Miteko 10:1-48
10 Aahikhala mulopwana mmosa oKesareya, aihaniwa Korneelio, yoowo aari mukhulupale a anakhotto a ekrupu ya atoropa yaihaniwa Italiano.*
2 Owo ni atthu otheene a etthoko awe, yaanimukokhorela Muluku. Nave aanaakhaliherya alipa-oohaawa ni aanimuxonttela Muluku, mahiku otheene.
3 Nihiku nimosa, etthu yoowiiraka 15 oora,* Korneelio aahiweha oratteene moolohani nlaikha na Muluku, nirwiiye ene vatthokoni vawe, nnamulavuliha niiraka: “Korneelio!”
4 Korneelio aahiwehexexa, oovaka, onaakhula oriki: “Pwiya, kinnoowiriyanani”. Nlaikha naahimuleela wira: “Mavekelo anyu aaphiya wa Muluku. Owo onnoona moota munaakhaliherya anyu alipa-oohaawa, nto onniwuupuwelani.
5 Mwaarume atthu orowa oYope, yamwiihane mulopwana oniihaniwa Simoni, yoowo oniireliwa-tho Pedru.
6 Owo, ori vatthokoni va mulopwana mmosa onivara muteko ni isapala, oniihaniwa Simoni, waattamela ophareya”.
7 Nlaikha nle, nimalaka-ru olavula ni Korneelio, naahirowa. Vano, Korneelio aahiwiihana arumeyi awe anli ni toropa mmosa aamoova Muluku,
8 aaleela itthu sotheene ni aaruma orowa oYope.
9 Mmeeloni mwaya, yeettaka mukwaha aya, yaattamelaka opooma, Pedru aahiwela vasulu va empa* aakhala awe, wira avekele. Yaari etthu yoowiiraka 12 oora.*
10 Ewoora ene yeele, Pedru aahivoliwa etala onaphavela olya. Okathi yaalokiheriwa aya yoolya, owo aahiloha.
11 Moolohani, aahoona erimu ehuleiye ene, nave etthu yaalikana ni ekuwo yuulupale ekuruxeliwaka vathi, evareliwe ene iponta saya ixexe.
12 Vakuwoni-vo, saahikhala inama sa mikhalelo sotheene: inama sa metto mixexe, inowa, anaakhwiitti ni axipalame.*
13 Vano, nsu nimosa naahimuleela wira: “Pedru, nvenye, mwiiveke ni mukhuureke!”
14 Pedru aahaakhula oriki: “Pwiya, nkinikhuura nnakhala vakhaani, maana khenakele mwaano mwaka etthu ya mwiikho ni enikhoottihiwa ni nlamulo”.
15 Nsu nlo naahimuleela ekwaha ya nenli niiraka: “Muhihimyeke okhala soohiloka itthu Muluku oreerinhe awe”.
16 Yaahiiraneya-tho ekwaha ya neeraru. Niinaano-ru, ele Pedru oonale awe yaahiroihiwa wiirimu.
17 Pedru aahitikinihiwa, onaphavela osuwela etthu yaataphulela aya ele yoonihiwe awe. Okathi ene yoowo, alopwana ale yaarummwale ni Korneelio yaahiphiya vatthokoni va Simoni, yeemela vamukhora.
18 Yaahimwiihana mwaneene etthoko, anamukoha akhala wira Simoni, yoowo aihaniwa Pedru, aamanke vaavale.
19 Pedru uupuwelelaka etthu oonihiwe awe, munepa woowaarya waahimuleela wira: “Mwiiwe! Aakhala alopwana araru aniwaavyani.
20 Tivo, nvenye, mukhuruwele vathi vale ni mwaatthare muhihoveryaka etthu, okhala wira ti miyo kaarumme”.
21 Siiso, Pedru aahikhuruwa, aaphwanya alopwana ale, onahimya wira: “Miyo-va. Ti miyo munikaavya anyu. Murwenle-ni?”
22 Awo yaahihimya wira: “Mukhulupale a anakhotto Korneelio, owo mutthu a xariya ni onimoova Muluku, nave onnilavuliwa saana ni nloko notheene na ayuda. Muluku ooruma nlaikha nawe omuleela Korneelio wira oolattuleni vatthokoni vawe, wira iiwe itthu sirina anyu omuleela”.
23 Vano, Pedru aahaalattula atthu awo wira akele mpaani, ni aahaakhaliha aletto awe.
Mmeeloni mwaya, Pedru aahaatthara, nave anna akina a oYope, yaahirowa vamosa nuuwo.
24 Mmurottoni mwaya, Pedru aahiphiya oKesareya. Tthiri Korneelio, iira aalipelelaka atthu ale, nave iira aalattunle ene amusi awe ni apatthani awe oororomeleya.
25 Okathi Pedru aaphiyale awe, Korneelio aahirowa okumana nuuwo, okokhora ohoolo wawe, onanvuwiha.
26 Masi Pedru aahinvarela, onahimya wira: “Mweemele, miyo-tho ka mutthu paahi”.
27 Avaanelaka siisaale, Pedru aahikela mpaani, aaphwanya atthu anceene athukumanne ene.
28 Pedru aahaahimeerya wira: “Nyuwo moosuwela wira nlamulo khanneemererya wira muyuda okhaleke vamosa aahiiso omwaattamele mutthu a nloko nikina. Masi Muluku, ookooniherya wira kihimuhimyeke mutthu okhala oohiloka.
29 Tivo, nuumala orummwa, kihoorwa kihihoveryaka etthu. Nto, xeeni muhalaka waaruma atthu okirweela?”
30 Korneelio aahaakhula oriki: “Mahiku maxexe avinre, okhuma ewoora yeela, kanvekela owaani vaava. Yaari 15 oora.* Okathi ene yoowo, mulopwana mmosa aawanre ikuwo soowaarya aaheemela ohoolo waka,
31 onahimya wira: ‘Korneelio, Muluku ohiiwa ovekela wanyu ni ohuupuwela itthu sooreera muniwiirela anyu alipa-oohaawa.
32 Tivonto, mwaarume atthu orowa oYope omwiihana Simoni, yoowo-tho oniireliwa Pedru. Mulopwana owo, omanke owannyawe Simoni, yoowo onivara muteko ni isapala, waattamela ophareya’.
33 Vano miyo kaahaaruma atthu woorowelani, ti vootepa oreera okhala wira muhoorwa. Nto hiyo noothukumana-va, ohoolo wa Muluku, wira niwiriyane itthu sotheene murummwale anyu ni Yehova wira munileele”.
34 Nuumala wiiwa moolumo awo, Pedru aahiira: “Tthiri, vano koosuwelexa wira Muluku khonaathanya atthu,
35 masi khula elapo, owo onnimwaakhela khula mutthu onimoova, ni oneettela exariya.
36 Owo ohaaroihela anaisarayeli ihapari sooreera sa murettele, mwa Yesu Kristu: Yesu owo, ti Pwiya a atthu otheene.
37 Nyuwo munnisuwela mwaha waalavuliwa oYudeya wotheene, opaceryaka oGalileya, nuumala Yohani olaleya opatiso.
38 Mwaha owo, waamuhimya Yesu munazarethi. Muluku aahimuthanla ni munepa woowaarya, khunvaha owerya. Siiso, aanivara itthu sooreera ni aanaapenuxa atthu otheene yaahaaxiwa ni Diabo, okhala wira Muluku aari ni Yesu owo.
39 Nave hiyo na anamoona a itthu sotheene Yesu opanke awe oYudeya, oGalileya ni oYerusalemu. Masi awo yaahimwiiva, amukhomelaka vamwirini.
40 Muluku oomuhihimuxa nihiku na neeraru, wira atthu anwehe.
41 Owo khowoonihenrye atthu otheene, masi onoonihenrye hiyo paahi, naalya ni naawurya vamosa ni Yesu, nuumala owo ohihimuxiwa mookhwaani. Hiyo naahithanliwa khalai ene ni Muluku, wira nimoone ni nimulaleye Yesu owo.
42 Nave-tho, owo ooniruma waalaleerya atthu ni waatthokiherya oratteene, wira owo ti yoole othanliwe ni Muluku, wira aaphukele atthu akumi ni alipa-ookhwa.
43 Maprofeta otheene aalavula amuhimyaka Yesu. Awo ahimmye wira, mwa nsina nawe, Muluku onimwaalevelela itampi atthu otheene animwaamini yoowo”.
44 Pedru nlelo olavulaka itthu iya, atthu otheene yaiwale nuulumo na Muluku, yaahaakhela munepa woowaarya.
45 Nto ayuda oowaamini,* yaawo yaari ni Pedru, yaahitikinihiwa vanceene, okhala wira ale yahaakhanle ayuda, yaahaakhela munepa woowaarya, mahala ene.
46 Tthiri, yaahiwiiwa elavulaka mattaava oovirikana, ni envuwihaka Muluku. Siiso, Pedru aahihimya wira:
47 “Atthu ala ahaakhela munepa woowaarya, ntoko hiyo naakhenle ahu. Niireke ookhala oniwerya waakhoottiherya opatisiwa ni maasi?”
48 Nto Pedru aahiruma wira atthu ale apatisiwe mwa nsina na Yesu Kristu. Nuumala-vo, yaahinvekela wira okhale naawo mahiku vakhaani.
Inoota
^ Ekrupu ya anakhotto a oRoma yaarina atoropa 600.
^ Ekereku, “ewoora ya neethanu naxexe [nuumala nsuwa okhuma]”.
^ Nwehe enoota ya Matheyo 24:17.
^ Ekereku, “ewoora ya neethanu namosa [nuumala nsuwa okhuma]”.
^ Aahiiso, “axinuuni”.
^ Ekereku, “ewoora ya neethanu naxexe [nuumala nsuwa okhuma]”.
^ Ekereku, “atthu oowaamini oowinnuwihiwa”.
