1-2. a) Yehova oniwoonela sai ale anipaka etampi yuulupale ahinaphavela orukunuxa murima? b) Yehova onilipelela wiira atthu apakeke xeeni?

 YEHOVA khoneemererya itthu sootheene. Owo onninyokha etampi. (Esal. 5:4-6) Owo onilipelela wiira ootheene ahu niiweleleke malamulo awe, yaawo ari mbiibiliyani. Masi, Yehova onnisuwela wiira ootheene ahu noorava etampi ni khanniwerya omwiiwelela mwa enamuna yoomalela. (Esal. 130:3, 4) Yehova khanimusivela atthu yaale ‘ahinimuttittimiha ni anitthara mweettelo woohiloka onooniherya ohuuliwa muru, yoothereryaka oreera murima wuulupale wa Muluku’. (Yuda 4) Mweekeekhai, Biibiliya onnilavula sa “opwetexiwa atthu ootakhala”, okathi enrowa aya owaniwaka ekhotto ya Muluku eniihaniwa Armagedoni. — 2 Ped. 3:7; Wiis. 16:16.

² Masi Yehova khoniphavela wiira opwetexiwe mutthu. Ntoko noonale ahu erevista yeela, Biibiliya onnihimya oratteene wiira Yehova “oniphavela wira atthu otheene arukunuxe murima”. (2 Ped. 3:9) Ntoko Yehova, axitokweene annipixa murima okathi animukhaliherya aya mutthu opanke etampi yuulupale, wiira orukunuxe murima awe ni otthikele waataana ni Yehova. Masi, ikwaha sikina ale apanke etampi yuulupale, khaniphavela orukunuxa murima aya. (Yes. 6:9) Atthu akina annithipelela opaka itthu sootakhala, nnaamwi axitokweene yiimananihaka  waakhaliherya ikwaha sinceene. Akhala wiira mutthu owo onniira siiso, axitokweene anrowa opaka exeeni?

“MMUKUMIHE MMULOKONI MUTTHU OWO ONIPAKA ITTHU SOOTAKHALA”

 3. a) Etthu xeeni Biibiliya onihimya awe wiira yiirihiweke ale apanke etampi ahinaphavela ottharuwa? b) Okathi mutthu ohiniphavela awe orukunuxa murima, xeeni nnihimya ahu wiira owo tothanlale okumihiwa mmulokoni?

³ Okathi mutthu onipaka etampi onikhootta awe orukunuxa murima, axitokweene aahaana otthara malakiheryo aniphwanyaneya 1 aKorinto 5:13, yaawo ani: “Mmukumihe mmulokoni mutthu owo onipaka itthu sootakhala”. Ohimya ekeekhai, mutthu owo tothanlale okumihiwa mmulokoni. Owo onihepha etthu aalale awe mmansawe. (aKal. 6:7) Xeeni nnihimya ahu siiso? Mwaha woowi, owo ookhootta okathi axitokweene yiimananiha aya ikwaha sinceene wiira amukhaliherye orukunuxa murima awe. (2 Mam. 17:12-15) Miteko sawe sinnooniherya wiira owo khoniphavela wiiwelela sooruma sa Yehova. — Otum. 30:19, 20.

 4. Xeeni onilaleiwa aya mmulokoni okathi onikumihiwa awe mutthu opanke etampi yuulupale, ohinattharuwa?

⁴ Okathi mutthu ohiniphavela awe orukunuxa murima awe ni onikumihiwa awe mmulokoni, vannilaleiwa mmulokoni wiira mutthu owo khahiyo-tho Namoona a Yehova. Masi khahiyo vanilaleiwa wiira mutthu owo uulihihiwe muru. Ohiya-vo, vanilaleiwa wiira atthu a mmulokoni aweryeke otthara malakiheryo ani: “Muhiye waataana” ni mutthu owo “nnakhala muhilyeeke ni mutthu owo”. (1 aKor. 5:9-11) Aakhala mathowa ooloka amwiirinhe Yehova ohimya eyo. Murummwa Paulo aalempe wiira: “Eferemento vakhaani enniiriha otthu wotheene wooweetheiwa opuhuwa”. (1 aKor. 5:6) Akhala wiira natampi ohiniphavela orukunuxa murima khonikumihiwa mmulokoni, atthu akina a mmulokoni pooti wuupuwelaka wiira khivanipirisari wiiwelela sooruma sa Yehova. — Mir. 13:20; 1 aKor. 15:33.

 5. Nimooneleke sai mutthu okumihiwe mmulokoni? Ni mwaha wa xeeni?

⁵ Okathi munna aahiiso murokora onikumihiwa awe mmulokoni, hiyo nimooneleke sai? Nnaamwi nihirowaka oviriha okathi ni mutthu owo, hiyo nihaana omoonaka ntoko epwittipwitthi erimenle, ohiya ntoko mutthu ohirina nlipelelo. Epwittipwitthi erimenle munikotoni mwaya, pooti ohokolowa. Muupuweleke wiira mutthu owo ohiivahererya wa Yehova. Mooriipiha murima, nenla-va, mutthu owo khonikhala mwa enamuna enimuhakalaliha Yehova. Nto eyo etthu yoowoopiha. (Ezek. 18:31) Masi hiyo ninnilipelela wiira mutthu owo onoorukunuxa murima awe, vakhala wiira Yehova nlelo onommorelaka ikharari. Nto axitokweene anrowa omukhaliherya sai mutthu opanke etampi yuulupale ni okumihiwa mmulokoni?

MOOTA AXITOKWEENE ANAAKHALIHERYA AYA ALE AKUMIHIWE MMULOKONI

 6. Etthu xeeni axitokweene akhanle aya oopaka wiira yaakhaliherye ale akumihiwe mmulokoni?

⁶ Niireke wiira okathi mutthu onikumihiwa awe mmulokoni, axitokweene annihiya weererya omukhaliherya mutthu owo omutthikela Yehova? Nnaari! Okathi ekomisau ya axitokweene enimuhimeerya aya mutthu wiira onookumihiwa mmulokoni, nave-tho ennimuleela mutthu owo etthu okhanle awe oopaka wiira otthikele mmulokoni. Masi axitokweene awo annipaka-tho etthu ekina. Ikwaha sinceene, anoomuleela mutthu owo wiira anoophavelaka othukumana-tho nuuwo nuuvira miyeeri vakhaani, wiira awehe vakhala wiira mutthu ole ooturuka mweettelo awe. Nto vakhala wiira mutthu owo onimweemererya othukumana ni axitokweene, awo animweererya omutumererya wiira orukunuxe murima ni omutthikele Yehova. Hata ekwaha eyo mutthu  owo ohooniheryaka wiira oorukunuxa murima, axitokweene animweererya otthikela-tho okumana nuuwo ekwaha ekina wiira amutumererye orukunuxa murima awe.

 7. Okathi mutthu onikumihiwa awe mmulokoni, axitokweene animutakiha sai Yehova moota oniwoonela awe othunku atthu? (Yeremiya 3:12)

⁷ Axitokweene annimutakiha Yehova, yoowo oniwoonela othunku atthu akumihiwe mmulokoni. Mwa ntakiheryo, khalai Yehova khaalipelenle wiira atthu awe, aisarayeli, apacerye toko orukunuxa murima, ohaleke aakhaliheryaka. Ohiya-vo, owo taapacenrye opaka etthu, aaroihelaka maprofeta awe, hata aisarayeli awo nlelo yahaarukununxe murima. Ntoko noonale ahu mwaha wa nenli wa erevista yeela, Yehova aahimuleela Hoseya wiira omulevelele mwaarawe ni omukuxe, nnaamwi owo nlelo aapaka etampi. Siiso, Yehova aahiwiixuttiha atthu awe wiira yena onnoona othunku vanceene. (Hos. 3:1; Mal. 3:7) Amutakihaka Yehova, axitokweene a mmulokoni anniphavela wiira mutthu opanke etampi yuulupale orukunuxe murima ni otthikele mmulokoni. Nave awo, khanipaka itthu saarowa omooceeliha mutthu ole otthenke orukunuxa murima awe ni otthikela mmulokoni. — Mmusome Yeremiya 3:12.

 8. Moota xeeni ntakiheryo na mwaana aarimenle, ninnikhaliherya aya osuwela oratteene omoriwa ikharari wa Yehova? (Luka 15:7)

⁸ Niireke munnuupuwela nlikanyiho na mwaana aarimenle nenlo nithokoreriwe mwaha wa nenli wa erevista yeela? Okathi paapa anweha awe mwanawe otthikelaka owaani, owo ‘aahimutthimakela omukhupaarela onanvaha epeexo mwanawe’. (Luka 15:20) Moone wiira paapa ole khaalipelenle wiira mwanawe opacerye toko omuxonttela wiira omulevelele. Masi paapa ole aahimutthimakela mwanawe okhala wiira aanimphenta. Axitokweene anniwooniherya mukhalelo mmosa-ru ale ahiyale omurumeela Yehova. Awo aniphavela wiira epwittipwitthi eyo erimenle, etthikele owaani. (Luka 15:22-24, 32) Okathi mutthu onitthikela awe mmulokoni, Yehova, Yesu, malaikha ni muloko wootheene, annihakalala! — Mmusome Luka 15:7.

 9. Etthu xeeni Yehova onaatumererya awe ale apanke etampi?

⁹ Mpakha-va, nooweha wiira Yehova khoneemererya wiira ale ahiniphavela ottharuwa itampi saya, akhaleke mmulokoni. Masi, owo nlelo onneererya waakhaliherya. Oniphavela wiira awo atthike. Noone moota Yehova oniwoonela awe ale anirukunuxa murima aya. Hoseya 14:4 onihimya so: ‘Miyo kinimwattikiherya atthu aka wa miyo: kinimwaphenta ni murim’aka wothene. Nkinaviruwela-tho’. Osuwela moota Yehova oniwoonela awe ale anirukunuxa murima, onimwaakhaliherya axitokweene oweha itthu sinooniherya wiira mutthu owo oopacerya orukunuxa murima. Moolumo ala animwaalipiha ale ahiyale omurumeela Yehova, wiira nlelo onnaaphenta ni oniphavela wiira amuhokolowele.

10-11. Axitokweene anrowa waakhaliherya sai atthu yaale akumihiwe mmulokoni khalai?

¹⁰ Axitokweene anrowa waakhaliherya sai ale akumihiwe mmulokoni khalai, woonasa wene sivira iyaakha sinceene? Pooti wiiraka atthu awo aahiya ovara etampi yaawiirinhe okumihiwa mmulokoni. Aahiiso pooti wiira khanuupuwela etthu yaawiirinhe okumihiwa. Nnaamwi sivinre iyaakha sinceene atthu awo akumihiwe ene aahiiso nnaari, axitokweene animweererya waaphwanya atthu awo ni waaxukurya. Okathi anaaxukurya aya, axitokweene anoovekela naawo ni animwaatumererya wiira atthikele mmulokoni. Akhala wiira soovira iyaakha sinceene mutthu owo okumihiwe ene mmulokoni, woonasa wene mutthu owo onoopirisari osomihiwa-tho Biibiliya. Nto akhala wiira mutthu owo onniphavela-tho otthikela mmulokoni, axitokweene anoomwaavya mutthu wiira  omusomiheke Biibiliya, hata nlelo ohittikiheriwe mmulokoni. Ikwaha sootheene, axitokweene tanrowa opakaka mareheryo wiira mutthu owo osomihiweke Biibiliya.

¹¹ Axitokweene anneererya otakiha ophenta wa Yehova. Tivonto, awo anoowaavyaka ale ahiyale omurumeela Yehova ni animwaatumereryaka otthikela wa yena. Okathi mutthu opanke etampi onooniherya awe wiira ooturuka muupuwelo awe ni mweettelo awe, pooti ottikiheriwa mmulokoni moohipisa. — 2 aKor. 2:6-8.

12. a) Ikwaha xeeni axitokweene anireerela aya okhalana ephoole? b) Xeeni vahinreerela ahu wuupuwela wiira atthu akina khakhanle ooleveleliwa ni Yehova? (Nwehe enoota.)

¹² Ikwaha sikina axitokweene ahaana okhalana ephoole, ahinatthi omuttikiherya mutthu mmulokoni. Mwa ntakiheryo, akhala wiira mutthu owo omutuphenle mwaana, namavirikanya  aahiiso ompanke palano wiira omalihe ekasamento ahikhanle mathowa, axitokweene ahaana osuwela saana akhala wiira mutthu owo, oorukunuxa murima awe tthiri. (Mal. 2:14; 2 Tim. 3:6) Axitokweene ahaana waakhapelela anna ni arokora a mmulokoni. Masi nihaana osuwela wiira Yehova onoomweemererya khula mutthu opanke etampi, ottharuwa ni murima wootheene ni ohiyale mweettelo awe wootakhala. Nnaamwi axitokweene apirisariki okhalana ephoole ni atthu yaale yaawonke akhwaaya, awo ahuupuweleke wiira Yehova khonikhala-khala aamorelaka ikharari atthu siiso. a — 1 Ped. 2:10.

ETTHU MULOKO OKHANLE AYA OOPAKA

13. Nnaathokorerya sai atthu apwapweliwe? Nave nnaathokorerya sai atthu akumihiwe mmulokoni?

¹³ Ntoko noonale ahu mwaha ovinre, okathi onilaleiwa aya mmulokoni wiira mutthu mmosa oopwapweliwa, hiyo pooti oviriha okathi ni mutthu owo, maana noosuwela wiira owo oorukunuxa murima awe ni oottharuwa mweettelo awe woohiloka. (1 Tim. 5:20) Mutthu owo nlelo onniirela mpantta muloko ni onipirisari okhaliheriwa ni anna ni arokora wiira ohihiye opaka itthu sooreera. (aHeeb. 10:24, 25) Masi eyo ennivirikana ni mutthu onikumihiwa mmulokoni. Hiyo ‘ninnihiya weetta’ ni mutthu owo, ‘nnakhala khaninlya ni mutthu owo’. — 1 aKor. 5:11.

14. Nilavulaka sa mutthu okumihiwe mmulokoni onirweela mithukumano, etthu xeeni khula mukristau okhanle awe oothanla? (Nwehe efootu.)

¹⁴ Niireke moolumo ari 1 aKorinto 5:11, anitaphulela wiira nihaana omuthanya mutthu okumihiwe mmulokoni? Nnaari. Hiyo khaninrowa ovirihaka okathi ni mutthu owo. Masi akhala wiira mutthu owo mmusi ahu aahiiso aari mpatthani ahu, ohinatthi okumihiwa mmulokoni, hiyo pooti omulattula orowela mithukumano. Nto akhala wiira mutthu owo onoorowela mithukumano, ninrowa omuthokoreryaka sai? Khalai, hiyo khinaamulavuliha mutthu owo nnakhala omukoha ihaali, hata ori ene mmusi ahu wala mutthu naamusuwela  ahu. Vano, mukristau pooti orumeela murima awe wiixuttihiwe ni Biibiliya wiira osuwele etthu onrowa awe othanla. Akina pooti ophavela omukoha ihaali, aahiiso omwaakhela omuthukumanoni. Masi hiyo khaninrowa ovaanelaka ni mutthu owo nnakhala oviriha okathi nuuwo.

15. Atthu xeeni anihimmwa 2 Yohani 9-11? (Nwehe ekaaxa eni: “ Niireke Murummwa Yohani ni Paulo Yaahimya Etampi Emosa-ru?”)

¹⁵ Akina pooti wiikoha so: ‘Kiira Biibiliya onihimya wiira mukristau onimukoha ihaali mutthu siiso, onnikhaliherya miteko sawe sootakhala?’ (Mmusome 2 Yohani 9-11.) Mpantta ola wa mbiibiliyani, onooniherya wiira anihimmwa anamavirikanya ni ale anaatumererya atthu akina okhalana mweettelo woonanara. (Wiis. 2:20) Tivonto, akhala wiira mutthu owo namavirikanya aahiiso onaatumererya atthu akina opaka itthu sootakhala, axitokweene khanrowa omuxukurya. Hata vari siiso, pooti wiira mutthu owo onoorukunuxa murima awe. Masi mutthu owo aahirukunuxe murima, hiyo khaninrowa omulavuliha nnakhala omulattula para mithukumano.

MUTAKIHEKE OMORIWA IKHARARI NI OTHUNKU WA YEHOVA

16-17. a) Exeeni Yehova onaavekela awe ale apanke etampi yuulupale? (Ezekiyeli 18:32) b) Axitokweene anrowa ovara sai muteko ni Yehova wiira yaakhaliherye ale apanke etampi yuulupale?

¹⁶ Exeeni niixuntte ahu ni myaha iya 5? Yehova khoniphavela wiira opwetexiwe mutthu! (Mmusome Ezekiyeli 18:32.) Oniphavela wiira ale apanke etampi yuulupale, atthikele waataana nuuwo. (2 aKor. 5:20) Tivonto, okathi wootheene Yehova onnaatumererya arumeyi awe amuhiyale, wiira arukunuxe murima ni ahokolowele wa yena. Axitokweene a mmulokoni, annivara muteko vamosa ni Yehova wiira yaakhaliherye ale apanke itampi suulupale orukunuxa murima aya. — aRom. 2:4; 1 aKor. 3:9.

¹⁷ Nkahaya muupuwelele ohakalala onikhumelela wiirimu, okathi mutthu mmosa opanke etampi yuulupale, onirukunuxa awe murima! Tiithi ihu a wiirimu Yehova, onnitteeliwa murima vanceene, khula okathi epwittipwitthi yaarimenle enitthikela aya mmulokoni. Omphenta wahu Yehova, onnincerereya okathi nnuupuwelela ahu othunku awe, omoriwa wawe ikharari ni oreera wawe murima wuulupale. — Luka 1:78.