Ee, Geeshsha Maxaafay saynisiyaa maxaafa gidana xayikkonne, I saynisiyaara gayttidabaa yootiyo wode suurebaa yootees. Sayniseenne Geeshsha Maxaafay maayettiyoogaanne Geeshsha Maxaafay xaafettiyo wode deꞌida daro asay qoppiyoogaappe keehi dummatiya saynisee yootiyo tumubay an deꞌiyoogaa bessiya amarida leemisota beꞌa.

•   Salo gufanttuwawu doomettay deꞌees. (Doomettaabaa 1:1) SHin beni wode odettiya daro hayseti salo gufanttoy laalettidabaa shiishshidi giigissidobaappe aattin merettidaba gidenna goosona. Baabilooneti naaꞌꞌu ano abbatuppe yiida xoossati salo gufanttuwaa yelidosona giidi ammanoosona. Asay haasayiyo hara hayseti qassi salo gufanttoy issi gita phuuphulliyaappe yiis giidi yootoosona.

•   Salo gufanttoy meretaa higgiyaa maaraadan deꞌiyaabappe attin, xoossati koyiyoogaadan kaalettiyoobaa gidenna. (Iyyooba 38:33; Ermmaasa 33:25) He xoossati meqetti baynnaageeta gidiyoogaanne asaa bantta koyoogaadan oottanawu eti koyiyoogaa, qassi asay he xoossatuppe bana naaganawu aynne oottana danddayennaagaa kumetta alamiyan odettiya hayseti yootoosona.

•   Saꞌay aybakko baynnasan kaqettiis. (Iyyooba 26:7) Beni wodiyan deꞌiya daro asay saꞌaa issi keehi gitabay woykko menttaa woy geeggiyaa mala doꞌay tookki uttiis giidi qoppees.

•   Ano abbatuppenne hara pulttotuppe haattay penttuwan pude denddidi iranne shachcha gididi duge saꞌawu bukkidi shaafatuuninne pulttotun gelees. (Iyyooba 36:27, 28; Eranchchaa 1:7; Isiyaasa 55:10; Amoxa 9:6) Beni Giriiketi shaafatun geliya haattay biitta giddon deꞌiya ano abbaappe kiyees giidi qoppoosona; qassi 300 layttaappe kase gakkanaashinkka asay hegaadan qoppees.

•   Ha wodiyan deꞌiya dereti issi wode ano abbaa garssan deꞌoosona. (Mazamure 104:6, 8) SHin dereta haꞌꞌi deꞌiyo sohuwan wottiday xoossata giidi daro hayseti yootoosona.

•   Geeshshatettaa naagiyoogee nuuni payya gididi deꞌanaadan maaddees. Israaꞌeela deriyawu imettida Higgee issi uri anhaa bochchikko meecettanaadan, asaappe asaa oyqqiya harggiyaara deꞌiya uri barkka dumma takkanaadaaninne sheeshshawu utti simmidi kammanaadan yootees. (Wogaabaa 11:28; 13:1-5; Zaarettido Wogaa 23:13) SHin Israaꞌeelatuyyo he higgeti imettido wode, Gibxxeti masunttaa pattanawu katta sheeshshaara walahettidabaa goꞌettoosona.

 Issi uri Geeshsha Maxaafaa wozanappe pilggikko, he oyshaa zaaroy chii giyaagaa gidiyoogaa akeekana. Geeshsha Maxaafay yootiyoobay saynisiyaara maayettenna giidi issoti issoti qoppiyo kaallidi deꞌiya amarida qofata beꞌa:

 Haysiyaa: Geeshsha Maxaafay salo gufanttoy 24 saatee deꞌiyo usuppun gallassatun merettiis giidi yootees.

 Tumaa: Geeshsha Maxaafay yootiyoogaadan Xoossay salo gufanttuwaa meretaa medhdhanaappe kase medhdhiis; he wodee ay keenakko Geeshsha Maxaafay qonccissidi yootenna. (Doomettaabaa 1:1) Qassi Doomettaabaa shemppo 1n odettida meretaa gallassay hagaa keena giyo wode gidennaagaa bessees. Saꞌaanne saluwaa muleera issi ‘gallassan’ medhdhidoogaa yootiya qofaykka Geeshsha Maxaafan deꞌees.—Doomettaabaa 2:4, NW.

 Haysiyaa: Maatay mittay awaa ayfiyaappe kase merettidoogaa Geeshsha Maxaafay yootees.—Doomettaabaa 1:11, 16.

 Tumaa: Geeshsha Maxaafay xoolinttetuppe issinno gidida awaa ayfiyaa deꞌiyo ‘saloti’ mittaa maataappe koyro merettidoogaa yootees. (Doomettaabaa 1:1) Saꞌan meretay merettido koyro ‘gallassi’ awaa ayfiyaappe guutta pooꞌoy saꞌan pooꞌiis. Heezzantto ‘gallassan’ saꞌaa yuushuwan deꞌiya carkkoy geeyiis; qassi mittay maatay saꞌan mokkanaadan gidiya pooꞌuwaa away pooꞌissiis. (Doomettaabaa 1:3-5, 12, 13) Hegaappe simmin awaa ayfee saꞌaa bollan qoncci beettiyoogaa doommiis.—Doomettaabaa 1:16.

 Haysiyaa: Geeshsha Maxaafay away saꞌaa yuushuwan yuuyiyoogaa yootees.

 Tumaa: Eranchchaa 1:5y hagaadan gees: “Awai mokkeesinne wullees; qassi naa77anttuwaakka mokkanau yaa mokkiyo sohuwaakko eesotees.” SHin ha qofay saꞌan eqqidi xeelliya urawu away yuuyiyaaba milatiyoogaa qonccissanaassa gidenna. Ha wodiyankka issi uri saꞌay awaa yuushuwan yuuyiyoogaa eriyaaba gidikkonne, “awai mokkeesinne wullees” gees.

 Haysiyaa: Geeshsha Maxaafay saꞌay pidda yaagees.

 Tumaa: Geeshsha maxaafay “sa7aa gaxaa” giyo wode saꞌan deꞌiya haaho sohuwaa yootanaassappe attin, saꞌay pidda gidiyoogaa woy saꞌawu gaxay deꞌiyoogaa yootanaassa gidenna. (Oosuwaa 1:8) Hegaadankka ‘saꞌaa oyddu zooziyaa’ giyoogee saꞌawu oyddu zoozee deꞌees giyoogaa gidenna. Hegaa nabbabiyo wode hegee kumetta alamiyaa qonccissiyaaba gidiyoogaa akeekoos.—Isiyaasa 11:12; Luqaasa 13:29.