IYAAKHA sa muttuli mwaaxekunre eilha ya Sangir Besar, wIndonésia, apaale nyuwo mwaamurowa owoona asirokora araru yaakhala weiwo. Iwe asirokora ala ennasuweliwa vantxipale mwaha woowaakhavihera atthu omusuwela Biblya. Menento ekwaha ela yannapaka etthu yoovirikana.

Asirokora ala yaakhovelela ovolowa mmaahini eteexaka maluku eroihaka omokoni. Maluku makina yannunnuwa ntoko boola onvonyiwa okampu. Avinyaka awo yannakilaathela ebanko ya ethaapwa ni yannaavarihela muteko amartelo weera epwexe maluku ale mpaka okhala makhaanini opwaha nootxe na mwalakhu. Avinyaka , awo yanniitthela maluku awo makhaanini mbaaldeni sa palaastiku ni yannawela iskata eteexaka ibaalde iyo sa maluku mpaka nipuro awo yaakhalaaya. Nave yannahela maluku awo musaakhoni itokotoko weera siteexeriwe mukaaroni weera yavareliwe muteko woopaka misewe.

Mmoha a asirokora ala aari Hulda. Owo annawera okhalano etempu yintxipale weera avare muteko owo. Onooneya weera, owo annavarihela muteko musurukhu aaphwanyaawe avaraka muteko owo weera atxihe emusi awe. Menento ekwaha ela, owo aakhalano yooluluwanya ekina. Owo aatthuna omuthuma tablethi weera anvariheleke mutreko aplikativu JW Library^®. Hulda annasuwela weera iviidiyu siri mu aplikatiivuni mmo, sammukhavihera mmutekoni moolaleera ni yoosoma awe ya omeekha.

Hulda annavara muteko iwoora piili wooixelo, mpuwa mwa mweeri mmoha ni emeya, weera awere onyaanya maluku ookwanela ni osariha ekamiyawu ni okhwipi waya Hulda aaphwanya musurukhu waaphiyera omuthuma tablethi.

Hulda ohimme ha: “Miyo kannakhulumuwa vantxipale mwaha woopwexa maluku ale. Menento okhulumuwa iwo wootheene miyo kaattuwala vaavo kaapatxenraaka onvarihela muteko tablethi nave aakikhavihera okhumela nnene mmutekoni moolaleera ni oreherera nnene mithukumano.” Owotho onnahima eeraka, tablethi ole aakikhaviheera mpuwa mwa eretta ya Coronaviru, vaavo mithukumano sahu seettihiwaaya avariheliwaka muteko internet. Hiyotho ninnahakalala vantxipale woona weera Hulda aawera ophwanya ele aatthunaawe.