TIMIRTTE 01
Geeshsha Maxaafay Nena Waati Maaddana Danddayii?
Nuuni ubbay deꞌuwaa, metuwaa, hayquwaanne sinttanaabaa xeelliyaagan loytti eranawu koyoos. Nuussi koshshiyaabawu miishshaa demmanawu woy so asaa deꞌuwan ufayttanawu metiyaabaa giigissanawukka nuussi maadoy koshshees. Geeshsha Maxaafay daro asay bantta deꞌuwan oychchiyo keehi koshshiya oyshatussi zaaruwaa demmanaadan maaddiyoogaa xalla gidennan, deꞌuwan galla galla maaddiya zoriyaa eta zorees. Geeshsha Maxaafay asa ubbaa maaddana danddayees gaada qoppikkii?
1. Geeshsha Maxaafay zaaruwaa yootiyo amarida oyshati awugeetee?
Geeshsha Maxaafay ha keehi koshshiya oyshatussi zaaruwaa yootees: Deꞌoy waani doommidee? Deꞌuwawu halchchidobi aybee? Asay waayettiyoy aybissee? Asay hayqqiyo wode waanii? Ubba asay sarotettaa koyishin, olay keehi daridoy aybissee? Saꞌan sinttappe aybi hananee? Hegaa mala oyshatu zaaruwaa demmanaadan Geeshsha Maxaafay nuna minttettees; qassi miilooniyan qoodettiyaageeti he oyshatussi aliya zaaruwaa appe demmidosona.
2. Nuuni deꞌuwan ubba galla ufayttanaadan Geeshsha Maxaafay nuna waati maaddana danddayii?
Geeshsha Maxaafay nuna loꞌꞌobaa zorees. Leemisuwawu, so asay waanidi tumuppe ufayttanaakko tamaarissees. Geeshsha Maxaafay nuuni unꞌꞌettiyo wode waatanaakko, qassi nu oosuwan waani ufayttanaakko yootees. Geeshsha Maxaafay qommoora denttidobatanne hara darobaa xeelliyaagan tamaarissiyoobaa nuuni issippe ha maxaafaa tobbiyo wode neeni erana. ‘Xoossaa maxaafa ubbay [Geeshsha Maxaafan deꞌiya ubbabay] maaddiyoogaa’ neeni maayettana danddayaasa.—2 Ximootiyoosa 3:16.
Ha maxaafay Geeshsha Maxaafaa gishshaa giigidaba gidenna. Geeshsha Maxaafaa neeni nerkka pilgganaadan ha maxaafay minttettees. Hegaa gishshawu, neeni ha timirttetun deꞌiya xiqiseta nabbabanaadaaninne eta ne tamaariyoobaara geeddarssanaadan nuuni nena minttettoos.
LOYTTA AKEEKA
Geeshsha Maxaafay asaa waati maaddiyaakko, A nabbabiyoogan neeni waana ufayttana danddayiyaakko, qassi A akeekanawu maadoy koshshiyoy aybissakko yuushsha qoppa.
3. Geeshsha Maxaafay nuna kaalettana danddayees
Geeshsha Maxaafay keehi pooꞌiya pooꞌo mala. I nuuni loꞌꞌobaa kuuyanaadan maaddananne sinttappe hananabaa nuuyyo yootana danddayees.
Mazamure 119:105 nabbabite; yaatidi ha oyshata tobbite:
-
Ha mazamuriyaa xaafidaagee Geeshsha Maxaafaabaa ay qoppidee?
-
Geeshsha Maxaafaa xeelliyaagan ne qofay aybee?
4. Nu oychchiyo oyshata Geeshsha Maxaafay zaarana danddayees
Issi maccaasiyaa bana daro layttawu keehi qofissida oyshatussi Geeshsha Maxaafaappe zaaruwaa demmaasu. BIIDUWAA beꞌite; yaatidi kaallidi deꞌiya oyshata tobbite.
-
Ha biiduwan, maccaasiyo qofissida oyshati awugeetee?
-
Geeshsha Maxaafaa xannaꞌiyoogee O waati maaddidee?
Nuuni oyshata oychchanaadan Geeshsha Maxaafay nuna minttettees. Maatiyoosa 7:7 nabbabite; yaatidi kaallidi deꞌiyaabaa tobbite:
-
Geeshsha Maxaafay zaarana danddayiyo nena qofissiya oyshati deꞌiyoonaa?
5. Geeshsha Maxaafaa nabbabiyoogee nena ufayssana danddayees
Geeshsha Maxaafaa nabbabiyoogee daro asaa ufaysseesinne goꞌꞌees. BIIDUWAA beꞌite; yaatidi kaallidi deꞌiya oyshata tobbite.
-
Ha biiduwan neeni beꞌido yelagati nabbabiyoogaa waati xeelliyoonaa?
-
Geeshsha Maxaafaa nabbabiyoogaa eti haꞌꞌi kaseegaappe dumma ogiyan xeelliyoy aybissee?
Geeshsha Maxaafay nuna minttettiyaabaanne nuussi hidootay deꞌanaadan oottiyaabaa tamaarissana danddayiyoogaa yootees. Roome 15:4 nabbabite; yaatidi ha oyshaa tobbite:
-
Ha xiqisee yootiyoobaa loytta eranawu koyay?
6. Nuuni Geeshsha Maxaafaa akeekanaadan harati nuna maaddana danddayoosona
Daroti banttarkka Geeshsha Maxaafaa nabbabiyoogaa bolli, haratuura tobbiyoogee maaddiyoogaa akeekidosona. Oosuwaa 8:26-31 nabbabite; yaatidi ha oyshaa tobbite:
-
Nuuni Geeshsha Maxaafaa waati akeekana danddayiyoo?—Paydo 30nne 31 xeella.
Geeshsha Maxaafaa akeekanawu Toophphiyaa bitaniyawu maadoy koshshiis. Geeshsha Maxaafaa haratuura tobbiyoogee maaddiyoogaa ha wodiyan daro asati akeekoosona
ISSI ISSI ASAY HAGAADAN GEES: “Geeshsha Maxaafaa xannaꞌiyoogee coo wode wurssiyooba.”
-
Neeni woyguutee? Aybissi?
AY AKEEKADII?
Geeshsha Maxaafay deꞌuwan ubba galla maaddiyaabaa zorees, keehi koshshiya oyshata zaarees, qassi asaa minttetteesinne etawu hidootay deꞌanaadan oottees.
Zaaretuwaa
-
Nuuni Geeshsha Maxaafaappe ay mala zoriyaa demmana danddayiyoo?
-
Geeshsha Maxaafay zaaruwaa yootiyo amarida oyshati awugeetee?
-
Neeni Geeshsha Maxaafaappe tamaarana koyiyoobay aybee?
PILGGA
Geeshsha Maxaafay ha wodiyan nuna maaddiyaabaa zorees.
“Geeshsha Maxaafay Tamaarissiyoobay Ay Wodenne Aadhdhida Eratetta” (Wochchiyo Keelaa Paydo 1 2018)
Naatettaappe doommidi I qoppiyo iita qofaara baaxetida issi bitaniyaa Geeshsha Maxaafay waati maaddidaakko akeeka.
So asaa deꞌuwaa xeelliyaagan Geeshsha Maxaafay yootiyo maaddiya zoriyaa pilgga.
“So Asaa Ufayssawu Maaddiya 12 Zoriyaa” (Beegottite! Paydo 2 2018)
Ha alamiyaa tumu haariyay oonakko daro asay qoppiyo bala qofaa Geeshsha Maxaafay waati suurissiyaakko tamaara.
Geeshsha Maxaafaa Xannaꞌana Koshshiyoy Aybissee?—Kumetta Biiduwaa (3:14)
Hageeta Beꞌadii?
ASAY DAROTOO OYCHIYO OYSHATA
Yihoowa Markkati Geeshsha Maxaafaa Xannaꞌissiyoy Ayba Ogiyaanee?
Yihoowa Markkati miishsha qanxxissennan xannaꞌissiyo prograamiyan, Geeshsha Maxaafaa birshshettaa awugaakka goꞌettana danddayaasa. Ne so asa ubbaynne ne laggetikka nenaara xannaꞌanaadan shoobbana danddayaasa.
