YOOSOMA 24

Malaikha Tani ni Anipaka Exeeni?

MURUMIHE

Yehova oniphavela wira nisuwele emusi awe ya wiirimu. Emusi eyo enihela muhina malaikha, yaawo anihimmwa okhala “àna a Muluku”. (Maphattuwelo 6:2; Yobi 38:7) Biibiliya onihimya exeeni voohimya sa malaikha? Awo anaakhaliherya sai atthu? Niireke malaikha otheene aniirela mpantta emusi ya Muluku?

1. Malaikha ti pani?

Yehova aapacenrye opattuxa malaikha ohinatthi opattuxa elapo. Ntoko Yehova ohinooneya awe, malaikha khanooneya, awo anikhala wiirimu. (aHeeberi 1:14) Aakhala malaikha imilyau sinceene, ni khula nlaikha nookhalana mukhalelo aya. (Wiisuupulula 5:11) Malaikha ‘anniwelela masu a [Yehova] ni òtthuna wawe’. (Esalimo 103:20) Khalai, Yehova aaniruma malaikha waaroihela atthu muhupi awe, waakhaliherya atthu awe ni owoopola okathi wa mixankiho. Olelo-va, malaikha annaakhaliherya makristau waaphwanya atthu aniphavela omusuwela Muluku.

2. Satana ni minepa sawe sootakhala tani?

Malaikha makina, yaahihiya ororomeleya wa Yehova. Nlaikha naapacenrye ommwareela Yehova nniitthaniwa ‘Diabo ni Satana, ni ninnaahapuxa atthu anikhala elapo yotheene ya vathi’. (Wiisuupulula 12:9) Satana aaphavela waalamulelaka atthu. Owo aahiwiiriha apinaatamu oopacerya, Adamu ni Eva ni malaikha makina a wiirimu ohimwiiwelela Yehova. Nto malaikha awo yahaamwiiwelenle Yehova aniihaniwa minepa sootakhala. Yehova ohoomola wiirimu minepa iyo sootakhala, siri valaponi vaava. Muhoolo, minepa iyo sinoopwetexiwa.—Mmusome Wiisuupulula 12:9, 12.

3. Satana ni minepa sootakhala siniimananiha sai oniwoka?

Satana ni minepa sootakhala, sinnaawoka atthu anceene sirumeelaka okhwiri wala onammunepani. Nto arumeelaka okhwiri wala onammunepani, atthu anceene anniwerya olavula ni minepa sootakhala. Opaka eyo etthu yootakhala. Mwa ntakiheryo, atthu akina anniphavela olavula ni minepa sootakhala yaakohaka ale ansoma itheneeri, anahako, akhulukana ni anamaciini. Atthu akina anniphavela enamuna ya olooliwa enivarihana ni okhwiri. Satana oniphavela owiirihaka atthu wuupuwela wira anoowerya olavula ni alipa-ookhwa. Masi Yehova onninlopola wira: “Muhikohé minepa nnákhala inyaka [wala anahako]”. (Onamukuttho 19:31) Yehova oninlopola wira nihihapuxiwe ni Satana wala ni minepa sootakhala. Maana minepa sootakhala awanani a Muluku, awo aniphavela onikumiherya mixankiho.

MWIIXUTTE ITTHU SIKINA

Nwehe itthu sooloka malaikha anipaka aya, xeeni okhwiri wala onammunepani ori aya wootakhala ni moota nikhanle ahu oowiikhapelela wira nihiwokiwe aahiiso nihithepiye ni Satana ni minepa sootakhala.

4. Malaikha annaakhaliherya atthu omusuwela Yehova

Malaikha a Muluku khanaalaleerya atthu mooluluwanya. Masi hata vari siiso, awo annaakhaliherya atthu a Muluku waaphwanya ale aniphavela omusuwela Yehova. Mmusome Wiisuupulula 14:6, 7, nuumala-vo mwaakhule makoho anittharelana:

Xeeni nintthuneya ahu okhaliheriwa ni malaikha wira nilaleerye?
Niireke khivanoosivelani osuwela wira malaikha animookhaliheryani waaphwanya atthu aniphavela wiixutta itthu sa mBiibiliyani? Exeeni eniwiirihani wuupuwela siiso?

5. Mukhootte okhwiri

Satana ni minepa sootakhala awanani a Yehova nave awanani ahu. Mmusome Luka 9:38-42, nuumala-vo mwaakhule nikoho ninttharelana:

Minepa sootakhala siniwiiriha exeeni atthu?

Hiyo khanimphavela wira minepa sootakhala seettiheke okumi ahu. Mmusome Otumererya 18:10-12, nuumala-vo mwaakhule makoho anittharelana:

Mwa inamuna xeeni minepa sootakhala sineererya aya weettiha okumi ahu ni ophavela olavula ni hiyo? Soolema xeeni soohiloka sinivarihana ni minepa sootakhala sihireere wuulaana muttetthe anyu?
Niireke ti vooloka Yehova onikhoottiha soolema soohiloka sinivarihana ni minepa sootakhala? Mwaha wa xeeni?

Nwehe EVIIDIYU, nuumala-vo mwaakhule makoho.

EVIIDIYU: “Mmukhotteke Satana” (5:02)

Eviidiyu niwenhe ahu, Paula aahinwariha ekhulula mwanawe mwaamuthiyana. Munoona wira ele aapanke awe etthu yootakhala? Mwaha wa xeeni?
Etthu xeeni Paula aareerela awe opaka wira ohihapuxiwe ni minepa sootakhala?

Okhala wene, makristau eekeekhai annikhootta minepa sootakhala. Musome Miteko 19:19 ni 1 aKorinto 10:21, nuumala-vo mwaakhule nikoho ninttharelana:

Xeeni vari aya vooloka opwetexa wala opaha khula etthu enivarihana ni minepa sootakhala?

6. Mmuxintte Satana ni minepa sawe sootakhala

Minepa sootakhala sinlamuleliwa ni Satana. Masi malaikha oororomeleya anlamuleliwa ni nlaikha nuulupale, eyo piiyo, Mikhayeli nenno nri nsina nikina na Yesu. Owerya xeeni Mikhayeli orina awe? Mmusome Wiisuupulula 12:7-9, nuumala-vo mwaakhule makoho anittharelana:

Tani orina owerya wuulupale, Mikhayeli wala Satana ni minepa sawe sootakhala?
Nyuwo munoona wira atthareli a Yesu ahaana omoova Satana ni minepa sawe sootakhala?

Nyuwo munoowerya omukhootta Satana ni minepa sawe sotakhala. Mmusome Yakobo 4:7, nuumala-vo mwaakhule nikoho ninttharelana:

Nyuwo munrowa wiikhapelela sai wira muhihapuxiwe ni Satana ni minepa sawe sootakhala?

ATTHU AKINA ANIHIMYA WIRA: “Khahiyo vootakhala oweetta axooku wala oweha iviidiyu sinivarihana ni minepa sootakhala wala okhwiri. Maana oweetta axooku awo wala oweha iviidiyu iyo otthekula paahi”.

Xeeni muupuwelo owo ori awe wootakhala?

IPONTO SUULUPALE

Malaikha oororomeleya anninikhaliherya. Satana ni minepa sawe sootakhala awanani a Yehova ni awo annaawoka atthu arumeelaka onammunepani wala okhwiri.