sora el omossessualismo l’è ciaro. La Parola de Dio la dise:
“No stà far relassion sessuai con nantro omo, come che se fà con una dona.” — Levìtico 18:22.
“Par quela Dio, de acordo cola voia del cuor de lori, . . . li ga abandonadi e lori i va drio le so voie sessuai sensa controlo. Le done intrà de lori no le dopera pi el so corpo de maniera natural, ma le va contra quel che l’è natural.” — Romani 1:24, 26.
“No sté mia farve imbroiar. Quei che i fà imoralità sessual, i idòlatri, i adùlteri, i òmini che i aceta partissipar in ati omossessuai, i òmini che i fà ati omossessuai, i ladroni, quei che i vol sempre de pi, quei che i beve massa, quei che i ofende i altri, quei che i cava via soldi dei altri no i guadagnarà el Regno de Dio.” — 1 Corinti 6:9, 10.
La lege de Dio la ze par tute le persone, no vol dir se lore le ga voie omossessuai o nò. In verità, tuti i ga de controlarse quando i ga voia de far qualcossa che no ghe piase a Dio. — Colossensi 3:5.
Alora vol dir che . . . ?
Alora vol dir che la Bìblia la dise che ghemo de odiar i omossessuai?
Nò. In verità, la Bìblia la dise che no ghemo de odiar nissuni, sia gay o nò. Invesse, la ne dise par esser in pace con tute le persone, no vol mia dir la so maniera de viver. (Ebrei 12:14) Alora, l’è sbalià far bullying, tratar mal o far qualche crime contra una persona parché la ze omossessual.
Alora vol dir che i cristiani i ga de ndar contra le lege che assa i omossessuai maridarse?
La Bìblia la mostra che Dio el ga fato el matrimònio par esser intrà un omo e una dona. (Mateo 19:4-6) Ma le lege che i governi i fà sora el matrimònio intrà persone del medèsimo sesso le ze un assunto polìtico. La Bìblia la dise che i cristiani no i ga de scòlier una banda in assunti polìtichi. (Gioani 18:36) Alora, i cristiani no i apoia gnanca i va contra le lege del governo sora el matrimònio dei omossessuai o qualche altro assunto sora lori.
Ma e se . . . ?
Ma e se una persona la fà ati omossessuai, sarà che la pol cambiar?
Si. Tante persone dei tempi bìblichi i ga cambià. Dopo de parlar che quei che i fà ati omossessuai no i ndarà ricever le benedission del Regno de Dio, la Bìblia la dise: “Questo l’è quel che arquanti de valtri eri.” — 1 Corinti 6:11.
Sarà che vol dir che quei che i se ga fermà de far ati omossessuai no i gavarà pi gnanca una voia omossessual? Nò. La Bìblia la dise: “Gavé de vestirve cola nova personalità, che, par meso dela cognossensa giusta, la ze drio esser fata nova.” (Colossensi 3:10) Noantri ghemo de seitar a far cambiamenti.
Ma e se una persona la vol far quel che Dio el vol ma ancora la ga voie omossessuai?
Cossita come qualche altra voia, una persona la pol scòlier se la va fermarse de pensarghe sora o se la va far de acordo cola voia. Come? La Bìblia la dise: “Seité a viver de acordo col spìrito e no ndaré drio a gnanca una voia dela carne.” — Gàlati 5:16.
Gheto visto? El testo no’l dise che la persona no la ndarà pi gaver voie dela carne, come par esémpio le voie omossessuai. Invesse, el testo el dise che, se la persona sempre la stùdia la Bìblia e la prega a Dio, la gavarà la forsa che ghe vol par resister a queste voie.
David, che ghemo parlà nel scomìnsio, l’è stà bon de far cossita. El ga bio ancora de pi forsa par resister a queste voie dopo che el ga parlà con so pare e so mare sora la so dificoltà. Lu el ga dito: “L’è stà come cavar via un grando peso dela me schena. La me vita de gióveno la saria stata tanto de pi felice se mi gavesse parlà con lori prima.”
La verità la ze che semo ancora de pi felici quando vivemo de acordo con quel che Geovà el vol. Semo sicuri che “le òrdine de Geovà le ze giuste, le fà el cuor contento”, e che gavaremo “una granda ricompensa” se obedimo a Dio. — Salmo 19:8, 11.
