Yesu aakhuma oPereya orowaka oYerusalemu. Mmiravo thaaciri aahirowa vaari Yesu khukokhora ohoolo wawe. Mmiravo ole aari namalamulela “mulupale”, waaniheryasa mukhulupale a oSinagoga aahiiso a oSineedrio. Vano aahimukoha Yesu wira: “Mwixuttihi, nyuwo mòrera murima! Kìreke-ni wira kiphwanyé ekumi yohimala?”​—Luka 8:41; 18:18; 24:20.

Yesu aahimwaakhula wira: “Munkìrela-ni òrera murima? Khavo òrera murima, ahikhanle Muluku pahi”. Mmiravo ole aahirumeela nuulumo noowi “òrera murima” ntoko mwiihanelo wa nttittimiho, ntoko siisaale marabi yiihanelana aya. Nnaamwi Yesu aari mwiixuttihi ooloka, aahimukhaliherya mulopwana ole woona wira Muluku paahi, toniphwanela wiihaniwa “òrera murima”.

Yesu aahimmye wira: “Vano, mwatthunaka ophwanya ekumi ehinimala, mwetteleke soruma sa Muluku”. Nto mmiravo ole aahimukoha Yesu wira: “Soruma xeni?” Yesu aahilavula sooruma thanu sa Malamulo Muloko, sini: muhimwiive mutthu, muhiraruwe, muhiiye, muhimootherye mutthu ni mwaattittimihe atithinyu ni amaminyu. Nuumala-vo, aahincererya olavulaka yooruma yootthuneya, oriki: “Mwaphenteke akhw’inyu ntoko sinìphentanyu”.—Matheyo 19:17-19.

Mulopwana ole aakhunle wira: “Sothene iyo kinnettela. Enikihalela-tho exeni?” (Matheyo 19:20) Owo uupuwela wira aahaana opaka etthu yooloka, aahiiso ya vameekhaaya wira ophwanele okumi woohimala. Yesu aahoona wira mulopwana ole aaniphavela tthiri osuwela, nto “ahinwehexexa n’umphenta”. (Marko 10:21) Masi, mulopwana ole aahikhalana muxankiho.

Mulopwana ole aari thaaciri ni aanisiveliwa muhakhu, nto Yesu aahimuleela wira: “Yohalenleni etthu emosá pahi. Murowé mwatumihe sothene sirinanyu: musurukhu ene mwakawele  alipa-òhawa. Siso munokhalana muhakhu wirimu. Numalá, mwarwé mukitthareke”. Mulopwana ole aahaana waakawela alipa-oohaawa musurukhu awe, yaawo yahaarowa omuliva etthu, wira okhale mutthareli a Yesu. Yesu aahimoonela othunku maana aahinweha okhumaka oriipiwe ene murima. Okhala wira “kharerena muhakhu”, ni aaniphenta vanceene, khaawenrye ophavela muhakhu wekeekhai. (Marko 10:21, 22) Yesu aahiira: “Orikarika tthiri athajiri okela Momweneni mwa Muluku”.​—Luka 18:24.

Awiixutti a Yesu yaahitikinihiwa ni masu ale ni ele Yesu aahimmye awe moottharelana wira: “Ovira ekamelo vamwitheni v’akwiya ti wokhweyexa ovikana okela thajiri Momweneni mwa Muluku”. Masu ale yaahiwiiriha awiixutti okoha wira: “Nto siso, t’ani onwerya wopowa?” Niireke khivaniweryaneya mutthu woopowa? Yesu aawehaka, aakhunle wira: “Etthu enarikela atthu, Muluku omukhwèla”.​—Luka 18:25-27.

Pedru aahooniherya wira yoothanla aya yaari yoovirikana ni mulopwana thaaciri, oriki: “Hiyo va, nohiya itthu sothene, nnottharani nyuwo. Ninrowa ophwanya-ni?” Yesu aahaaleela etthu yaarowa aya ophwanya mwaha woopaka yoothanla yooloka iiraka: “Nihiku n’orerihiwa olumwenku, okathi Mwana a mutthu onrowawe okilathi vehijeni vawe y’ovuwa, ni nyuwo-tho munokilathi vehijeni mulokó ni pili wira mulamuleke mahimo mulokó ni manli a Isarayeli”.​—Matheyo 19:27, 28.

Mwekeekhai Yesu uupuwela okathi itthu sotheene valaponi sinrowa aya ottikiheriwa ntoko saari aya oJardim ya wEedeni. Pedru ni arummwa akina anrowa otthuveliwa wira alamuleleke ni Yesu mParayiisu valaponi. Nto etthuvo eyo ennivikana wiimananiha waya!

Nave khahiyo wira awiixutti yaarowa otthuveliwa muhoolo paahi. Maana hata okathi ole awo yaanireelihiwa. Yesu aahimmye wira: “Yakhalá antthuna ohiya emp’aya walá wahiya amwar’aya n’axinn’aya n’axitithi aya walá an’aya, mwaha w’Omwene wa Muluku, othene awo animunjereriwa vanjene vathí-va: womalelani animwakhela ekumi yohimala”.​—Luka 18:29, 30.

Tthiri khula opuro, awiixutti a Yesu yaarowa ohakalalaka ni waakheliwa saana ni annaya. Nto wiiraana waya olumwenku wotheene ni annaya onnivikana wiiraana orina aya ni amusi aya. Masi mooriipiha murima, thaaciri ole khaarowa ophwanya mareeliho awo ni khaarowa olamulela ni Yesu wiirimu Momweneni wa Muluku.

Yesu ancerenrye oriki: “Atthu anjene ari òpajerya, anokhala òkiserya: anjene ari òkiserya anokhala òpajerya”. (Matheyo 19:30) Yesu aaphavela ohimya exeeni?

Mulopwana ole thaaciri aari mmosa a atthu “òpajerya”, maana aari mmosa a ahooleli aaYuda. Akhala wira aamwiiwelela malamulo a Muluku, anwerya waakhela mareeliho manceene ni ovara miteko sinceene. Masi ohiya opaka eyo, owo aanihela mihakhu sawe nipuro noopacerya. Moovirikana ni vo, atthu pure, yaanoona sowiixuttiha sa Yesu okhala seekeekhai. Awo yaari “òkiserya”, masi vano yaarowa okhala “òpajerya”. Tivonto, yaaniwehererya okilaathi ihice sa wiirimu wira alamuleleke ni Yesu mParayiisu valaponi.