Luka 15:1-32
15 Vano, alipa-ooliviha mpoosito otheene ni anatampi, yaahithukumana amurukureryaka Yesu wira anwiriyane.
2 Afarisi ni alipa-oowiixuttiha Nlamulo yaanimwaapa Yesu, ariki: “Mulopwana ola onniwaakhela anatampi, onalya naawo”.
3 Nto Yesu aahaaleela nlikanyiho nla, oriki:
4 “Mulopwana xeeni, oniira orina ene ipwittipwitthi 100, vano emosa erimeela, ohinahiya 99 moothakoni, onarowa ophavelasa emosa ele erimenle, mpakha ophwanya?
5 Aphwanya vale, onnikapatta mmakhatani, onatteeliwa murima.
6 Nuumala otthikela owaani, onniwiihana apatthani awe ni anamwaattamanani* awe, onahimya wira: ‘Mutteeliweke murima ni miyo, maana koophwanya epwittipwitthi aka yaarimenle’.
7 Siiso-tho, kinooleelani wira, onookhumelela ohakalala wiirimu mwaha wa natampi mmosa onirukunuxa murima, waavikana anaxariya 99 ahirina mathowa oorukunuxa murima.
8 “Aahiiso muthiyana xeeni, oniira orina ene musurukhu 10 wa eparatha* wa maluku, vano mmosa omurimeela, ohinapattiha examaniiya, okwesa mpaani mwawe ni ophavelasa oratteene mpakha ophwanya?
9 Nuumala ophwanya, onniwiihana apatthani awe* ni anamwaattamanani* awe, onahimya wira: ‘Mutteeliweke murima ni miyo, maana koophwanya musurukhu aka wa eparatha* waarimenle’.
10 Siiso-tho, kinooleelani wira, malaikha a Muluku annitteeliwa murima mwaha wa natampi mmosa onirukunuxa murima”.
11 Vano Yesu aahihimya wira: “Mulopwana mmosa aahikhalana anamwane axilopwana anli.
12 Ole mukhaani aahinvekela paapa awe wira: ‘Paapa, mukivahe epantte ya mireerelo sinrowa anyu okihiyerya’. Nto paapa ole aahaakawela anaawe mireerelo sawe.
13 Nuuvira mahiku vakhaani, mwaana ole mukhaani aahithukumanya itthu sawe sotheene, khurowa elapo yoottaiwene. Weiwo, aahihonona mireerelo sawe sotheene, ottharaka mweettelo woohiloka.
14 Nuumala ohonona itthu sotheene aarina awe, yaahikhumelela etala yuulupale elapo ele aaronwe awe, nto owo aahithoiwa.
15 Vano, aahirowa wiivahererya wa mulopwana mmosa a elapo ele. Nto mulopwana owo aahimuruma orowa omatta wawe olyiha ikuluwe.
16 Aaniphavela vanceene olya yoolya ya ikuluwe, masi khuuvo anvaha etthu.
17 “Aapacenrye awe wuupuwela saana, aahihimya wira: ‘Anamuteko a paapa aka, aakhalana yoolya yinceene, masi miyo kinikhwa etala nno!
18 Kinoovenya, kirowe wa paapa aka, kamuleele wira: “Paapa, koomutthekela Muluku wiirimu, ni kihootthekelani nyuwo.
19 Miyo nkiniphwanela-tho wiihaniwa okhala mwaninyu. Nto mukikhalihe ntoko namuteko anyu”’.
20 Tivo, aahivenya onarowa wa paapa awe. Nlelo ori ene ottaiwene, paapa awe aahinweha, ommorela ikharari, onamutthimakela, omukhupaarela, onanvaha epeexo.
21 Vano, mwaana ole aahimuhimeerya paapa awe, wira: ‘Paapa, koomutthekela Muluku wiirimu, ni kihootthekelani nyuwo. Nkiniphwanela-tho wiihaniwa okhala mwaninyu’.
22 Masi paapa awe aahaaruma arumeyi awe, oriki: ‘Mwaakuveke! Murowele nlaya nootepexa oreera, munwarihe. Nave-tho munwarihe anela ni isantaalya.
23 Mmuruuhe mwaanyompe ooneneva, mmuhite. Nilyeeke, nitthapeke,
24 okhala wira mwanaka ola aahikhwa, masi vano, ootthikela okhala mukumi. Owo aahirimeela, vano, oophwanyiwa’. Awo yaahipacerya ohakalala.
25 “Masi mwaana oopaceriwa aari omatta. Okathi aatthikela awe owaani, aattamelaka vate, aahiiwa muusika ni wiiniwa.
26 Nto aahimwiihana namuteko mmosa, onamukoha etthu yiiraneya.
27 Namuteko ole aahimwaakhula wira: ‘Muhima anyu orootthika, nto paapa anyu oomuhitela mwaanyompe ooneneva, okhala wira ootthika ori ene mukumi’.
28 Mwaana ole aahinanariwa, onakhootta okela mpaani. Nto paapa awe aahikhumela vate, onamuxonttela.
29 Mwaana ole aahimwaakhula paapa awe oriki: ‘Soovira iyaakha sinceene koovarelakani muteko, nave nkitonko ohiwiiwelelani. Masi khamutonko okivaha mwaaxaana a puri, wira kipake efesta ni apatthani aka.
30 Masi ophiyaka-ru mwaninyu ole ohononne mireerelo sanyu ni anamararuwa, nyuwo moomuhitela mwaanyompe ooneneva’.
31 Paapa awe aahimwaakhula wira: ‘Mwanaka, nyuwo munikhala ni miyo mahiku otheene, nave mireerelo saka sotheene ti sawinyu.
32 Masi hiyo naahaana otthapa ni otteeliwa murima, okhala wira muhima anyu aahikhwa, masi vano, ootthikela okhala mukumi. Owo aahirimeela, vano, oophwanyiwa’”.
Inoota
^ Aahiiso, “anaitthoko”.
^ Ekereku, “musurukhu wa itraakima wa maluku”. Etraakima emosa waari musurukhu waaliviwa mutthu avara muteko mahiku mararu.
^ Aahiiso, “apatthani awe athiyana”.
^ Aahiiso, “anaitthoko”.
^ Ekereku, “musurukhu wa itraakima wa maluku”. Etraakima emosa waari musurukhu waaliviwa mutthu avara muteko mahiku mararu.
