AXINAMA anceene anaamwa anikhala mmaasini ooriirya, aakhalana ethayi yoonuna yoolipa vaxapalani vaya yeeyo enaakhaliherya ophwanya oviha. Kattupu a mphareya oniphwanya oviha mwa enamuna ekina, eyo piiyo, exapala awe yookhalana manri manceene ootthipana.

Muthokorerye ela: Exapala ya kattupu a mphareya ti yowaatta manri ovikana inama sikina sinaamwa. Khula esentiimeturu yookhalana manri aniphiyerya 115.000. Okathi kattupu onkata awe, manri a exapala awe annisuka epheyo mwerutthuni mwawe. Epheyo eyo ennimukhapelela maana ennikhoottiherya maasi ooriirya ophwanya exapala awe ni ovukula oviha wa erutthu awe.

Masientista anikupali wira vanniweryaneya wiixutta etthu ni exapala ya manri ya kattupu a mphareya. Awo aheererya opaka ixapala sa manri, sookhuveya manri aya ni oohitthipana. Masientista awo aaweha wira “exapala erina manri oorekama ni ootthipana khenisuka maasi, wala ti yoowuuma”. Olavula mookwasa, naarowa wira kattupu a mphareya ookhalana exapala ya manri enimukhapelela vanceene.

Masientista anlipelela wira itthu iyo anitokosa aya sinimwaakhaliherya orowa vahoolo wira aweryeke opaka ikuwo sihinivira maasi. Eyo enniwiiriha akina wuupuwelaka wira vaarowa okhala vooloka atthu yaale ampwina mmaasini ooriirya, owara ikuwo sa manri sintoko exapala ya kattupu a mphareya!

Munoonela sai? Niireke exapala ya manri ya kattupu ensuka oviha, eroothatuwa? Wala eroopattuxiwa?