Ha huuphe yohoy xuufiyaa kiitaa kiittiyoogaa xeelliyaagan kaallidi deꞌiyaabata eranaadan nena maaddana

•  Oossi kiittay

•  Ay kiittay

•  Awude kiittay

Hegaa bollikka ha huuphe yohuwan:

•  Maaddiya qofaa

•  Xuufiyaa kiitaa kiittiyoogaa xeelliyaagan denddiya oyshata

 Daro yelagati laggetuura haasayanawu xuufiyaa kiitaa kiittiyoogee keehi koshshiya ogedan qoppoosona. Xuufiyaa kiitaa kiittiyoogan ne koyido asaara gayttana woy haasayana danddayaasa; shin nena yelidaageeti neeyyo paqqadikko hegaadan oottana danddayaasa.

 “Taaninne ta michchiya yelaga attuma naatuura haasayiyoogaa nu aaway dosenna. Nuuni haasayana koshshikkonne so silkkiyan harati siyishin haasayoos.”—Lenero.

 Neeni erana koshshiyaabaa: Ne silkkiyaa payduwaa coo oossinne ne immiyaaba gidikko metoy nena gakkana danddayees.

 “Ne silkkiyaa payduwaa neeni oossinne coo immiyaaba gidikko, neeni koyenna kiitati woy misileti neeyyo yaana danddayoosona.”—Iskooto.

 “Mattuman neeppe dummatiya urawu ubbatoo kiitaa xaafada kiittiyaaba gidikko, he uraara nena sohuwaara siiqoy oyqqana danddayees.”—Istefeno.

 Geeshsha Maxaafay hagaadan gees: “Cincca asi iitaa be7idi, qosetti aattees.” (Leemiso 22:3) Issi issiban naagettiyoogan, gita metuwaappe nena naagana danddayaasa.

 Tumuppe hanidabaa: “Issi naꞌaynne taani lagge; qassi aara daro kiitaa xaafettida. He naꞌaara laggetettaappe attin harabi baawa gaada qoppido gishshawu, hegaadan oottiyoogee meto medhdhees gaada qoppabeykke. SHin I tana siiqidoogaa tawu yootiis. Aadhdhidabaa qoppiyo wode, he naꞌaara hegaa keena matattananne kiitaa xaafettana koshshenna shin.”—Melindo.

 Akeeka: Melinda he naꞌay bana siiqidoogaa erido gishshawu eta laggetay duuxxees gaada qoppay?

 Neeni kiittanawu xaafidobaa zaarettada xaafa! Melindinne naꞌaa giddon deꞌiya laggetettay duuxxennaadan A harabaa ay oottana danddayishin attidee?

 Kiitaa kiittiyoogee metennaba; qassi kiitaa ekkiyoogee ufayssiyaaba, shin kiitaa ne kiittido uri ne xaafidobaa bala ogiyan akeekana danddayees .

 Neeni erana koshshiyaabaa: xaafidi kiittidobaa asay bala ogiyan akeekana danddayees.

 “Kiitaa xaafada kiittiyoogan, haray atto misiliyaa gujjada kiittiyaaba gidikkokka, neessi siyettiyaabaanne ne haasayaa shonggaa qonccissana danddayakka. Qassi hegaa asay balan akeekanawukka danddayees.”—Briano.

 “Attuma naatuyyo xaafidi kiittido kiitaa gaasuwan eta sunttay moorettidonne hegee eti lambbeechchiya asadan qoodettanaadan oottido macca naata taani erays.”—Lauro.

 Geeshsha Maxaafay hagaadan gees: “Xillo asi haasayanaappe kasetidi qoppees.” (Leemiso 15:28) Ha xiqisiyaappe ay tamaariyoo? Kiittanawu ne xaafidobaa ‘kiittanaappe’ kase zaara zaarada nabbaba

 Kiitaa kiittiyo wode issoti issoti giyoogaadan gidiyoogan xaafuwaa kandduwaa kaalliyoogan akeekanchcha gidiyoogaa bessana danddayaasa.

 Neeni erana koshshiyaabaa: Neeni xaafada kiittiyo wode ne loꞌꞌo kandduwaa maaran kiittana xayikko, ne laggeti ne hanotan ufayttiyoogaappe lambbeechchanawu koyiyaabadan qoppidi neeppe haakkanaadan oottana danddayoosona.

 “kiitaa kiittiyoogaa xeelliyaagan kessido higgiyaa sohuwaara dogana danddayoos. Asaara haasayaydda woy kahuwaa mayidda kiitaakka kiittayiis.”—Allisono.

 “Kaamiyaa laaggiiddi kiitaa kiittiyoogee keehi qohiyaaba. Ne ayfiya ogiyaappe wora zaarikko daafay nena gakkana danddayees.”—Anno.

 Geeshsha Maxaafay hagaadan gees: “Ubbabau wodee de7ees, . . . co77u gaanau wodee de7ees; qassi haasayanaukka wodee de7ees.” (Eranchchaa 3:1, 7) Ha xiqise haasayiyo wode haniyoogaadan kiita kiittiyo wodekka hanees!

Oossi kiittay

•  ;-) Nena yelidaageeti kessido kaaletuwaa azazetta.—Qolasiyaasa 3:20.

•  ;-) Ne silkkiyaa payduwaa ooyyoonne coo immoppa. Silkke payduwaa gujjin ne buzo allaalliyaa immanawu koyennaagaa bonchchuwan yoota; hegee neeni kayma asa gidanaadan maaddana.

•  ;-) Lambbeechiyoogaa bessiya kiitaa kiittiyoogaa meeze oottoppa. Hegee neeni issi uraa siiqanaadan oottees; qassi yaatiyoogee neeni hanqqettanaadan oottana danddayees.

 “Ta silkkiyan wottiyoobaara gayttidaagan tana yelidaageeti loohissido gishshawu taani silkkiyan wottiyo asaa payduwaara gayttidaagan likkebaa kuuyanaagaa ammanettoosona.”—Briano.

Ay kiittay

•  ;-) Kiitaa xaafanaappe kase, hagaadan nena oychcha, ‘Ha allaalliyaa xeelliyaagan kiitaa xaafada kiittiyoogee likkee?’ Silkkiyaa dawaliyoogee woy he uraara gayttidi haasayiyoogee loꞌꞌo gidana danddayees.

•  ;-) He uraara gayttada haasayennabaa aybanne kiitaa xaafada kiittoppa. Saaro giyo 23 laytta naꞌiya hagaadan gaasu: “Asi siyishin haasayennabaa xaafidi kiittana koshshenna.”

 “Issi uray neeyyo mattumawu denttettiya misiliyaa kiittikko, nena yelidaageetuyyo yoota. Hegee neeyyo naago gidana, qassi nena yelidaageeti nenan ammanettana.”—Sirvana.

Awude kiittay

•  ;-) Ne silkkiyaa awude awude goꞌettanaakko kuuya. Oliviyo giyo yelagiya hagaadan gaasu: “Kahuwaa miyo wode woy xannaꞌiyo wode silkkiyaa ta matan wottikke. Gubaaꞌee shiiqotun deꞌishin asi tawu kiitaa xaafin hegaa xeellanawu paacettenna mala ta silkkiyaa gorddays.”

•  ;-) Qarettiyaagaa gida. (Piliphphisiyuusa 2:4) Issi uraara gayttada haasayanawu maliyo wode, awu kiitaa xaafada kiittoppa.

 “Ta laggetuura issippe deꞌiyo wodiyan keehi koshshiyaabaa gidana xayikko asayyo kiitaa kiittennan agganawu taassi higgiyaa kessaas. Qassi kase loytta erettenna asawu ta silkke payduwaa immikke.”—Janellyo.