Aaway ba laappun laytta naꞌaara haasayiiddi deꞌiyaabadan qoppa. I, “Beni, beni Xoossay saꞌaanne an deꞌiya ubbabaa, qassi awa ayfiyaa, aginaanne xoolintteta medhdhiis” yaagees. Naꞌay guuttaa qoppi ekkidi, “Abbaa, Xoossaa medhdhiday shin oonee?” giidi oychchees.

Aaway, “Xoossaa ooninne medhdhibeenna. I ubba wodekka deꞌees” yaagidi zaarees. Ha qonccissoy naꞌaa haꞌꞌissawu ammanttees. SHin I gitatiyo wode, he oyshaa zaarettidi qoppiyoogaa aggenna. He naꞌay issi urawu doomettay deꞌennan waanidi aggana danddayiyaakko akeekanawu metootees. Saluwawu saꞌawukka doomettay deꞌees. ‘Yaatin, Xoossaa medhdhiday oonee?’ giidi qoppees.

Geeshsha Maxaafaa zaaroy aybee? Leemisuwan qonccida aawaa zaaruwaa mala. Muusee hagaadan giidi xaafiis: “Godau, . . . dereti merettanaappe kase, woikko neeni sa7aa oottanaappe kase, merinaappe merinaa gakkanaayyookka neeni Xoossaa.” (Mazamure 90:1, 2) Hananabaa yootiya Isiyaasikka, “Erabeikkii? Siyabeikkii? GODAI merinaa Xoossaa; i biittaa ubbaakka medhdhidaagaa” yaagiis. (Isiyaasa 40:28) Hegaadankka, Yihudaa dabddaabiyan, Xoossaay ‘aadhdhida wode ubban’ deꞌidaagaa gidiyoogee odettiis.—Yihudaa 25.

He xiqiseti, PHawuloosi abaa yootidoogaadan, Xoossay ‘merinaa Kawo’ gidiyoogaa bessoosona. (1 Ximootiyoosa 1:17) Hegaa giyoogee nuuni aadhdhida wodiyaa ay keena guyye xeellikkokka, Xoossay ubba wode deꞌees giyoogaa. Qassi I sinttappekka muletoo deꞌees. (Ajjuutaa 1:8) I Ubbabaa Danddayiya Xoossaa gidanaadan oottiday merinawu deꞌana danddayiyoogaa.

Nuuni ha qofaa akeekanawu metootiyoy aybissee? Nu baree qantta gidiyoogee wodiyaa xeelliyo hanotay Yihoowaagaappe keehi dummatanaadan oottido gishshataassa. Xoossay merinawu deꞌiyo gishshawu, issi shaꞌu layttay awu issi gallassa mala. (2 PHeexiroosa 3:8) Leemisuwawu, mexi 50 gallassa xallaa deꞌiya gumbburoy 70 woy 80 layttaa deꞌiya nu bariyaa akeekana danddayii? Mule danddayenna! Hegaadan, medhdhida Gita Xoossaara geeddarssiyo wode nuunikka gumbburo mala gidiyoogaa Geeshsha Maxaafay yootees. Nu qofaykka A qofaappe keehi laafa. (Isiyaasa 40:22; 55:8, 9) Yaatiyo gishshawu, Yihoowaara gayttidaagan asay wurssi erennabay deꞌiyoogee maalaalissiyaaba gidenna.

Xoossay merinawu deꞌiyoogaa xeelliyaagan eranawu metootikkokka, hegee bessiya qofa gidiyoogaa akeekoos. Xoossaa medhdhida uri deꞌiyaakko, he uri Medhdhidaagaa gidees. SHin Geeshsha Maxaafay ‘ubbabaa medhdhidaagee’ Yihoowa gidiyoogaa yootees. (Ajjuutaa 4:11) Qassi saloynne saꞌay baynna wodee deꞌiyoogaa eroos. (Doomettaabaa 1:1, 2) Yaatin awuppe yiidee? Hegaa Medhdhida uri kasetidi deꞌana bessees. Xoossay ba Naꞌaanne kiitanchchatu mala qoppi danddayiya hara ay meretaappekka kase deꞌees. (Iyyooba 38:4, 7; Qolasiyaasa 1:15) I koyro barkka deꞌiyoogee qoncce. I deꞌiyoy merettidi gidenna; appe kaseti deꞌidi, A medhdhana danddayiyay baawa.

Nu deꞌana danddayidoogee, qassi saloynne saꞌay ubbay deꞌiyoogee merinaa Xoossay deꞌiyoogawu markka. Aaho saluwaanne saꞌaa medhdhidaagee, qassi hegawu higgiyaa kessida Xoossay ubba wode deꞌiyaagaa gidana. Ubbawu deꞌuwaa shemppi immidaagee A gidana.—Iyyooba 33:4.