2 Timootheyo 3:1-17
3 Musuweleke wira mahiku ookiserya, makhalelo anrowa okhala ooxankiha ni oowoopiha.
2 Tthiri atthu anrowa wiiphentaka mmansaya, anrowa ophentaka musurukhu, anrowa wiittottopaka, wiisoona, anrowa onveehaka Muluku, khanrowa owiiwelelaka apapaya ni amamaya, anrowa okhalaka oohixukhuru, oohiroromeleya,
3 khanrowa waaphentaka akhwaaya, khanrowa ophavelaka wiiwanana, anrowa owootheryaka akhwaaya, khanrowa wiihiihaka, anrowa okhala oowali, anrowa onyokhaka itthu sooreera,
4 anrowa owiirelaka itthu sootakhala akhwaaya, khanrowa ophavelaka wiiwa miruku, anrowa osareya wiixinnuwiha, anrowa ophentaka itthu sinaasivela, ohiya omphenta Muluku,
5 anrowa okhalaka ntoko annimurumeela Muluku, masi ehikhanle yeeyo. Atthu siisa, mwaasyakeke.
6 Eriyari ya atthu ntoko awo annikhumelela alopwana oowootha, yaawo anrowa ni olavilavi mmaitthokoni mwa athiyana ahirina waamini woolipa ni oosareya itampi, nave anniiya mirima saya. Athiyana awo, ipottha sa itthu siniphavela mirima saya.
7 Okathi wotheene anniixutta, masi khanikhala-khala aweryaka osuwela oratteene ekeekhai.
8 Siisaale Xaani ni Xambere yanvirikannye aya Moise, nave alopwana awo annivirikanya ekeekhai. Muupuwelo aya woohononeya, ni khaneemereriwa ni Muluku okhala wira annikhootta waamini.
9 Masi, awo khanikelela ottaiwene, okhala wira atthu otheene anoosuwela saana wira awo alolo, ntoko alopwana ale anli yaasuweliwe aya okhala alolo.
10 Masi nyuwo mootthara oratteene soowiixuttiha saka, mweettelo aka, itthu kiniphavela aka, waamini waka, opixa waka murima, ophenta waka, ovilela waka.
11 Ohiya-vo, nyuwo moosuwela olupatthiwa ni ohaawa waakiphwannye wAntiyokiya, wIkoonio, ni oLiistra. Hata vari siiso, Apwiya aakaakiherya itthu iyo sotheene.
12 Mweekeekhai, otheene ale aniphavela omurumeela Muluku ntoko awiixutti a Kristu Yesu, nave anrowa olupatthiwaka.
13 Masi atthu ootakhala ni alipa-oowoka anrowa otepaka otakhala, yaawokaka atthu, nave awo awokiwaka ni atthu akina.
14 Masi nyuwo muhihiye okupali itthu mwiixuttihiwe anyu, seiyo mukupalihiwe anyu. Nyuwo munnaasuwela ale awiixuttinheni itthu iyo,
15 nave okhuma enamwane anyu, nyuwo munnisuwela soolempwa soowaarya,* seiyo siniwerya woovahani ankhili wira moopowe, mwaha wa omwaamini Kristu Yesu.
16 Soolempwa sotheene sinikhuma wa Muluku. Iyo sinnivareleya muteko wira siwiixuttiheke atthu, saattaruxeke atthu, sooniheryeke* itthu soohiloka, saalakiheryeke atthu ephiro ya xariya,
17 wira murumeyi a Muluku, oweryeke ni okhaleke oolikana ene wira ovareke miteko sotheene sooreera.
