Omwene wa Muluku olamulelo ori wirimu. Muluku anavarihele muteko omwenene yoowo weera apake yootthunawe wirimu ni elapo ya vathi. Aani, naari hiyo, ninnatthuna omwenene yoowo. Omwene owo onrowa oottiya nipuro na imwene iya sa mahikwaano, nave owo onrowa owiiraaniha atthu ootheene. Neereke khawosivenleni osuwela mitthenka iya? — Mmusome Daniyeli 2:44; Matheyo 6:9, 10; 24:14.

Yehova oomuthanla Yesu weera akhale mwene a olamulelo awe. — Mmusome Apokalise 11:15.

Yesu mwene oorerela, mwaha woowera owo taikharari ni taxariya. (Matheyo 11:28-30) Nave, mwaha wooweera onrowa olamulelaka arene wirimu, nto onoowera waakhavihera atthu ootheene. Emaara Yesu otthikenlaawe wirimu, owo ahaaweherera atithawe onvara omwene. (Aheberi 10:12, 13) Vano Yesu mwene onlamulela wirimu, ni oovahiwa owera woolamulela tho elapo ya vathi. — Mmusome Daniyeli 7:13, 14.

Muluku onnaathanla atthu weera yalamuleleke ni Yesu wirimu. Biblya onnawitthana atthu awo okhala “òttela.” (Daniyeli 7:27) Arumwa a Yesu oororomeleya tapatxenre othanliwa. Ninlelo, Yehova onnaathanla alopwana ni athiyana weera yakhale vamoha ni Yesu. Yakhwa vale atthu  awo, ennavinyerera ni erutthu ya omunepani weera yakhaleke wirimu. — Mmusome Yohani 14:1-3; 1 Akorinto 15:42-44.

Atthu eene ari ahayi? Yesu onawiitthana okhala  “muloko mukhaani.” (Luka 12:32) Ari atthu 144.000, anrowa olamulela ni Yesu. — Mmusome Apokalise 14:1.

Etthu apatxenraawe opaka waari omwiikara Satana ni mademoni wirimu. Nto Satana, ori ni owali mwaha woowikariwa wirimu eyaakha ya 1914. * Navetho onnakumihera maxupo oohiyana-hiyana elapo yootheene. (Apokalise 12:7-10, 12) Okhuma vavaawo mpaka olelo, elapo enootepa onanara nave sinnakhumelela ikhotto, etala, irettha, ni otendereya wa etthaya. Mene itthu iya, sinthonyera weera, omwene wa Muluku ori vakhiviru weera olamuleleke elapo ya vathi. — Mmusome Luka 21:7, 10, 11, 31.

Omwene wa Muluku onnaakhavihera atthu antxipale osuwela masu a Muluku. Nto imiliyawu s’atthu ya elapo yootheene, arii moono wa omwene wa Muluku. Atthu ene yaawo, ennamwiiwelela mwenaaya Yesu ni toowiirana. Atthu enamwiiwelela Yesu, animwiipithihiwa emaara omwene wa Muluku oneeraya owiveke atthu oonanara murima. Ootheene ale antthuna wiipithihiwa nihiku nno, antthuneya omwiiwelela Yesu. — Mmusome Apokalise 7:9, 14, 16, 17.

Muluku onotthikihera yootthunaawe avarelaka muteko omwene. Npuwa mwa iyaakha 1.000, elapo yootheene enrowa okhala eparadiso. Savira iyaakha iyo ni elapo okhala eparadiso, Yesu onomuhokoloxera omwene tiithaawe Yehova. (1 Akorinto 15:24-26) Neereke ookhala mutthu mwaatthunanyu omutinela mitthenka sene seiya? — Mmusome Nsalmu 37:10, 11, 29.