1-2. (a) Yehova onoonela hayi yoottheka empakiwa moolakela? (b) Yooweherera heeni Yehova oraaweno wa anamattheka?

 YEHOVA khaiyene Muluku onaasa waakhulela itthu, owo khonsiveliwa ni yoottheka. (Nsal. 5:5-7 [5:4-6, Tradução do Novo Mundo]) Owo onnanooperera ottittimiha malamulo awe ooreera, yaawo owo olempaawe mBiblyani. Ekhaikhai weera Yehova khonweherera omalela wa atthu. (Nsal. 130:3, 4) Mene emaara emoharu owo khonaasa waahiya atthu empaka itthu soonanara yaawo ‘entatuxa mahala a Muluku ahu ekhala anamuttompe.’ (Yuda 4) Tivawonto Biblya onuulumaawe sa ‘onyaanyiwa wa atakhali’ va ekhotto ya Harmagedoni yeeyo eri ekhotto ya Muluku. — 2 Ped. 3:7; Apok. 16:16.

² Mene-tho, Yehova khontthuna weera naari mutthu mmoha anyaanyiwe. Ntoko nonnaahu nyaha sivinre sa soosoma iya, Biblya onnoonihera nnene sene weera Muluku ‘ontthuna weera ootheene erukunuxe murima.’ (2 Ped. 3:9) Asitokweene a mmulokoni ennamutakiha Yehova vaavo eneereraaya moopixa murima waakhavihera ale epanke soottheka otxentxa mikhalelo saya ni otthikela waakhuleliwa ni Yehova. Menento khaiyene atthu ootheene epanke soottheka ennaakhulela nikhavihero nno. (Yes. 6:9) Atthu akina pooti ovirelela ni mukhalelo aya woonanara nnaamweera asitokweene a mmulokoni yiilipihenreene  weera yaakhavihere ottharuwa. Yakhumelela eyo ontthuneya opaka eheeni?

‘MMUKUMIHE VARIYARI VANYU NAMATTHEKA OHINTTHARUWA’

3. (a) Biblya onhima weera anamattheka ehinttharuwa epakeliweke eheeni? (b) Mwaha wa heeni ninhimaahu weera namattheka orimwiithanlela wiikumiha mmulokoni?

³ Vaavo namattheka ohinttharuwaawe, asitokweene a mmulokoni khiyaanoono yoothanla ekina ohikhanle otthara miruku nimphwanyaahu va 1 Akorinto 5:13: ‘Mmukumihe variyari vanyu namattheka ohinttharuwa.’ Mwa mukhalelo ene yoowo, namattheka owo orimwiithanlela eyo; owo a onhepha etthu aaliyaawe. (Agal. 6:7) Mwaha wa heeni ninhimaahu eyo? Mwaha wooweera owo khaakhulenle mwa imaara sintxipale wiilipihera wa asitokweene a mmulokoni weera attharuwe. (2 Mam. 17:12-15) Soopaka sawe sohoonihera weera owo oroothanla ohiiwelela malamulo a Yehova. — Ola. 30:19, 20.

4. Mwaha wa heeni muloko onleeliwaaya weera namattheka ookumihiwa mmulokoni?

⁴ Vaavo namattheka ohinttharuwa onkumihiwaawe mmulokoni, muloko onnaleeliwa weera owo khaiyene Namoona a Yehova. Yoolakela ya yoohimmwa eyo khaiyene omuulihiha muru namattheka owo. Mene yoohimmwa eyo muloko onnaleeliwa weera otthare miruku sa mBiblyani sa ‘ohiipwexeerera’ naari ‘ohitxano’ vamoha ni mutthu owo. (1 Akor. 5:9-11) Miruku iya soovahiwa ni nthowa nooreera. Murummwa Paulo olempe ha: “Miropo vakhani sinnanyarula ephepa eri yothene.” (1 Akor. 5:6) Anamattheka ehinttharuwa pooti waakhulumula ale eniilipihera otthara malamulo axariya a Yehova. — Mir. 13:20; 1 Akor. 15:33.

5. Nimooneleke hayi mutthu okumihinwe mmulokoni, ni mwaha wa heeni?

⁵ Vanonto nimooneleke hayi munna naari murokora okumihinwe mmulokoni? Nnaamweera hiyo nihiiraanaka ni mutthu owo, nintthuneya omoonaka ntoko eputtiputthi yooriheya, ohiya ntoko mutthu ohikhanleno yooweherera. Eputtiputthi eriheñye variyari va iputtiputthi ikhwaaya eyo pooti otthika. Muupuweleke weera mutthu owo ohiivaherera wa Yehova. Mooripiha murima, khampaka itthu moovarihana ni wiivaherera wawe, ni eyo yoomwihiya veerisani. (Ez. 18:31) Menento, mwaha wa ikharari sa Yehova, ennakhala yooweherera weera mutthu owo onootthika. Moota heeni asitokweene a mmulokoni enooniheraaya yooweherera eyo moovarihana ni mutthu opanke yoottheka ni okumihinwe mmulokoni?

MOOTA ASITOKWEENE A MMULOKONI ENAAKHAVIHERAAYA ALE EKUMIHINWE MMULOKONI

6. Itthu heeni asitokweene a mmulokoni enrowaaya opaka weera emukhavihere mutthu akumihinwe mmulokoni?

⁶ Neereke namattheka okumihinwe mmulokoni oonyanyaliwa naari oohiiwa weera aphwanye meekhaawe ephiro yootthikela wa Yehova? Hooye! Emaara asitokweene a mmulokoni emmuleelaaya namattheka ohinttharuwa weera onookumihiwa mmulokoni, ekhurupu ya asitokweene a mmulokoni ennamuleela itthu ontthuneyaawe opaka weera atthikele mmulokoni. Mene asitokweene a mmulokoni ennapaka-tho itthu ikina. Mwa ikwaha ikina, awo ennamuleela mutthu opanke yoottheka weera awo yaamusiveliwa wuuluma veeli ni mutthu owo sivinreene miyeeri vakhaani weera yoone wakhala weera owo onnatxentxa mikhalelo sawe. Wakhala weera mutthu owo opanke yoottheka onnaakhulela, asitokweene a mmulokoni enoorowa opaka muthukumano yoowo enrowaaya omoopereera mwa  nsivelo weera attharuwe ni atthikele mmulokoni. Nnaamweera mutthu opanke yoottheka ahitxentxaka mikhalelo sawe emaara ene yeele, asitokweene a mmulokoni enoorowa wiilipihera weera yuulume-tho ni owo emaara ekina.

7. Moota heeni asitokweene a mmulokoni enooniheraaya opixa murima wa Yehova vaavo emmuthokororaaya mutthu okumihinwe mmulokoni? (Yeremiya 3:12)

⁷ Asitokweene a mmulokoni enniilipihera weera ekhale oopixa murima ntoko Yehova vaavo emmuthokororaaya mutthu okumihinwe mmulokoni. Mwa ntakihero, Yehova khaaweherenre weera muloko wa ana a Israeli yoowo waamurukunuwenle opatxerihe omwaasa owo. Ohiya opaka eyo owo aapatxeriha owaasa awo nnaamweera yahaapatxerinhe woonihera mukhalelo woottharuwa. Ntoko niwenhaahu yoosoma ya naaveeli ya nyaha iya, Yehova ohoonihera opixa waawe murima vaavo aamurummaawe profeta Hoseya otthikela wiiraana ni amwaarawe, yaawo yaapaka yoottheka. (Hos. 3:1; Mal. 3:7) Emutakihaka Yehova, asitokweene a mmulokoni ennatthuna ni murima aya wootheene weera namattheka atthike, ni awo khenxupiha itthu weera eyo yeereye. — Mmusome Yeremiya 3:12.

8. Moota heeni ntakihero na Yesu woohima sa mwaana aakhumme vaate va apapawe nnooniheraaya opixa murima ni ikharari sa Yehova? (Luka 15:7)

⁸ Muupuwele ntakihero na Yesu na mwaana aakhumme vaate va apapawe, ntoko niwenhaahu yoosoma yanaaveeli ya nyaha iya. Vaavo atiithi awe yaamonnaaya mwanaya atthikelaka owanyaya, atiithi awe ‘yaamutthimakela, yaamukhupaarela ni yanvaha epeexu.’ (Luka 15:20) Moone weera tiithi ole khaaweherenre weera mwanawe avekele nlevelelo. Opwaha mwa yeeyo, owo aapatxeriha opaka eyo, ntoko tiithi ori poothe a nsivelo aarowaawe opaka. Asitokweene a mmulokoni enniilipihera weera yoonihere mukhalelo mmoharu woohima sa ale ekumihinwe mmulokoni. Awo entthuna weera iputtiputthi siriheñye “sitthike.” (Luka 15:22-24, 32) Onnakhumelela ohakalala wiirimu ni elapo ya vathi vaavo namattheka onttharuwaawe! — Mmusome Luka 15:7.

9. Moota heeni Yehova mwa nsivelo onaakhaviheraawe anamattheka?

⁹ Mwa itthu sootheene nonnaahu mpaka va, onnooneya weera Yehova khontthuna weera atthu ale epanke soottheka itokweene ehinttharuwa evireleleke okhala mmulokoni. Mene-tho, owo khonaanyanyala atthu awo. Owo ontthuna weera atthu awo etthikele mmulokoni. Yoolepa ya Hoseya 14:4, ennoonihera moota Yehova onwoonelaawe anamattheka ettharunwe yeeraka: “Kinahala openuxa ohìwelela waya, kinrowa wàtthuna ni murim’aka wothene, niwoko esar’aka yoharakamela [yaawo].” Tthiri ela ennawoonihera asitokweene a mmulokoni woonaka mukhalelo wa ottharuwa wa mutthu otthenke nave ennaweeriha ale emuhiñye Yehova omutthikela moowaakuveya.

10-11. Moota heeni asitokweene a mmulokoni eneereraaya waakhavihera ale ekumihinwe mmulokoni mwa etempu yintxipale?

¹⁰ Ankha atthu ale ekumihinwe mmulokoni khalayi, apaale mwa iyaakha sintxipale? Atthu ntoko awo pooti weeraka aahiya opaka yoottheka eweerinhe okumihiwa mmulokoni. Nave akina, pooti weeraka khenuupuwelela etthu eweerinhe okumihiwa mmulokoni. Ehipwatthaka eyo, asitokweene a mmulokoni enoorowa owaasaasa weera yaaxekure atthu awo. Vaavo enaaxekuraaya, asitokweene a mmulokoni enoorowa ovekela vamoha ni awo nave enoorowa owooperera mwa nsivelo weera etthikele mmulokoni. Ekhaikhai weera wakhala weera mutthu ookumihiwa mmulokoni mwa iyaakha sintxipale, moohihovela owo ookhulumuwa moomunepani. Tivawonto wakhala weera owo onoohima weera onnatthuna otthikela mmulokoni asitokweene a mmulokoni  enoorowa onvekela munna mmoha weera ampakihe yoosoma ya Biblya, nnaamweera mutthu owo ahaakunveene otthikiheriwa mmulokoni. Mwa itthu sootheene iya, asitokweene a mmulokoni yaarowa ompakiha yoosoma ya Biblya.

¹¹ Etakihaka opixa murima wa Yehova, asitokweene a mmulokoni ennatthuna waakhavihera anamattheka antxipale woonelela weera milako siri soohuliwa sene weera etthike. Vaavo namattheka onooniheraawe weera oottharuwa ni oohiya mukhalelo awe woonanara, owo pooti otthikiheriwa mmulokoni voohipisa. — 2 Akor. 2:6-8.

12. (a) Mwa itthu heeni asitokweene a mmulokoni entthuneyaaya wiikosoopa? (b) Mwaha wa heeni nihintthuneyaahu wuupuwelaka weera anamattheka akina khentthuneya omoreliwa ikharari ni Yehova? (Nwehe enoota.)

¹² Mwa mikhalelo mikina, asitokweene a  mmulokoni entthuneya wiikosoopa nnene ehinaaye omutthikihera mutthu mmulokoni. Mwa ntakihero, wakhala weera mutthu owo aakoniha anamwane, naari aari namavaanyiha, naari ampanke palanu oomwalana, asitokweene a mmulokoni entthuneya osuwela nnene sene wakhala weera mutthu owo oottharuwa. (Mal. 2:14; 2 Tim. 3:6) Awo entthuneya okosoopa muloko. Emaara emoharu, ninnatthuneya osuwela weera Yehova onnawaakhulela otthika anamattheka ootheene ettharunwe ni murima aya wootheene ni ehiñye mukhalelo aya woonanara. Mwa yeeyo nnaamweera asitokweene a mmulokoni etthuneyaka wiikosoopa ni ale yaakumihenre maxupo atthu akina, awo khentthuneya ohima weera anamattheka ntoko awo khenrowa omoreliwa ikharari ni Yehova. b — 1 Ped. 2:10.

ETTHU MULOKO ONTTHUNEYAAYA OPAKA

13. Ovirikana heeni okhanle eriyari ya moota nimmuthokororaahu mutthu ottaruxinwe ni mutthu okumihinwe mmulokoni?

¹³ Ntoko nonnaahu mwa yoosoma evinre, ikwaha ikina muloko onnaleeliwa weera munna oottaruxiwa. Yeereya eyo, hiyo pooti ovirelela wiiraana nuuwo, wakhala weera owo oottharuwa ni oohiya mukhalelo awe woonanara. (1 Tim. 5:20) Owo nlelo onneerela eparte ya muloko nave onnahaawela nikhavihero nenno ninvahiwa ni asinna. (Aheb. 10:24, 25) Menento eyo ti yoovirikana vantxipale ni mutthu enre okumihiwa mmulokoni. Hiyo ‘khanniipwexeerera’ ni mutthu owo ‘naari khanintxano vamoha.’ — 1 Akor. 5:11.

14. Moota heeni makristu enrowaaya ovarihela muteko yoowuupuxera aya ya murima yootxentxerihiwa ni Biblya vaavo enaathokororaaya ale ekumihinwe mmulokoni? (Nwehe efootu.)

¹⁴ Neereke itthu nithokoronraahu sintthuna ohima weera nnoorowa omusepaka moomalela mutthu okumihinwe mmulokoni? Hooye. Ekhaikhai weera hiyo, khaninkela wiiraana ni mutthu owo. Mene akristu pooti ovarihela muteko yoowuupuxera ya murima aya yootxentxerihiwa ni Biblya weera ethanle wakhala weera enonwopa mutthu okumihinwe mmulokoni, apaale mmusi aya naari mutthu aari nthamwene aya khalayi. Vanonto aphiya vale? Khalayi, hiyo khanaamuulumiha mutthu ntoko  owo. Menento vatho, yoole ori mukristu onoorowa ovarihela yoowuupuxera awe ya murima yootxentxerihiwa ni Biblya woohima sa mwaha ene yoowo. Akina pooti othanla omuulumiha mutthu owo naari omwaakhela mmithukumanoni. Menento, hiyo khaninrowa oviriha etempu yintxipale nuulumaka ni mutthu owo.

15. Anamattheka heeni enhimmwa va 2 Yohani 9-11? (Nwehe ekwaadru “ Yohani ni Paulo yaahima yoottheka emoha-moharu?”)

¹⁵ Akina pooti wiikoha ha, ‘Biblya khohimme weera mukristu ommuulumiha mutthu owo oneerela eparte miteko sawe soonanara?’ (Mmusome 2 Yohani 9-11.) Masu a eversu ela enoonihera weera enhimmwa anamavaanyiha ni akina enkumihera mukhalelo woonanara. (Apok. 2:20) Mwa yeeyo, wakhala weera mutthu owo onnakumihera sooxuttiha sa anamavaanyiha naari mikhalelo mikina soonanara, asitokweene a mmulokoni khenrowa wiireherera weera yaamuxekure. Ekhaikhai weera, owo pooti otthikela okhalano mikhalelo sooreera. Mene niwehereraka eyo weereya, hiyo khaninrowa omuulumiha naari onwopa weera oonele mithukumano.

NITAKIHAKA OPIXA MURIMA NI OMORIWA IKHARARI WA YEHOVA

16-17. (a) Yehova ontthuna weera anamattheka epake eheeni? (Ezekiyeli 18:32) (b) Moota heeni asitokweene a mmulokoni enrowaaya woonihera weera ennavara vamoha ni Yehova weera yaakhavihere anamattheka?

¹⁶ Etthu heeni nxuttenraahu ni yoosoma ela ya nyaha iya 5? Yehova khantthuna weera naari mutthu mmoha anyaanyiwe! (Mmusome Ezekiyeli 18:32.) Owo ontthuna weera anamattheka etthikele wiiraana nuuwo. (2 Akor. 5:20) Ti yeeyo yaamweerinhe Yehova ovinyera khalayi owooperera moohihiyerereya atthu awe yaamurukunuwela weera ettharuwe ni etthikele wiiraana nuuwo. Asitokweene a mmulokoni aakhalano eparakha yoovara vamoha ni Yehova vaavo eniilipiheraaya oweeriha anamattheka ottharuwa. — Arom. 2:4; 1 Akor. 3:9.

¹⁷ Nkuupuwelani ohakalala onkhumelela wiirimu vaavo anamattheka enttharuwaaya! Tiithi ahu a wiirimu Yehova, onnahakalala emaara eri yootheene onoonaawe iputtiputthi sooriheya sitthikelaka mmulokoni. Nsivelo nahu ni Yehova ninnavirelela waatxeerereya vaavo nimphimelelaahu opixa wawe murima, ikharari sawe ni oreera wawe murima. — Luka 1:78.