Vakhanle wira ookhala mutthu muniphavela anyu omusuwela saana, tthiri vaarowa okhala va miruku osuwela toko itthu sinimusivela mutthu owo ni mixankiho owenrye awe oxintta. Moolikanasa, akhala wira muniphavela omusuwela saana Muluku, muhaana osuwela itthu opanke awe. Vaavo munipaka anyu eyo, nave munoosuwela moota itthu opanke awe khalai sinniphwanyiha aya mureerelo olelo ni muhoolo.

Yehova Muluku, Mpattuxa Muulupale, nto “atthu anniwerya osuwela makhalelo ahinòneya a Muluku, hatá owerya wawe n’oMuluku awe wohimala, yonaka n’utthokelela itthu sipattuxalyawe”. (aRoma 1:20) Apwiya Muluku “àpattuxa elapo ya vathí n’uwerya waya, àpattuxa olumwenku n’usuwela waya, ahatala erimu ni miruku saya’’. (Yeremiya 10:12) Itthu Muluku opanke awe sinooniherya wira owo onninithokorerya.

Nkahaya muupuwele moota Yehova onipattunxe awe mwa enamuna ya vameekhaaya maana onipattunxe “aìlikanyihaka mmansawe”. (Maphattuwelo 1:27) Eyo entaphulela wira yena ohiiriha wira vaweryaneyeke hiyo wooniherya mikhalelo sawe sa vameekha aya mwa enamuna yaamukhaani. Mpattuxa ahu onipanke wira niweryeke wiiwexexa itthu sa omunepani aahiiso osuwela miruku sawe. Vaavo nneettela ahu itthu iyo, ninnikhalana okumi wooloka ni woohakalaliha. Ohiya-vo, owo oonivaha ikuru wira niweryeke olipiha waataana wahu ni yena.

Makhalelo a elapo annooniherya moota Muluku onnithokorerya awe. Murummwa Paulo aalempe so: Muluku ‘onninoniherya mahiku othene orera wawe murima, onirelaka sorera: tthirí osulu oryawe, onninirupihela epula, onninivaha sohepha okathi aya, onniniruweriha solya, onninisariha otteliwa murima’. (Miteko 14:17) Muluku onninivaha itthu sinceene ohiya paahi iye nintthuneya ahu okhalana wira nivikanihe okhala akumi. Owo onninivaha itthu sinceene soohakalaliha wira nipuheke okumi. Masi sihaavo-tho itthu sikina sinceene Muluku oniphavela awe wira nikhalane.

 Yehova opattunxe elapo wira ekhaliweke ni apinaatamu mwa mahiku otheene. Biibiliya onihimya so: “Elapo, Apwiya ahàvaha atthu”, nave “Apwiya Muluku apattunxe elapo, yupaka n’ulipiha, yawo yahapattunxe elapo ehirina etthu, masi yupale wira ekhaleke-mo atthu”. (Esalimo 115:16; Yesaya 45:18) Nto ekhaliweke ni atthu a mukhalelo xeeni ni iyaakha ikavi? Biibiliya onaakhula so: “Anaxariya animwakhela elapo yohiyeriw’aya: anrowa okhalaka-mo mahiku othene”.​—Esalimo 37:29.

Moovarihana ni yoolakela eyo, Yehova aahimpaka mulopwana ni muthiyana oopacerya Adamu ni Eva ni aahaapweha oParayiisu valaponi wira “alimeke, [ni] asukeke”. (Maphattuwelo 2:8, 15) Muluku aahaavaha muritti wa vameekha aya. Owo aalenle so: “Mwayareke an’inyu, munjerereyeke: musareyeke mulaponi mothene. Mwettiheke elapo yothene”. (Maphattuwelo 1:28) Adamu ni Eva yaahikhalana yoolipelela ya okhalana ekumi ehinimala valaponi. Mooriipiha murima, awo yaahithanla ohimwiiwelela Muluku ni yaahipweteiwa yoolipelela ya okhala ni “anaxariya” yaawo anrowa ‘waakhela elapo’. Sintoko ninrowa ahu oweha, ohiiwelela waya khiwaaturunke yoolakela ya Yehova. Nrowe toko nithokorerye etthu Muluku opanke awe.

Biibiliya onnisuweliwa okhala Nuulumo na Muluku. Xeeni Yehova onivanhe awe Biibiliya? Yoopacerya, mwaha woowi owo oniphavela wira nimusuwele. (Miruku 2:1-5) Ekeekhai wira Biibiliya khonaakhula makoho otheene voohimya sa Muluku, nave khiivo eliivuru eniwerya opaka eyo. (Musuweli 3:11) Masi hata vari siiso, itthu sotheene siri mBiibiliyani sinninikhaliherya omusuwela Muluku. Ninniweha moota Muluku onaathokorerya awe apinaatamu. Ninnisuwela mweettelo onimusivela ni ohinimusivela. (Esalimo 15:1-5) Nihiixutta moonelo awe voohimya sa okokhorela, mweettelo wooloka, ni mihakhu. Nimurumeelaka Biibiliya ni oweha itthu aapanke awe Yesu Kristu yoowo ori Mwaana a Muluku, ninniwerya osuwela mikhalelo sikina sa Yehova.​—Yohani 14:9.

Nthowa nikina nimwiirinhe Yehova okumiherya Nuulumo nawe, Biibiliya mwaha woowi Yena oniphavela wira nisuweleke moota wookhalana ekumi yoohakalaliha, ni etthu emwiirinhe Muluku onipattuxa. Omurumeelaka Biibiliya, Yehova onninleela moota woophwanya ohakalala mookumini, ni ovilela mixankiho. Ntoko etthokiheriwe aya ni erevista ela, Biibiliya onnaakhula makoho ootthuneya a mookumi sintoko ala: Xeeni atthu anihaawa aya? Muhoolo okumi onrowa okhala sai? Nave Biibiliya onnihimya etthu Muluku opanke awe wira itthu aalakenle awe okhuma khalai siiraneye.

Vekeekhai Biibiliya eliivuru yoovirikana ni iliivuru sikina, maana mwaneene Biibiliya ti Muluku. Biibiliya ovirinhe iyaakha 1.600 olempwaka ni atthu 40, masi hata vari siiso owo onittittimiherya mwaha mmosa paahi, okhala wira Uupuxeriwe ni Muluku. (2 Timótheyo 3:16) Moovirikana ni iliivuru sikina sa khalai, Biibiliya aahikhapeleliwa wala osukiwa saana sintoko sinooniherya aya iliivuru sinceene sa khalai sa Biibiliya. Ohiya-vo, Biibiliya nlelo khoturukeyale nnaamwi yaakhanle atthu akina yaamananinhe omukhoottiha otaphuleliwa, okaiwa, ni osommwa. Olelo-va, Biibiliya eliivuru yootepexa wuulaana ni otaphuleliwa mwa mattaava manceene. Moota Biibiliya owenrye awe ophiya mahiku ahu ala, onooniherya wira “masu a Muluku ahu annikhala mahiku othene”.​—Yesaya 40:8.

Etthu ekina yooreerexa Muluku opanke awe ti onilipiherya wira yoolakela awe ni apinaatamu enimwiiraneya. Veekeekhai, Muluku aaphavela wira apinaatamu ekhaleke valaponi mwa okathi wotheene. Masi vaavo Adamu yaathanlale aya ohimwiiwelela, ni omutthekela, yaahiyeleela wala opweteiwa eparakha ya okhalana ekumi ehinimala, awo ni osulu aya yoowo waarowa okhumelela muhoolo. “Mutthu mmosá pahi t’oruhale etampi mulaponi: etamp’iyo yoruha okhwa. Siso okhwa ohaphwanya atthu othene, okhala wira atthu othene àttheka”. (aRoma 5:12) Okhala wira Adamu khiyaamwiiwelenle Muluku vaakhala ntoko wira yoolakela ya Muluku aahiturukeya. Nto Muluku apanke exeeni?

Muluku aahipaka etthu moovarihana ni mikhalelo sawe. Owo aahaahukhumu Adamu ni Eva mwaha wa ohiiwelela waya, masi moophenta aahipaka mareheryo wira osuulu aya ophwanye ekumi yooloka muhoolo. Okhala wira owo Muluku a miruku,  aahisuwela etthu yoopaka nave moohipisa aahihimya moota aarowa awe ophuka muxankiho ole. (Maphattuwelo 3:15) Etampi iyo ni okhwa yaarowa omalihiwa orweela wa Mwaana a Muluku eyo piiyo Yesu Kristu. Exeeni yaahela muhina?

Wira owoopole apinaatamu mwaha wa sookumiherya sa ohiiwelela wa Adamu, Yehova aahimuruma Yesu orwa valaponi wira owiixuttihe atthu moota wookhala, “n’uleva ekumi awe, wira awopole atthu othene”. * (Matheyo 20:28; Yohani 14:6) Yesu paahi taawerya owoopola apinaatamu maana owo aari mutthu oomalela sintoko Adamu. Masi moovirikana ni Adamu, Yesu aahimwiiwelela Muluku mpakha okhwa wawe. Okhala wira Yesu khaaphwanelela okhwa, Yehova aahimuhihimuxa ni aahimuttikiherya wiirimu. Yesu aahipaka etthu Adamu yahaawenrye aya, eyo piiyo, waavaha apinaatamu oowiiwelela yoolipelela ya okhala mahiku otheene. “Ntoko ohìwelela wa mutthu mmosá wakhalihalyaya anatampi atthu othene, siso-tho wiwelela wa mutthu mmosá onnakhaliha anaxariya atthu yawo othene”. (aRoma 5:19) Orumeelaka mukuttho wa Yesu, Muluku onimwaakhwaniherya yooleiherya awe ya apinaatamu okhalaka valaponi mahiku otheene.

Nihiixutta voohimya sa etthu Muluku opanke awe wira ophuke mixankiho sikumiheriwe ni ohiiwelela wa Adamu. Nooweha wira khiivo etthu eniwerya omukhoottiherya Yehova waakhwaniherya itthu oniphavela awe opaka okhuma woopaceryani. Nave nooweha wira moolumo awe anniiraneya tthiri. (Yesaya 55:11) Nooweha-tho wira Yehova onniniphenta vanceene. “Mota Muluku ònihenryawe oniphenta wawe t’ula: Owo òmuruma Mwan’awe mmosene orwa vathí-va, wira hiyo nikhalane ekumi mwa yowo. Vano, ophenta ti nno: khanihiyó hiyo nimphentale Muluku, nto yowo t’oniphentale, khumuruma Mwan’awe ntoko mukuttho w’olivela itampi sahu”.​—1 Yohani 4:9, 10.

Muluku “khanronyihenrye Mwan’awe, masi òmuleva wira anikhwele hiyo othene: vano onrowa ohinivaha sai itthu sothene vamosá ni yowo”. (aRoma 8:32) Etthu xeeni Muluku onileihenrye awe? Musome mwaha onittharelana.