Geeshsha Maxaafan “shemppuwaa” geetettida qaalay Ibraawettuwan nefesh, Giriikettuwan qassi pisiikihi geetettees. He qaalawu Ibraawetto birshshettay “shemppiya meretaa” giyoogaa; qassi Giriiketto birshshettay “paxa deꞌiyaaba” giyoogaa. a Yaatiyo gishshawu, shemppuwaa giyoogee asay hayqqiyo wode appe shaahettidi paxa deꞌiyaaba gidennan, paxa deꞌiya izaawa qonccissiyaaba. Geeshsha Maxaafay shemppuwaa giya qaalaa paxa deꞌiya izaawa qonccissanawu waati goꞌettiyaakko ane beꞌoos:

•   Xoossaa Yihooway koyro bitaniyaa, Addaama medhdhido wode, “bitanee paxa de7iya asa” gididoogaa Geeshsha Maxaafay yootees. (Doomettaabaa 2:7) Addaamessi shemppoy imettibeenna; shin I paxa shemppo woy asa gidiis.

•   SHemppoy qumaa maana, oosuwaa oottana, qumaa maanawu amottana, higgetussi azazettananne saamettana danddayiyoogaa Geeshsha Maxaafay yootees. (Wogaabaa 7:20, NW; 23:30, NW; Zaarettido Wogaa 12:20, NW; Roome 13:1, NW; Leemiso 25:25, NW) Hageeti paxa deꞌiya asi oottana danddayiyoobata.

SHemppoy hayqqennee?

 Akkay, shemppoy hayqqees. SHemppoy hayqqiyoogaa yootiya daro xiqiseti Geeshsha Maxaafan deꞌoosona. Amarida leemisota beꞌoos:

•   “Nagaraa oottiya shemppoi i bau haiqqana.”—Hizqqeela 18:4, 20.

•   Beni Israaꞌeelatu wode gita nagaraa oottida ‘shemppoy asaa giddoppe duuxxidi’ xayiyoogan qaxxayettees. (Kessaabaa 12:15, 19, NW; Wogaabaa 7:20, 21, 27, NW; 19:8, NW) Hegaa giyoogee, he uri ‘hayqqana bessees’ giyoogaa.—Kessaabaa 31:14, NW.

•   Anhaa giya qaalaa issi issi Geeshsha Maxaafaa xiqiseti, ‘hayqqida shemppuwaa’ giidi yootoosona. (Wogaabaa 21:11, NW; Qoodaabaa 6:6, NW) Daro Geeshsha Maxaafaa birshshettati he xiqisetun “anhaa” woy “hayqqida asaa” giya qaalata goꞌettikkonne, koyro xaafetida Ibraawetto birshshettay nefesh woy “shemppuwaa” giya qaalaa goꞌettees.

“SHemppuwaa” giyoogee “deꞌuwaa” giyoogaa

 Geeshsha Maxaafay “shemppuwaanne” “deꞌuwaa” giya qaalaa issi malabawu goꞌettees. Leemisuwawu, Iyyooba 33:22y (NW) “deꞌuwaa” giya qaalaa qonccissanawu “shemppuwaa” (nefesh) giya Ibraawetto qaalaa goꞌettiis. Hegaadankka, asaa shemppoy woykko deꞌoy qohettana woy hayqqana danddayiyoogaa Geeshsha Maxaafay yootees.—Kessaabaa 4:19, NW; Daannata 9:17, NW; Piliphphisiyuusa 2:30.

 “SHemppuwaa” giya qaalaa Geeshsha Maxaafay hegaadan qonccissiyo gishshawu, ‘shemppoy kiyiyoogaa’ yootiya issi issi xiqisetu qofaa akeekana danddayoos. (Doomettaabaa 35:18) He leemiso haasayay issi uri hayqqiyoogaa bessiyaaba. Issi issi Geeshsha Maxaafaa birshshettati Doomettaabaa 35:18, “wurssetta shemppuwaa A shemppaasu” giidi yootoosona.—Gud Niwus Transleshin; Niwu Jerusalem Baybil.

SHemppoy hayqqenna giyo ammanoy awuppe yiidee?

 Banttana Kiristtaane giyaageeti, shemppoy hayqqenna giyo ammanuwaa Geeshsha Maxaafaappe gidennan, beni Giriiketu timirttiyaappe ekkidosona. Issi maxaafay hagaadan gees: “SHemppoy nuuni shemppiyo carkkuwaara gayttidaba gidiyoogaa Geeshsha Maxaafay yootees; asay hayqqiyo wode ashoy saꞌan attin shemppoy shaahettidi harasaa bees giya qofay Geeshsha Maxaafan mulekka baawa. Ashoynne shemppoy dumma dummaba giya Kiristtaanetu timirttee beni Giriiketuppe ekkidaba.”

 Xoossay, shemppoy hayqqenna giyoogaa mala asa eratettaa, appe tamaariyoobaara walakkiyoogaa ixxees. Yaatiyo gishshawu, Geeshsha Maxaafay hagaadan giidi nuna zorees: “Asappe yiida eratettan, qassi mela cimuwan inttena ooninne omooddenna mala naagettite.”—Qolasiyaasa 2:8.