Geeshsha Maxaafay Asay Laamettanaadan Oottees

Sloveeniyan deˈiya issi bitanee keehi daro ushshaa uyiyoogaa agganaadan aybi maaddidee?

“Taani kase daassa barmmeele mala”—LUKA SHUTIS

YELETTIDO LAYTTAA: 1975

YELETTIDO BIITTAA: SLOVEENIYAA

KASE TAARIKIYAA:

KASE DEˈUWAA: Taani Sloveeniyaa waanna kataman Liyubliyanan yelettaas. Tawu layttay oyddaa gidanaashin ufayssiya deˈuwaa deˈaas. He wode ta aaway bana barkka woriis. He daafaappe simmin, taayyoonne ta bayra ishawu koshshiyaabaa kunttanawu ta aayyiyaa minna oottaasu.

Taayyo layttay 15 gidido wode, ta aaye aayeera deˈanawu baas. Ta laggetuppe daroti I shooron deˈiyo gishshawu, iira deˈiyoogan ufayttaas. Nu soogaappe aaruwan ta koyoogaadan hanaydda iira deˈaas. Tawu layttay 16 gidido wode, Qeeraanne Woggaa gallassi ushshaa uyiya asatuura gayttiyoogaa doommaas. He wode ta huuphiyaa dichchays, shori baynna maayuwaa maayaysinne sijaaraa uyays.

Taani jallissiya dumma dummabaa goˈettikkonne, mattoyiya ushshaa uyiyoogaa keehi dosays. Daro takkennan, amarida burccukko ushshaa uyiyoogaa aggada, issi xaramuseppe daruwaa uyiyoogaa doommaas. Taani daro ushshaa uyikkonne, mattottidaba milatikke. Taani uyidoogee darotoo ushshaa peenuwan erettees. SHin, taani daro woyniyaa, biiraanne vodikaa uyidoogaa ooninne erenna.

Taaninne ta laggeti darotoo duriiddinne uyiiddi aqoos. Taani etaagaappekka daruwaa uyikkokka, eti soo baanaadan maaddays. Issi gallassi ta laggetuppe issoy tana daassa barmmeele mala giishshin siyaas. Sloveeniyan keehi daro ushshaa uyiya asa hegaadan goosona. Hegee tana keehi azzanttiis.

Taani ta deˈuwaabaa qoppiyoogaa doommaas. Taani aynne pattikke gaada qoppiyoogaa doommaas. Ta deˈuwan maaddiyaaba aybanne oottennabadan qoppaas.

TAANI LAAMETTANAADAN GEESHSHA MAXAAFAY MAADDIDO OGIYAA: He wode, tanaara tamaariya issi naˈay ba kase eeshshaa laammidoogaa akeekaas. I laamettidoogaa beˈada tanaara tukkiyaa uyanaadan A shoobbaas. Nuuni haasayishin, I Yihoowa Markkatuura Geeshsha Maxaafaa xannaˈiyoogaa doommidoogaa yootiis. I tamaaridobaa tawu yootiis. Qassi taani woosa keettaa ba erenna gishshawu woy Geeshsha Maxaafaa nabbaba erenna gishshawu, I yootido ubbabay ta erennaba. Taani Yihoowa Markkatuura shiiqiyoogaanne etaara Geeshsha Maxaafaa xannaˈiyoogaa doommaas.

Taani ta deˈuwan laamettanawu koyanaadan oottiya darobaa Geeshsha Maxaafaappe tamaaraas. Leemisuwawu, Geeshsha Maxaafay ‘wurssetta gallassa’ giyo wodiyan nuuni deˈiyoogaa eraas. (2 Ximootiyoosa 3:1-5) Xoossay iita asata xayssanaagaanne loˈˈo asati gannatiyan merinawu deˈanaadan oottanaagaakka tamaaraas. (Mazamure 37:29) Hegee taani he loˈˈo asatun qoodettanawu, kase oottiyo iitabaa agganawu koyanaadan maaddiis.

Taani Geeshsha Maxaafaappe tamaaridobaa ta laggetussi yootiyoogaa doommaas. Taani yootidobaa gaasuwan daroti tana qilliiccikkonne, eti yaatidoogee taani qoppabeenna ogiyan tana maaddiis. Hegee eti tawu tumu lagge gidennaagaa akeekanaadan oottiis. Ta ushshaa amaliyawu issi gaasoy he asatuura laggetiyoogaa gidiyoogaa akeekaas. Eti Qeeraanne Woggaa gallassi mattottanawu kumetta saaminttaa yeemuwan naagoosona.

Taani he asata aggada, Yihoowa Markka gidida ta ooratta laggetuura wodiyaa aattiyoogaa doommaas. Eti Xoossaa siiqiyoonne I kessido maaraadan deˈanawu koyiyo gishshawu, tana keehi minttettidosona. Guyyeppe, ushshay tawu amale gidiyoogee attiis.

TAANI GOˈETTIDO HANOTAA: Haˈˈi ufayttanawu taassi mattoyiya ushshay koshshenna gishshawu, Yihoowa galatays. Taani kaseegaadan deˈidaakko ta deˈoy ay keena moorettanaakko erikke. SHin haˈˈi ta deˈoy kaseegaappe loˈˈidoogaa ammanettays.

Aadhdhida laappun layttawu Sloveeniyan Yihoowa Markkatu macara biiruwan haggaaziyo bonchcho maataa demmaas. Taani Yihoowa eridoogeenne ayyo haggaaziyoogee ta deˈuwan tumuppe ufayttanaadan oottiis.