IYAAKHA seettaka 670, ahinaaya Yesu Kristu owa, Asiriya yaalamulela elapo yootheene. Eblog ya Museu Britânico ehimme há “muttetthe aya wannavirelela mpaka oKipro onneela nsuwa okelaka w’Irã onkhuma nsuwa. Mpaka ehuhu ekina muttetthe aya owo, waahela mpuwa Wixipitu.” Ekapital aya, yaari oNinive, yeeyo yaasuwelinwe okhala ecidade etokweene ya elapo yootheene. Awosa yanniiteexa mwaha wookhalano imonumentu sootikiniha, ijardi sooreera, ipalaacio samusurukhu ni ibibilioteka itokotoko. Soolempwa sa vaxirini sa oNinive wakhalayi, sinnoonihera weera, mwene Assurbanipal hiiho ntoko mamwene makina a w’Asiriya yanniihima okhala “mwene a elapo yootheene.” Ehuhu ele, waakhala ntoko weera icidade sa wAsiriya ni oNinive khasaarowa onyaanyiwa.

Mene nto, vaavo Asiriya yaaraaya ooweraxa, Mprofeti a Yehova sofoniya, aahima ha: “[Yehova] anamuhokhole Asuri (Asiria) anamutatuxe Ninive akhale etturene ehewehewene ni nikarene.” Nave-tho mprofeti Nahumi, aahima-tho yoolohera emoha eneera: “Muhuhule eparatha, haya, muhuhule etxikukhu! . . . Vothevene ovalavela, otoloxiwa, ohuhuliwa: . . . Vavale othene ole onrowa owòna anatthawe ottayi ni weyo èraka: ‘Ninive òtoloxiwa!’” (Sof. 2:13; Nah. 2:10, 11; [2:9, 10 Tradução do Novo Mundo] 3:7) Emaara atthu yiiwaaya soolohera iya, araaya yanniikoha há: ‘Neereke tthiri eyo enimweereya? Neereke nookhala nihuku Asiria anrowaaya onyanyiwa?’ Eyo yaakhala ntoko etthu yahakela weereya.

Nnaamweera vareene hiiho, etthu yeele yahaahoveliwa weera yamweereya, yaaheereya! Iyaakha seettaka 600 Yesu ahinaakuve owa, Asiria aanyanyiwa ni Babilonia vamoha ni Medo Persia. Nto oNinive watthammwa ni atthu yaattiwalawo. Moovarihana ni artigo mmoha ohimmwale ni Museu Metropolitano de Arte de Nova York, ohimme há “iyaakha soohoolo nno, atthammwa ni aattiwaliwa, atthu yaasuwela voohima sa okhalawawe moorweela mwa mBiblyani.” Esite ya Sociedade de Arqueologia Bíblica ohimme há: Woopatxerani wa iyaakha sa 1800, khaavo aasuwenle ekhaikhai ya ekapital ya wAsiriya weera yaakhala, mene eyaakha ya 1845, arqueólogo Austen Henry Layard aapatxera opaka soothipa ecidade ya o Ninive. Itthu soonelelinwe, sannoonihera weera Ninive aari ecidade yoovuwa yakhalayi.

Iprofesiya voohima sa Ninive saaheereya, eyo ennalipiha nroromelo nahu ni iprofesia siri mBiblyani sinthaliha voohima sa omala wa owera wa ipolitika, iprofesia iyo sinimweereya.—Dan. 2:44; Apok. 19:15, 19-21.