PAACCIYAABAA: Musiyoogaanne yedetaa malatiya kare baggaara paacciyabati Geeshsha Maxaafaa xayssibeekkona. SHin, Geeshsha Maxaafaa duuqqiyanne birshshiya issi issi asati an deꞌiya qofaa laammanawu malidosona. Issi issitoo, eti bantta wogay Geeshsha Maxaafaara maayettanaadan oottiyoogaa aggidi Geeshsha Maxaafay bantta wogaara maayettanaadan oottanawu baaxetidosona. Amarida leemisota beꞌite:

• Goynniyo sohuwaa: Kiristtoosa yeletaappe kase oyddanttanne naaꞌꞌantta xeetu layttaa giddon Sammaaretu Higgiya maxaafata xaafidaageeti Kessaabaa 20:17​ppe kaallidi ha qofaa gelissidosona: “Aargaareezemena deriyan, qassi yaani yarshshiyo sohuwa keexxa.” Hegaa gishshawu, Samaare biittaa asati eti “Aargaareezemen,” woykko Geriizaane deriya bolli Beeta Maqidasiya keexxidoogaa kaafanaadan oottanawu koyidosona.

• Sillaasiyaa timirttiyaa: Geeshsha Maxaafay xaafettidi wuri simmin 300ppe guuxxiya layttatuppe guyyiyan Sillaasiyan ammaniya issi xaafeti 1 Yohaannisa 5:7 bolli “saluwan, Aawaa, Qaalaanne, Geeshsha Ayyaanaa: qassi ha heezzati issuwa” giya qaalata gujjidosona. He qofa qashoy koyro xaafettida xuufiyan baawa. Geeshsha Maxaafaa eranchchay Birus Metzgeri yootiyoogaadan, he qaalati “usuppuntta xeetu layttaappe haa simmin , Galꞌꞌa Laatiiniyaninne Vulgeettiyan xaafettida xuufetun dari dari biidosona.”

• Xoossaa sunttaa: Geeshsha Maxaafaa birshshiyaageetuppe daroti, Ayhudatu bala ammanuwa likkebadan qoodidi, Xoossaa sunttaa Geeshsha Maxaafaappe xayssanawu kuuyidosona. Eti he sunttaa “xoossaa” woy “Godaa,” giyaagaa mala sunttatun laammidosona. Ha sunttati qassi Geeshsha Maxaafaa giddon Medhdhidaagaa xalaala gidennan, asaa, eeqata, haray attoshin Dabloosakka qonccissoosona.—Yohaannisa 10:34, 35; 1 Qoronttoosa 8:5, 6; 2 Qoronttoosa 4:4. a

GEESHSHA MAXAAFAY WAANI ATTIDEE? Koyruwan, Geeshsha Maxaaafaa duuqqidaageetuppe issoti issoti shenehoo giyaageeta woy ubba cimmiyaageeta gidikkonne, hara corati keehi eranchchanne akeekanchcha. Usuppunaappe biidi tammu xeetu M.L. gakkanawu Masoreta giyo xaafeti Ibraawetto Geeshsha Maxaafaa duuqqidi Masooreetike xuufiyaa giyoogaa giigissidosona. Eti ayba balinne gelennaadan oottanawu qaalatanne machchallata akeekan qoodidi xaafidosona. Eti goꞌettiyo waanna xuufiyan bali deꞌees giidi sirikko, hegaa miyyessan malaatoosona. Masoreti Geeshsha Maxaafaa qofaa laammanawu koyibookkona. Proofeeseree Moshe Goshen-Gatistani hagaadan giidi xaafiis: “Geeshsha Maxaafaa qofaa eriiddi laammiyoogaa eti wolqqaama baladan xeelloosona.”

Naaꞌꞌanttuwan, ha wodiyan deꞌiya kushiyan xaafettida wottiyoobi baynna xuufeti, Geeshsha Maxaaafaa eranchchati balaa shaakki eranawu maaddoosona. Leemisuwawu, haymaanootiyaa kaalettiyageeti eti goꞌettiyo Laatiine maxaafati tumanchcha Geeshsha Maxaafaa qofaa oyqqidosona giidi xeetan qoodettiya layttawu tamaarissidosona. SHin, 1 Yohaannisa 5:7n, nuuni ha xuufiyan kase beꞌido worddo qaalata gujjidosona. He balay King Jems Vershin giyo kehi erettida Inggilizetto maxaafankka geliis! Gidoppe attin, kushiyan xaafettida hara maxaafati beettido wode ay qonccissidonaa? Birus Metzgeri hagaadan giidi xaafiis: “1 Yohaannisa 5:7n deꞌiya menttoy Laatiiniyanappe attin, beni kushiyan xaafettida xuufetun ubbankka hegeetikka (Siiriyan, Koptiken, Armeniyan, Toophiyan, Araban, Slavooniyan) baawa.” Hegaa gishshawu, zaaretettidi xaafettida King Jems Vershineenne hara Inggilizetto Geeshsha Maxaafati he bala qofaa xayssidosona.

Kushiyan xaafettida ceega maxaafati Geeshsha Maxaafaa qofay naagettidi deꞌiyoogaa bessiyoonaa? Maxine Abbaa Xaattati 1947n beettido wode, eranchchati Ibraawetto Masorete xuufeta shaꞌu layttappe kase xaafettida Geeshsha Maxaafaa xaattatun deꞌiyabaara geeddarssidosona. Maxine Abbaa Xaattata harummiya citan deꞌiya uri, issi xaattay “Geeshsha Maxaafaa xuufeti shaꞌaappe dariya layttaa giddon Ayhuda duuqanchchatu kushiyan xaafettidi kanttido hanotay keehi ammanttiyagaanne akeekidi oottidoba gidiyogawu aynne sirissenna naqaashaa immees” giidi kuuyiis.

Ayirlandde biittan Dubliinen deꞌiya Chester Biite Maxaafa Keettay, Kiristtaane Giriiketto Geeshsha Maxaafata ubbaa giyogaa keena maxaafata oyqqida pappiireseta oyqqiis. Hegeetu giddon Geeshsha Maxaafay xaafettidi wuroosappe mexi 100 layttappe, naaꞌꞌantto xeetu M.Lppe doommidi kushiyan xaafettida maxaafati deꞌoosona. Qassi Ze Anker Baybil Dikshineeree hagaadan gees: “He pappiireseti xuufetubaa daro ooratta naqaashaa immiyaba gidikkonne, Geeshsha Maxaafaa xuufeti issi wodiyaappe hara wodiyawu pinniyo wode maalaalissiya hanotan laamettennan takkidoogaakka bessoosona”.

HEGEE AY DEMISSIDEE?: Kushiyan xaafettida qoodi baynna Geeshsha Maxaafaa xuufeti beettidoogee A mooriyoogaappe yaa loyttiis. Ser Firederik Keniyoni Kiristtaane Giriiketto Geeshsha Maxaafaa xeelliyaagan hagaadan giidi xaafiis: “Abaa markkattiya hegaa keena gamꞌꞌidanne cora naqaashi deꞌiyo hara maxaafi baawa, qassi zuubbarennan nuukko gakkanawu yiida xuufee wotoy baynnaba gidiyoogaa ay eranchchikka kashi geenna.” Qassi Ibraawetto Geeshsha Maxaafaa xeelliyaagan Wiiliyam Heneri Griin giyo eranchchay hagaadan giis: “Beni wode oosettidabaappe awugeenne hegaa keeni bali baynna hanotan yeletaappe yeletawu pinnibeenna.”