ERETTA EHINVONIWA NI ORAKALA POOTI OTURUKA OKUMI WA MUTTHU. Nuumala orakala, mulopwana mmosa aarina ekumi yooloka ni ikuru oniitthaniwa Ulf, aahimmye so: “Kaahiriipiwa murima vanceene. Ikuru, olipa murima ni owerya waka waahikimalela. Miyo kaahimala-mala’”.

Etthu emwiiranenle Ulf ennuupuxerya wira khuuvo mutthu oniwerya weettiherya ekumi. Hata vari siiso, sookhala itthu skhanle ahu oopaka wira nihaakuveke owereiwa. Ankhi naawereiwaka? Niireke nihaana oriipiwa murima mootepana? Nnaari. Wanipacerya, nrowe noone itthu vakhaani sinrowa onikhaliherya okhalana ekumi yooloka.

‘MUSUWELEKE WIPHIMELA’. (1 Timótheyo 3:2, 11) Omakela olya wala owurya mootepana, onnihonona okumi. Nave onnihonona musurukhu munceene! Biibiliya onlopola so: “Muhitthuké muloko n’anamuhapaliwa: muhitakanyihané n’ale anìpeliwa. Namuhapaliwa nnamulya anokhala amasikhini”.​—Miruku 23:20, 21.

MUHINANARIHEKE ERUTTHU ANYU. “Nrapihe sonanara sothene s’erutthu ni s’eroho”. (2 aKorinto 7:1) Atthu anninanariha erutthu okathi animpaha aya soona wala omulya, aahiiso owurya mootepana wala olya mirette soohapala. Mwa ntakiheryo, nikhuuru na Centros de Controle e Prevenção de Doenças, EUA, nnihimya wira “ompaha soona onnikumiherya iretta, orakala ni ohonona makhalelo a erutthu”.

NVAHEKE EFAITA ERUTTHU NI EKUMI ANYU. “Okhala wira hiyo nokhalana ekumi mwa yowo [Muluku], ninnetta mwa yowo, nokhala mwa yowo”. (Miteko 17:28) Osuwela eyo onniniiriha osyaka itthu saarowa ohonona okumi ahu omutekoni, neettihaka mukukutta, wala naatthekulaka. Otteeliwa murima okathi vakhaani khonliverya orakala okumi wotheene!

MUSYAKEKE MIYUUPUWELO SOOHILOKA. Muupuwelo ni erutthu sinnivarihana. Tivonto, nihaana osyaka oxankiheya, onanariwa mootepana, nrima  ni miyuupuwelo sikina soohiloka. Esalimo 37:8 enihimya so: “Muhinanariwé! Mutthyawe oruwana. Muhiviruwé!” Nave Matheyo 6:34 oni: “Muhukhuwé nnihiku n’omelo: munimùkhuwaka melo vavo”.

MUUPUWELEKE ITTHU SOOLOKA. Eliivuru ya Miruku 14:30 enihimya so: “Murima womàla okumi w’erutthu”. Biibiliya onihimya-tho so: “Murima wottela murettele w’erutthu”. (Miruku 17:22) Siensia onnikupaleela moolumo awo. Mwa ntakiheryo, meediku mmosa a wEscócia aahimmye so: “Mwakhala mutthu oohakalala, woonasa wene khamunrowa owereiwaka vanceene muhoolo”.

NVILELEKE. Ntoko Ulf oromoliwe wanipacerya, hiyo khanniwerya weettiherya ekumi ahu, masi nnoowerya ovilela. Okathi wa mixankiho hiyo pooti waavya enamuna nikhanle ahu oovilela. Akina annixanka vanceene wala ovololiheya, nto eyo ennincererya mixankiho saya. Biibiliya oni: “Mojeyá movelavelani, ikuru sanyu ti sivukunwe”.​—Miruku 24:10.

Akina, nuumala muxankiho aya ovukuwa vakhaani, anniphwanya ikuru. Awo anniphavelasa enamuna yoovilela. Eyo ti etthu yaapanke awe Ulf. Owo onihimya wira nuumala opaka nivekelo ni wuupuwelela muhupi wooloka aasomme awe mBiibiliyani, aahipacerya woona mixankiho sawe “okhala ntoko okathi wonvekela Muluku ni wuupuwelela Nuulumo Nawe”. Ohiya-vo, ntoko atthu akina arina mixankiho, Ulf aahiixutta okhala oomoriwa ikharari ni oothunku. Nto eyo yaahimwiiriha ophavela waaleela akina ele yaasomale awe mBiibiliyani.

Mulopwana mukina oniitthaniwa Steve, aahikhalana muxankiho muulupale. Okathi aarina awe iyaakha 15, aahirakala exiko. Nuumala ophiyeriha iyaakha 18 miyoono sawe saaniwerya ovara etthu. Muhoolo mwaya, aahirowa osoma universidade. Nto okumi awe waahiturukeya, khupacerya olya mirette soohapala, owurya, ni orupihana woohiloka. Owo khaarina-tho nlipelelo, mpakha okathi aapacenrye awe omusoma Biibiliya. Yoosoma eyo yaahituruka moota oonela awe okumi, ni yaahimukhaliherya ohiya soolema sawe soohiloka. Owo aahimmye so: “Mixankiho kaarina aka okhuma khalai soovira. Vano, okumi aka ti woomaaleleya, wa murettele, ni ka mutthu oohakalala”.

Itthu simwiiranenle Steve ni Ulf, sinnuupuxerya masu a Esalimo 19:8, 9: “Soruma s’Apwiya ti sorera: sinnivaha ekumi ya nanano. . . . Soruma sa Muluku ti soloka: sinnitteliha murim’ahu. Masu a Apwiya t’òwarya: annireriha witho”.