Wila giyo yelagay, “Neeni waata nabbabanaakko erennaba gidikko, Geeshsha Maxaafaa nabbabiyoogee salettiyaaba milatana danddayees” yaagiis.

 Geeshsha Maxaafaa nabbabiyoogan ufayttanawu waatana koshshiyaakko erana koyay? Ha huuphe yohoy nena hegawu maaddana.

•  Geeshsha Maxaafay yootiyoobaa beꞌiyoobadan qoppa

•  Loytta pilgga!

•  Ne laggeti giyoobaa

 Nabbabiyoobay hanishin beꞌiyoobadan qoppa. Hagaadan oottana danddayaasa:

1.   Neeni xannaꞌana koyiyo issibaa Geeshsha Maxaafaappe doora. Geeshsha Maxaafan woy Wonggeliyan xaafettida issi hanotaa woykko jw.org saytiyan Geeshsha Maxaafaa diraamadan nabbabidoogan deꞌiya issi qofaa doorana danddayaasa.

2.   He qofaa nabbaba. Hegaa nerkka nabbabanawu woykko laggetuura woy so asaara cenggurssaa xoqqu oottada nabbabana danddayaasa. Odettiyaabaa issi uri nabbabin, harati dumma dumma asay haasayidobaa nabbabana danddayoosona.

3.   Kaallidi deꞌiya qofaappe issuwaa woy daruwaa mala:

   •   He qofaa misiliyan qonccissa. Issuwaa kaallidi haray hanida dumma dummabata qonccissiya misileta medhdha. Misileti huuphphiyan huuphphiyan qonccissiyoobaa xaafa.

   •   Issi qofay haraara waani gayttiyaakko misiliyan bessa. Leemisuwawu, issi ammanettida uraabaa nabbabiyo wode A eeshshaanne I oottidobaa, I demmido anjjuwaara gattada bessa.

   •   He qofaa asawu odanawu koyiyo hanotan xaafa. He qofaa dumma dumma ginan qonccissada, haasayiyaageetanne he sohuwan deꞌiyaageeta oychchin eti zaaranabaa xaafa.

   •   He qofaa haasayidaageetuppe issoy iitabaa kuuyidaba gidikko, I loꞌꞌobaa kuuyiyaakko hananabaa qoppa. Leemisuwawu, PHeexiroosi Yesuusa kaddidoogaa qoppa. (Marqqoosa 14:66-72) PHeexiroosi he wode loꞌꞌobaa waati kuuyana danddayiiddi aggidee?

   •   Neeni oorattabaa giigissanawu danddayiyaabadan qoppikko, Geeshsha Maxaafan deꞌiya issi taarikiyaa diraamadan xaafanawu mala. He taarikiyaappe neeni tamaaridobaa xaafa.—Roome 15:4.

 Neeni ubbabaa pilggikko, xaafettidabaappe alꞌꞌobaa demmana danddayaasa. Issi issitoo, Geeshsha Maxaafan deꞌiya issi woy naaꞌꞌu qaalatuppe keehi maaddiyaaba tamaarana danddayaasa.

 Leemisuwawu, Maatiyoosa 28:7 Marqqoosa 16:7 qofaara gatta xeella.

•    Yesuusi erissiyo ashkkaratuyyoonne “PHeexiroosayyo” mati qonccanaagaa Marqqoosi yootidoy aybissee?

•  Eranawu maaddiyaabaa: Marqqoosi he wode he sohuwan deꞌenna; I ha qofaa PHeexiroosappe siyidoogee qoncce.

•  Demmiyo alꞌꞌobaa: Yesuusi aara zaaretti gayttanawu koyiyoogaa siyiyoogee PHeexiroosa minttettennan aggenna giyoy aybissee? (Marqqoosa 14:66-72) Yesuusi PHeexiroosawu tumu lagge gidiyoogaa waati bessidee? Neeni Yesuusaagaadan haratussi tumu lagge gidanawu waatana danddayay?

 Neeni Geeshsha Maxaafay yootiyoobaa beꞌiyoobadan qoppiyaabanne ubbabaa loytta pilggiyaaba gidikko, Geeshsha Maxaafaa nabbabiyoogan keehi ufayttana!