1. Yehova onaathokorerya sai arumeyi awe?

 YEHOVA onnisuwela mixankiho sootheene sinaaphwanya arumeyi awe. Nave onnisuwela okathi ninhakalala ahu ni okathi ninriipiwa ahu murima. (Esal. 37:18) Yehova onnihakalala vaavo nimmurumeela ahu ni murima ahu wootheene, hata siniphwanyaka mixankiho! Tivonto, owo ori oolikana ene wiira onikhaliherye ni onimaaliha.

2. Etthu xeeni Yehova oniwiirela awe ale ariipiwe murima, nave ninrowa ottottela sai mureerelo nikhaliheryo nawe?

² Esaalimu 147:3, enihimya wiira Yehova “onnitthukwa makhwatta” a atthu ariipiwe murima. Yoolepa ela, ennooniherya moota Yehova onaakhapelela awe ale ariipiwe murima. Masi nihaana opaka exeeni wiira nittottele muraarelo nikhaliheryo na Yehova? Muupuwele ntakiheryo nla. Meediku pooti owerya omukhaliherya mutthu ovulanle wiira openuwe. Masi wiira ottottele muraarelo nikhaliheryo nawe, mutthu owo ovulanle ohaana otthara ni ovaha ephoole malakiheryo a meediku owo. Mwaha ola, nnooweha etthu Yehova onaaleela awe ale sinaaphwanya mixankiho ni nnoothokorerya miruku sawe soophenta siri mbiibiliyani.

YEHOVA ONNINIVAHA EFAITA YINCEENE

3. Xeeni atthu akina anoona aya wiira khaniphentiwa?

³ Mooriipiha murima, atthu anceene olelo-va khanaaphenta akhwaaya. Mwaha waivaavo, awo annaahasula atthu akina ni anniwiiriha wuupuwela wiira kharina efaita. Murokora mmosa oniitthaniwa Helen a, onihimya so: “Kihuuwale emusi yahaarina niphento. Apaapa yaari mutthu ootakhala nave khula nihiku yaanikileela wiira nkaarina efaita”. Woonasa wene, mootoko othokoreriwa moohiloka, oruwaniwa ni wiixoona wiira khamuniphentiwa.  Akhala wiira eyo yootoko owiiraneelani, pooti woovilani okupali wiira ookhala onoothokoreryani.

4. Moovarihana ni Esaalimu 34:18, etthu xeeni Yehova onnileiherya awe?

⁴ Nnaamwi atthu akina atonko ene woothokoreryani moohiloka, mukupaliki wiira Yehova onnoophentani ni onnoovahani efaita. Owo “ori vakhiviru va atthu ariipiwe murima”. (Musome Esaalimu 34:18.) Vakhala wiira “mookhulumuwa”, muupuweleke wiira Yehova ooweha itthu sooreera vamurimani vanyu ni ohiiruuhela wa yena. (Yoh. 6:44) Khula okathi, Yehova oniphavela wookhaliheryani maana onnoothokoreryani.

5. Exeeni nniixutta ahu ni moota Yesu aathokorerya awe atthu ale yaixoona ohikhalana efaita?

⁵ Nnoowerya wiixutta sa moota Yehova onnithokorerya awe ni ntakiheryo na Yesu. Okathi aari valaponi, anaareerela murima atthu yaixoona ohikhalana efaita mwaha wa itthu yaapakeliwa aya ni atthu akina. (Math. 9:9-12) Okathi muthiyana mmosa, yoowo aavirihale iyaakha sinceene owereiwaka aavanre awe nlaya na Yesu, ororomelaka wiira ampenuwa, owo aahimmaaliha ni omuttottopela mwaha wa waamini wawe. (Mar. 5:25-34) Yesu onnitakiha moomalela mikhalelo sa Tiithi awe. (Yoh. 14:9) Tivonto, mukupaliki wiira Yehova onnoothokoreryani ni onniweha mikhalelo sooreera murina anyu, ohela muhina waamini ni omphenta wanyu.

6. Exeeni mukhanle anyu oopaka akhala wiira nlelo munoona wiira khamurina efaita?

⁶ Exeeni mukhanle anyu oopaka akhala wiira nlelo munnoona wiira khamurina efaita? Etthu mukhanle anyu oopaka, ori osoma iversiikulu sa mbiibiliyani sinrowa wookhaliheryani woona wiira Yehova onnoovahani efaita ni wuupuwelela. b (Esal. 94:19) Muhiilikanyiheke ni  atthu akina ni muhiwehexexeke itthu muhiniwerya anyu opaka. Yehova khonlipelela wiira mpakeke itthu muhiniwerya anyu. (Esal. 103:13, 14) Nyuwo khamurina nthowa vakhala wiira mutthu owiirihani etthu yoohiloka! Masi muupuweleke wiira Yehova onimwaaphukela ale aniwiirela akhwaaya itthu sootakhala ni onimwaakhaliherya ale anipuheriwa. (1Ped. 3:12) Sandra, yoowo aathokoreriwa mwa enamuna yootakhala ni anamuyari awe okathi aari awe mwaana, onihimya so: “Kinninvekela Yehova wiira okikhaliherye oweha mikhalelo sooloka kirina aka yena oniweha awe”.

7. Ninrowa orumeela sai itthu siniiranenle mookumini mwahu wiira naakhaliherye atthu akina?

⁷ Muhiliyale wiira Yehova pooti woorumeelani wiira mwaakhaliherye atthu akina. Owo ohoovahani eparakha wiira nvareke hoothe muteko woolaleerya. (1aKor. 3:9) Mwaha wa itthu sooxankiha siwiiranenleni, pooti wookhweelani wiiwexexa aahiiso osuwela moonelo wa atthu akina, yaawo sinaaphwanya mixankiho. Munoowerya opaka itthu sinceene wiira mwaakhaliherye. Helen, yoowo nimulavunle ahu ittima sivinre, okhaliheriwaka ni Yehova vamosa ni anna ni arokora, vano oolakela waakhaliherya atthu akina. Owo onihimya so: “Miyo nkaivaha efaita, masi Yehova ookikhaliherya woona wiira onnikivaha efaita. Olelo-va, owo onnikirumeela wiira kaakhaliheryeke atthu akina”. Vano Helen, onnihakalala ni onirumeela ntoko pioneera ookilaatheya.

YEHOVA ONIPHAVELA WIIRA NIKUPALIKI WIIRA OONILEVELELA

8. Yooleiherya xeeni ya Yehova eri Yesaya 1:18?

⁸ Arumeyi anceene a Yehova, annixanka mwaha wa itthu soohiloka yaapanke aya khalai ahinatthi opatisiwa aahiiso nuumala opatisiwa. Masi ti vooloka wuupuwela wiira Yehova oovaha yoowoopola mwaha wa oniphenta wawe. Nto owo oniphavela wiira neemereryeke nikhaliheryo nawe. Nave oniphavela wiira neemereryeke yoovaha eyo. Yehova onninimaaliha wiira nuumala ‘ovaanela ni yena’ c owo khonuupuwela soottheka sahu. (Mmusome Yesaya 1:18.) Ninnimuxukhurela Tiithi ahu oophenta Yehova mwaha wa onilevelela soottheka sahu! Okathi omosa-ru, owo onihimya wiira khonrowa oliyala miteko sooreera nninvarela ahu. — Esal. 103:9, 12; aHeeb. 6:10.

9. Xeeni nihinreerela ahu wuupuwelela itampi naapanke ahu khalai?

⁹ Vakhala wiira munniriipiwa murima mwaha wa itthu soohiloka mwaapanke anyu khalai, mwiimananiheke wuupuwelela itthu muniwerya anyu opaka niinaano-va ni itthu munrowa anyu opaka muhoolo. Nrowe nthokorerye ntakiheryo na murummwa Paulo. Owo aaniriipiwa murima mwaha wa waalupattha makristau, hata vari siiso aanikupali wiira Yehova ammulevelela. (1Tim. 1:12-15) Niireke Paulo aanuupuwela soottheka aapanke awe khalai? Moohaanyiherya, aanisyaka opaka eyo. Owo khaaviriha okathi uupuwelelaka itthu sootheene aapanke awe okathi aari awe nfarisi oottittimihiwa. (aFil. 3:4-8, 13-15) Ohiya-vo, Paulo aanikhalela nthiti muteko woolaleerya ni khuupuwela itthu sa khalai. Sintoko Paulo, hiyo khaninwerya olokiherya itthu soohiloka nipanke ahu khalai. Masi nnoowerya onvuwiha Yehova ni makhalelo ahu a vano, nuupuwelelaka itthu sooreera onileihenrye awe muhoolo.

10. Nipakeke exeeni vakhala wiira khalai, naahipaka itthu saakumihenrye mixankiho atthu akina?

¹⁰ Pooti wiira munniriipiwa murima mwaha wa itthu soohiloka mwaapanke anyu khalai, seiyo saakumihenrye mixankiho atthu akina. Exeeni enrowa wookhaliheryani? Mwiimananiheke  opaka ele muniwerya anyu wiira muhitthikele opaka itthu mwaapanke anyu khalai. Ohiya-vo, mwaaleeleke ni owooniherya wiira moottharuwa. (2aKor. 7:11) Munvekeleke Yehova wiira aakhaliheryeke atthu ale mwaakumihenrye anyu mixankiho. Owo onimookhaliheryani nyuwo ni atthu ale mwaakumihenrye anyu mixankiho ovilela ni okhalana murettele.

11. Exeeni nnixutta ahu ni ntakiheryo na profeta Yona? (Nwehe vakaapani.)

¹¹ Mwiixutteke etthu ni soovonya sanyu sa khalai ni mweemereryeke wiira Yehova oorumeelekeni mwa enamuna oniphavela awe. Muthokorerye ntakiheryo na profeta Yona. Ohiya orowa oNiinive weiwo Yehova aamurumme awe, Yona aahitthyawela muttetthe mukina. Yehova aahimuttharuxa Yona nave owo aahiixutta etthu ni soottheka sawe. (Yoona 1:1-4, 15-17; 2:7-10) Yehova khaamunyanyanle Yona. Yehova aahinvaha eparakha ekina ya orowa oNiinive, nto ekwaha ela aaheemererya. Owo kheemerenrye wiira soovonya sawe sa khalai simukhoottiherye omaleliha yoothanleliwa awe ele esya. — Yoona 3:1-3.

YEHOVA ONNINIVAHA MUNEPA WOOWARYA WIIRA ONIMAALIHE

12. Okathi sinniphwanya aya mixankiho, Yehova onnivaha sai murettele? (aFilipi 4:6, 7)

¹² Yehova onnirumeela munepa awe woowaarya, wiira onimaalihe okathi enikhumelela aya etthu yooriipiha murima. Nrowe nthokorerye yoowiiraneya ya Ron ni Carol. Nuumala mwanaya wiihopha, awo ahimmye so: “Saahiniphwanya sooweha sinceene masi ola waahitepa. Nuumala-vo, naahiphwanya murettele onihimmwa aFilipi 4:6, 7”. (Mmusome.) Akhala wiira sinnoophwanyani mixankiho, mmutthukulele murima anyu Yehova munvekelaka ikwaha sinceene ni okathi muniphavela anyu. (Esal. 86:3; 88:1) Munvekeleke Yehova voohihiyererya wiira oovaheeni munepa awe woowaarya. Khula okathi owo onimookhaliheryani. — Luka 11:9-13.

13. Munepa woowaarya onrowa onikhaliherya sai ohihiya omurumeela Yehova? (aEefeso 3:16)

¹³ Niireke ookhala muxankiho onookhulumulani? Munepa woowaarya pooti woovahani ikuru munipirisari anyu wiira muhihiye omurumeela Yehova moororomeleya. (Mmusome aEefeso 3:16.) Nrowe nthokorerye yoowiiraneya ya murokora oniitthaniwa Flora. Owo ni iyawe yaarumeela ntoko mamisionaario, nto nuumala iyawe omuraruwela, awo yaahimwalana. Flora onihimya so: “Kaahiriipiwa murima vanceene mwaha wa oraruweliwa iwe, nto mwaha waivaavo nkaareere okhulumuwa. Kaahinvekela Yehova wiira okivahe munepa awe woowaarya wiira kiwerye ovilela. Wanipacerya kuupuwela wiira nkaarowa ovilela masi kikhaliheriwaka ni Yehova, koowerya ovilela muxankiho ole”. Flora ohoona wiira Yehova oomukhaliherya, ni onnikupali wiira onoomukhaliheryaka wa khula muxankiho onrowa omphwanya. Owo onincererya oriki: “Masu ari Esaalimu 119:32 anikihimya miyo, yaawo ani: ‘Kinootthara sooruma sanyu ni murima aka wootheene, okhala wiira mookikhaliherya osuwela saana sooruma iyo’”.

14. Etthu xeeni nikhanle ahu oopaka wiira nihihiye waakhela munepa wa Yehova?

¹⁴ Exeeni mukhanle anyu oopaka akhala wiira monvekela Yehova wiira oovaheeni munepa awe woowaarya? Mpakeke itthu sinrowa wookhaliheryani ohihiya waakhela munepa awe woowaarya. Eyo enihela muhina orowela mithukumano ni olaleerya. Khula nihiku mmusomeke Biibiliya wiira mukhalaneke miyuupuwelo sa Yehova. (aFil. 4:8, 9) Okathi munisoma anyu, mulepeke inoota mphwanyale anyu sa atthu aniromoliwa mbiibiliyani yaawo saaphwannye mixankiho ni muupuweleleke moota Yehova aakhalihenrye awe. Sandra, yoowo nimulavunle ahu ittima  sivinre, saahimphwanya mixankiho suulupale. Owo onihimya so: “Yoowiiraneya ya Yosefe, khereere okivara murima. Okhala wiira, owo kheemerenrye wiira mixankiho, sivukule waataana wawe ni Yehova”. — Maph. 39:21-23.

YEHOVA ONNAARUMEELA ANNA NI AROKORA WIIRA ANIMAALIHE

15. Yehova onaarumeela sai anna ni arokora wiira onikhaliherye? (Nwehe efootu.)

¹⁵ Okathi sinniphwanya aya mixankiho, anna ni arokora ‘anninlipiha vanceene’. (aKol. 4:11) Yehova onnaarumeela anna ni arokora wiira onooniherye niphento nawe. Awo pooti onimaaliha avirihaka okathi ari ene ni hiyo, ni onimaaliha okathi nnaaleela ahu mixankiho sahu. Awo pooti osoma yoolepa emosa ya mbiibiliyani aahiiso ovekela ni hiyo. d (aRom. 15:4) Ikwaha sikina, munna aahiiso murokora pooti onuupuxerya moonelo wa Yehova voohimya sa mwaha owo. Nto eyo pooti onikhaliherya ovilela. Anna ni arokora pooti onikhaliherya anivahaka itthu sinnithowa.

16. Etthu xeeni nikhanle ahu oopaka wiira atthu akina anikhaliherye?

¹⁶ Ikwaha sikina, vannireerela waavekela nikhaliheryo anna ni arokora, awo anniniphenta ni anniphavela onikhaliherya. (Mir. 17:17) Masi ikwaha sikina, awo pooti ohisuwela itthu sinnixankiha ni nimpirisari ahu. (Mir. 14:10)  Mwakhalana muxankiho, mukhaleke ootaphuwa waaleela apatthani anyu arina waamini woolipa. Mwaaleeleke etthu ekhanle aya oopaka wiira yookhaliheryeni. Nyuwo pooti olavula ni mutokweene mmosa aahiiso anli yaawo ari apatthani anyu. Arokora akina annikhala ootaphuwa vaavo anlavula aya ni arokora akina arina waamini woolipa.

17. Itthu xeeni sikhanle onikhoottiherya okhaliheriwa ni atthu akina, nave ninrowa oxintta sai?

¹⁷ Musyakeke oviriha okathi munceene muri ene mekhinyu. Mwaha wa mixankiho, ikwaha sikina pooti ohiphavelaka olavula ni atthu akina. Anna ni arokora pooti ohisuwela etthu ennixankiha, aahiiso olavula moolumo anniwereya. (Yak. 3:2) Tivonto, nviriheke okathi muri ene ni anna ni arokora, okhala wiira Yehova pooti waarumeela wiira yoolipiheni. Mutokweene mmosa oniitthaniwa Gavin yoowo orina eretta ya mmuupuweloni onihimya so: “Ikwaha sikina, nkiniphavela olavula ni oviriha okathi kiryeene ni apatthani akina”. Nnaamwi vari siiso, Gavin onniimananiha oviriha okathi ori ene ni anna ni arokora ni okathi onipaka awe eyo, onnikhala saana. Murokora mmosa oniitthaniwa Amy, onihimya so: “Itthu sikiiranenle mookumini mwaka, sinnikiiriha ohaaroromela atthu akina. Masi kinniimananiha waaphenta ni waaroromela anna ni arokora ntoko Yehova. Nave kinnisuwela wiira eyo ennimuhakalaliha Yehova, ni miyo kinnihakalala”.

SOOLEIHERYA SA YEHOVA SINNINIMAALIHA

18. Exeeni ninlipelela ahu muhoolo, ni exeeni ninreerela ahu opaka nenna-va?

¹⁸ Nihaana ororomela wiira Yehova, muhoolo onoomaliha mixankiho sahu sootheene. (Wiis. 21:3, 4) Okathi owo, itthu sootheene siniiranenle mookumini mwahu, “sinoliyaliwa khuluwi”. (Yes. 65:17) Ntoko niwenhe ahu, Yehova “onnitthukwa makhwatta” ahu mpakha olelo-va. Yehova onnirumeela inamuna soovirikana wiira onikhaliherye ni onimaaliha. Tivonto, mwiimananiheke weemererya nikhaliheryo nawe. Muhikhalakhale muliyalaka wiira “owo onnokhapelelani”. — 1Ped. 5:7.