Dure bitaneenne Alꞌꞌaazari, Yesuusi yootido issi taarikiyan etabaa medhdhi ekkidi odido asata. (Luqaasa 16:19-31) He taarikiyan, Yesuusi naaꞌꞌu citan deꞌiya asatubaa yootanawu eta goꞌettiis; hegeetikka: (1) Yesuusa wode deꞌida, Ayhuda haymaanootiya kaalettiya otorettiya asata, qassi (2) Yesuusi tamaarissidobaa ammanida ashkke asata.

Ha huuphe yohuwan

•  Dure bitaniyabaanne Alꞌꞌaazarabaa Yesuusi woygidee?

•  Ha taarikee tumuppe hanidabee?

•  Ha taarikee siꞌooliya tamaa timirttiya kaafiyabee?

•  Dure bitaniyanne Alꞌꞌaazara taarikiya birshshettay aybee?

 Yesuusi Luqaasa shemppo 16n, eta hanotay muleera laamettido naaꞌꞌu asatubaa qonccissiis.

 Yesuusi yootido taarikee qanttan hagaadaana: Issi dure bitanee ishaluwan deꞌiis. Alꞌꞌaazara giyo issi woossiyagaa, dure bitaniya penggen ehiidi wottidosona; I dure bitaniya masoofiyappe laalettiya qumay bawu imettanaadan koyiis. Guyyeppe, Alꞌꞌaazari hayqqin, kiitanchchati A tookkidi, Abrahaama baggi aattidosona. Dure bitaneekka hayqqidi moogettiis. He taarikiyan, naaꞌꞌu asatikka hayqqi simmidi, hanettiyabaa eriyabadan odettiis. Hayqqida dure bitanee eexxiya taman qaxxayettidi, kushiya biradhdhiyappe xokkiya haattan A inxxarssaa irxxissanaadan Alꞌꞌaazara kiittana mala Abrahaama oychchiis. Abrahaami dure bitanee oychchidobaa oottibeenna, qassi eta naaꞌꞌaa hanotaykka muleera laamettidoogaanne eti issoy issuwakko pinnennaadan gita aafoy eta gidduwan merettidoogaa yootiis.

 Hanidaba gidenna. Hagee Yesuusi issibaa tamaarissanawu koyidi yootido leemiso. Hagee leemiso gidiyogaa eranchchatikka yootoosona. Leemisuwawu, 1912n attamettida Lutera Geeshsha Maxaafan issi sima huuphe yohoy hegee leemiso gidiyogaa yootees. Qassi, Kaatooliketu Jerusalem Baybilee, tohossa qofan, hagee “deꞌon deꞌida asabaa gidennan leemisuwan odettida taarike” gidiyogaa yootees.

 Yesuusi ha taarikiyan hayquwappe simmin deꞌiya deꞌuwabaa yootidee? I issi issi asay hayqqidi siꞌooliya taman waayettiyogaa, qassi Abrahaaminne Alꞌꞌaazari saluwan deꞌiyogaa yootidee? He taarikiyan odettida darobati hanotay hegaadaana gidennaagaa bessoosona.

 Leemisuwawu:

•   Dure bitanee tumuppe eexxiya taman qaxxayettiidi deꞌiyakko, Alꞌꞌaazara biradhdhiya xeeran deꞌiya haattaa, tamay melissi aggennee?

•   Haattay melennaba gidiyakkokka, he dure bitanee taman waayettiyagaa biradhdhiyappe issitoo xokkiya haattay irxxissanee?

•   He taarikee odettido wodee gakkanawu, ooninne saluwa bibeennaagaa Yesuusi yootido gishshawu, Abrahaami waanidi saluwan deꞌana danddayii?—Yohaannisa 3:13.

 Gidenna. Hagee tumu hanida taarike gidana xayikkonne, issoti issoti ha qofay loꞌꞌo asay saluwa biyogaanne iita asay siꞌooliya taman qaxxayettiyogaa bessiyaba giidi palamettoosona. a

 Hegaadan qoppiyogee bessiyabee? Chii.

 Siꞌooliya tamaabaa tamaarissiyobay hayqqidaageetu hanotaabaa Geeshsha Maxaafay yootiyobaara maayettenna. Leemisuwawu, Geeshsha Maxaafay hayqqida loꞌꞌo asa ubbay saluwan ufayssan deꞌees woy iita asay siꞌooliya taman xuugettees geenna. Ubba, Geeshsha Maxaafay, “Paxa de7iya asati issitoo haiqqanau de7iyoogaa eroosona; shin haiqqidaageeti aibanne erokkona” yaagees.—Eranchchaa 9:5.

 He taarikee, naaꞌꞌu citan deꞌiya asaa hanotay keehippe laamettanaagaa bessees.

 Dure bitanee “miishsha dosiya” Ayhuda haymaanootiya kaalettiyageetu leemiso. (Luqaasa 16:14) Eti Yesuusi yootiyobaa siyikkonne, hegaa eqettidosona. Haymaanootiya kaalettiya he asati hara coo asaa karoosona.—Yohaannisa 7:49.

 Alꞌꞌaazari, Ayhuda haymaanootiya kaalettiyageeti eta kariyo Yesuusi tamaarissiyobaa ammanida asaa leemiso.

 Naaꞌꞌu citan deꞌiyageetu hanotaykka muleera laamettiis.

•   Ayhuda haymaanootiya kaalettiyageeti Xoossay banttana nashshees giidi qoppidosona. Eti Yesuusi tamaarissiyobaa ammanenna gishshawu, Xoossay etanne eta goynuwa ixxees; hegee eti hayqqidosona giyogaa mala. Qassi, Yesuusinne I kiittidoogeeti tamaarissiyobay eti waayettanaadan oottiyaba.—Maatiyoosa 23:29, 30; Oosuwaa 5:29-33.

•   Haymaanootiya kaalettiyageeti daro wodiyawu kariiddi takkido coo asati haꞌꞌi ufayttoosona. Daroti Yesuusi tamaarissido, Geeshsha Maxaafay yootiyobaa ammanidi hegaappe goꞌettiiddi deꞌoosona. Haꞌꞌi, eti merinawu Xoossan sabettana danddayiyo injjee deꞌees.—Yohaannisa 17:3.