Etthu xeeni enrowa wookhaliheryani osiveliwa omusoma Biibiliya? Munrowa ottottela sai mureerelo omusoma? Nrowe niwehe malakiheryo 5 yaakhalihenrye atthu anceene.

Mukhaleke opuro wooreerela. Mwaavyeke opuro woomaaleleya, ehikhanle etthu enrowa woonyakulakani. Okhala nipuro nookokola ni ninvira epheyo nnimookhaliheryani vanceene.

Mulokiheryeke muupuwelo anyu. Okhala wira Biibiliya eliivuru enikhuma wa Tiithi ahu a wiirimu, okathi munimusoma anyu muhaana okhala ntoko mwaana onisiveliwa wiiwa itthu oniixuttihiwa awe ni anamuyari awe. Akhala wira munookhalana moonelo woohiloka voohimya sa Biibiliya, muhaana ohiya moonelo owo. Mwiira siiso, munoomweemererya Muluku owiixuttihani.​—Esalimo 25:4.

Nvekeleke muhinatthi opacerya omusoma Biibiliya. MBiibiliyani ninniphwanya miyuupuwelelo sa Muluku. Nto nihaana okhaliheriwa ni yena wira niiwexexe ele ninsoma ahu. Munepa wa Muluku onoonikhaliherya, maana Muluku ooleiherya waavaha “munepa woowaarya ale aninvekela”. (Luka 11:13) Nuuvira okathi, munepa wowaarya onimookhaliheryani wiiwexexa “itthu soowiixerya sa Muluku”.​—1 aKorinto 2:10.

Muupuweleleke ele munisoma anyu. Yoolakela anyu ehikhaleke paahi omaliha ipaaxina muniphavela anyu osoma. Ohiya-vo, muhaana wuupuwelela ele munisoma anyu. Mwa ntakiheryo, nyuwo pooti wiikoha so: ‘Mikhalelo xeeni mutthu ola onilavuliwa aarina awe? Kinrowa ovarihela sai muteko mookumini mwaka?’

Mukhalaneke yoolakela. Okathi munimusoma anyu, nwehe etthu enrowa wookhaliheryani mookumini mwanyu. Nto wira mpake eyo, muhaana okhalana yoolakela ntoko: ‘Ophavela omusuwela oratteene Muluku. Okhala mutthu ooloka, mulopwana oothela ooloka wala muthiyana ootheliwa ooloka’. Nuumala-vo, mwaavyeke mpantta wa mBiibiliyani onrowa wookhaliheryani ophwanya ele mulakenle anyu. *

Vano mooweha malakiheryo 5 anrowa wookhaliheryani opacerya omusoma Biibiliya. Nto etthu xeeni mukhanle anyu oopaka wira yoosoma anyu ekhaleke yoohakalaliha? Mwaha onittharelana onimoovahani malakiheryo.