“Nuuni azallennaba gidikko wodee gakkin cakkana deꞌiyo gishshawu, hidootaa qanxxidi likke gididabaa oottiyogaa aggokko.”—Galaatiyaa 6:9, Ooratta Alamiya Birshshettaa.

 “Ane lo77o oosuwaa oottanau azalliyoogaa aggoos. Aissi giikko, nuuni azallennan aggikko, cakkiyo wodee sinttappe yaana.”—Galaatiyaa 6:9, Wolayttatto Geeshsha Maxaafaa.

 Kiitettida Phawuloosi Kiristtaaneti Xoossaa sinttan likke gididabaa, woy loꞌꞌobaa oottiyogaa aggennaadan minttettiis. Eti hegaadan oottikko, Xoossay eta woytanaagaa ammanettana danddayoosona.

 ‘Hidootaa qanxxokko.’ Ha qofay ‘azallokko’ geetettanakka danddayees. Koyro xaafettido doonan he qofay hidootaa qanxxennaagaa woy yeemottiyogaa aggennaagaakka qonccissees. Kiitettida Phawuloosi banakka gujjidi yootiyogan, hidootaa qanxxissiyabay akka issi issitoo gakkidoogaa yootiis.—Roome 7:21-24.

 “Likke gididabaa,” woy loꞌꞌobaa geetettiday issi Kiristtaanee Xoossawu haggaaziyo wode oottana bessiya ubbabaa qonccissees. Hegeetu giddon, issi uri ba mala Kiristtaaneta woy harata maaddanawu oottiyobay deꞌees.—Galaatiyaa 6:10.

 “Nuuni azallennaba gidikko wodee gakkin cakkana.” Issi goshshanchchay zerido kattay diccanawu wodee koshshiyogaadan, loꞌꞌobaa oottiyogee demissiyo goꞌꞌaa akeekanawukka wodee koshshiyogaa Phawuloosi hegaa nabbabiyageeta hassayissiis. Phawuloosi cahaabaa yootiyogan, paydo 7n odettida, “asi ba zeriyoogaa zaarettidi cakkana” giya tuma gididabaara gattidi ha xiqisiya qofaa yootiis. Hara ogiyan qonccissanawu, issi Kiristtaanee Xoossaa sinttan loꞌꞌo gididabaa oottikko, merinaa deꞌuwa gujjin, gita woytuwa cakkana.—Roome 2:6, 7; Galaatiyaa 6:8.

 Kiitettida Phawuloosi ha dabddaabbiya Galaatiyan deꞌiya Kiristtaanetussi 50-52 M.L. gakkanawu deꞌiya wodiyan xaafiis. I yaatidoy banttana Kiristtaane giikkonne, Yesuusabaa tumaa geellayidi tamaarissiyageetuppe Kiristtaaneta naaganaassa. (Galaatiyaa 1:6, 7) Ha worddo asttamaareti, Xoossay Muuse baggaara beni Israaꞌeelatussi immido Higgiyawu Kiristtaaneti azazettana koshshees giidi yootoosona. (Galaatiyaa 2:15, 16) Higgee koyettidabaa poliichchidoogaanne Xoossawu goynniyageeti he higgiya garssan deꞌennaagaa Phawuloosi qonccissiis.—Roome 10:4; Galaatiyaa 3:23-25.

 Kiitettida Phawuloosi ba mala Kiristtaaneti “likke gididabaa oottiyogaa” aggennaadan yootiyo wode, Muuse Higgiyawu azazettiyogaabaa yootiiddi deꞌenna. I, haratussi loꞌꞌobaa oottiyogaabaa Yesuusi tamaarissido ubbabaa qonccissiya ‘Kiristtoosa higgiya’ polanaadan eta minttettiiddi deꞌees.—Galaatiyaa 6:2; Maatiyosa 7:12; Yohaannisa 13:34.

 Galaatiyaa maxaafaa erissiya ha qantta biiduwa beꞌa.