• Mwaninyu oopacerya wiixinnuuha, masi owo orina iyaakha 10 paahi!

• Owo oniphavela wira atthu otheene amooneke okhala ootthuneyexa.

Nyuwo munniikoha so: ‘Exeeni enimwiiriha opaka itthu iye? Miyo kiniphavela wira iivaheke efaita, masi ohuupuweleke wira tootepexa otthuneya waavikana akina!’

Niireke vanniweryaneya omwiixuttiha mwaana okhala oowiiyeviha voohihonona mikhalelo sawe sooloka?

Iyaakha vakhaani sivinre, anamuyari yaanitumereriwa waavaha anaaya khula etthu eniphavela aya; waattottopela okathi wotheene hata ahipanke etthu yooloka; ni ohaalakiherya wala waattaruxa. Atthu awo yuupuwela so: waahiya anamwane yiixoonaka okhala ootepa otthuneya, onoowiiriha wiivaha efaita yannuwa vale. Nto exeeni ekhumelenle? Eliivuru Atthu Oowiihelana (Generation Me) enihimya so: “Waattottopela anamwane hata ahipanke etthu yooloka, onnaahonona ohiya waakhaliherya”.

Anamwane yaale aninnuwa attottopeliwaka moohikhalela, anninyoonyiheya okathi anittaruxiwa aya wala anipaka aya etthu yoohiloka. Mwaha wa wiixuttihiwa wira soophavela saya ti sootepa otthuneya, okathi aninnuwa aya vannaavila opaka opatthani woolipa. Nto eyo enniwiiriha anamwane awo oxankiheya ni oriipiwa murima.

Wira anamwane yiivaheke efaita oratteene, muhimakeleke waaleela wira awo tootepa otthuneya. Masi, mwaattottopeleke paahi okathi anivara aya itthu sooloka. Eyo enoowiiriha ohiiroromela mootepana. Awo ahaana wiixutta, ovarihela muteko ele eniixutta aya, ni wiimananiha okhalana mikhalelo sooloka. (Miruku 22:29) Nave-tho, ahaana ovahaka efaita soophavela sa atthu akina. (1 aKorinto 10:24) Wira apake eyo ahaana wiiyeviha.

Mwaattottopeleke Vaareerelaka. Akhala wira mwaninyu mwaamuthiyana onnikhumela saana iporova sa oxikola, mmuttottopele. Akhala wira ehaavo eporova ehikhumenle awe saana, muhaakuveke onvaha nthowa prusoore. Eyo khiyaarowa omwiixuttiha mwaninyu okhala oowiiyeviha. Ohiya-vo, mmukhaliherye wira okhumele saana ekwaha ekina. Mmuttottopele mwaha wa itthu opanke awe saana.

Mmuttaruxeke Vaatthuneyaka. Eyo khentaphulela wira muhaana ompwapwela mwaha wa khula etthu yoohiloka enipaka awe. (aKolosi 3:21) Masi mmuttaruxeke apaka soovonya suulupale. Nave, mmuttaruxeke akhala wira onooniherya mweettelo woohiloka. Mwaahimuttaruxe, mweettelo owo pooti wunnuwa vamurimani vawe.

Mwa ntakiheryo, muupuwele wira mwaninyu oopacerya wooniherya makhalelo a wiixinnuuha. Mwaahimuttaruxe, owo pooti okhala oowiixinnuwiha ni oohipatthaneya. Nto mmutthokiherye wira wiixinnuwiha khahiyo etthu yooloka, ni wira eyo pooti omwiiriha wuuliwa muru. (Miruku 27:2) Nave-tho, mmuleele wira mutthu oniivaha efaita mookhalela, khoniixooniherya wira toosuwelexa waavikana akina. Mwamuttaruxa mwa enamuna yoophenta onimwiixutta wiiyeviha ni okhala oowiittittimiha.​—Malakiheryo a Biibiliya: Matheyo 23:12.

Mmukhaliherye osuwela mixankiho sinrowa omukhumelela annuwa vale. Onvaha mwaana khula etthu eniphavela awe pooti omwiiriha wiixoonaka okhala ootthuneyexa. Mwa ntakiheryo, akhala wira oniphavela etthu ehiniwerya anyu othuma, mmutthokiherye otthuneya waya ohakalala ni itthu sirina awe. Akhala wira mwaaphavela weetta mukwaha wala okhuma ifeeriya masi khuhiweryaka, mmutthokiherye wira nnaamwi vari vooriipiha murima, eyo enniiraneya. Nave-tho, pooti ovaanela ni yena moota nyuwo munoonela anyu mwaha owo. Nto, muhivitheke mixankiho sanyu. Masi mmukhaliheryeke osuwela mixankiho sinrowa omukhumelela annuwa.​—Malakiheryo a Biibiliya: Miruku 29:21.

Mmutumereryeke okhala oovaha. Mmooniheryeke mwaninyu wira “mulipa-òvaha onoreriwa onvikana mulipa-òvahiwa”. (Miteko 20:35) Munrowa omukhaliherya sai? Mpakeke hoothe elista ya atthu anitthuneya okhaliheriwa, ntoko: othuma etthu, opakhiriwa aahiiso olokiha etthu yoohononeya. Mwaakuxeke aniinyu okathi munrowa anyu waakhaliherya atthu awo. Okathi anoowehaayani muhakalalaka mwaha wa waakhaliherya akina, awo anaamoonaka otthuneya waya ophavela mureerelo wa atthu akina. Tthiri, ntakiheryo nanyu nnoomwiixuttiha mwaninyu okhala oowiiyeviha mwa enamuna yoolokexa.​—Malakiheryo a Biibiliya: Luka 6:38.