Naꞌaa yeliyoogee azinaanne machiyo ufayssiyaabakka metiyaabakka gidana danddayees. Koyro naꞌaa yeliyo wode, he naꞌaa xeellanawu daro wolqqaanne wodiyaa wurssiyoogee intte garamettanaadan oottana danddayees. Hegee intte xiskko xayidi, unꞌꞌettanaadan oottiyo gishshawu, intte dabbotay moorettana danddayees. Neeninne ne aqo laggee intte naꞌaa xeellanawu, qassi intte dabbotay moorettennaadan oottanawu issi issibaa giigissana koshshees. Intte he metuwaa suurissanaadan Geeshsha Maxaafaa zoree waati maaddana danddayii?

GEESHSHA MAXAAFAY YOOTIYOOBAA: “Siiqoi danddayanchcha. Siiqoi kehees.” Qassi “baassi bessennabaanne oottenna. Uuzettenna.” (1 Qoronttoosa 13:4, 5) Neeni aayo gidikko, ne koyro naꞌaa xeellaydda daro wodiyaa aattiyoogee qoncce. SHin ne azinay neeni a sheneho giidobadan qoppana danddayiyo gishshawu, aarakka wodiyaa aattana bessiyoogaa dogoppa. Neeni danddayanchanne keha gidiyoogan ayyo qoppiyoogaa bessa; qassi ikka naꞌaa xeellanaadan ootta.

“Azinatoo, intte maccaasati daafuranchcha mereta gidiyoogaa eridi, etaara issippe de7ite.” (1 PHeexiroosa 3:7) Ne machiyaa intte naꞌaa xeellanawu keehi daafuriyoogaa akeeka. A ooratta aawatettaa ekkido gishshawu, metootana, xalalana woy ubba unꞌꞌettana danddayawusu. A issi issitoo ne bolli yiillotana danddayawusu; gidikkokka, “wolqqaama asa gidiyoogaappe, hanqqettanau eesotenna asa gidiyoogee lo77o” gidiyo gishshawu, woppa asa gida. (Leemiso 16:32) Akeekancha gida; qassi o koshshiyaaban maadda.—Leemiso 14:29.

AY OOTTANA DANDDAYAY?

• Aawaa: Naꞌaa xeelliyoogan ne keettaayyiyo maadda; qammikka hegaadan ootta. Ne keettaayeeranne ne naꞌaara issippe wodiyaa aatta; harabaa oottaydda daro wodiyaa wurssoppa

• Aayyiyo: Ne keettaaway naꞌaa xeelliyoogan nena maaddanawu koyikko, eeno ga. I hegaa oottiiddi baliyaaba gidikko, a boriyoogaappe waati oottana danddayiyaakko kehatettan bessa

GEESHSHA MAXAAFAY YOOTIYOOBAA: “Eti naa77ai issi asho gidoosona.” (Doomettaabaa 2:24) Neeni naꞌa yelidaba gidikkokka, neeninne ne aqo laggee “issi asho” gidiyoogaa hassaya. Intte dabbotay mino gidanaadan baaxetite.

Maccaasatoo, intte azinay inttena maaddiyo wode galatiyaageeta gidite. Intte nashshidi haasayiyoobay ‘pattiyaaba’ gidana danddayees. (Leemiso 12:18) Azinatoo, intte machota keehi siiqiyoogaanne xoqqu oottidi xeelliyoogaa etawu yootite. Eti so asawu qoppidi oottiyoobawu eta nashshite.—Leemiso 31:10, 28.

“Ooninne hara asa go77iyaabaa qoppoppe attin, harai atto issoinne bana go77iyaabaa qoppoppo.” (1 Qoronttoosa 10:24) Ubba wode ne aqo laggiyaa ufayssiyaabaa ootta. Intte azinanne macho gidiyo gishshawu, issoy issuwaara haasayanawu, issoy issuwaa galatanawunne ezgganawu wodiyaa bazzite. Asho gaytotettaara gayttidaagan intte xallaa siiqiyaageeta gidoppite. Intte aqo laggiyawu koshshiyaabaakka qoppite. Geeshsha Maxaafay, “Zoretan teqettanaappe attin, issoi issuwaa diggoppite” yaagees. (1 Qoronttoosa 7:3-5) Hegaa xeelliyaagan intte naaꞌꞌay zorettite. Intte danddayanchanne akeekancha gidiyoogee intte dabbotay minnanaadan oottees.

AY OOTTANA DANDDAYAY?

• Intte naaꞌꞌaa xallay issippe aattiyo wodiyaa bazzana koshshiyoogaa dogoppite

• Ne aqo laggee neeni a siiqiyoogaa akeekanaadan oottiya guuttabaa ootta; leemisuwawu, amarida qofaa xaafada kiitta woy guutta imotaa imma

GEESHSHA MAXAAFAY YOOTIYOOBAA: “Neeni guutta naatettaasappe doommada . . . atotettai beettiyo aadhdhida eratettaa immanau danddayiya geeshsha maxaafata eradasa.” (2 Ximootiyoosa 3:15) Intte intte naꞌaa tamaarissanabaa halchite. Naꞌay yelettanaappe kasekka tamaarana danddayiyo imotay awu deꞌees. Intte naꞌay ulo giddon deꞌiyo wodekka intte cenggurssaa akeekananne intte hanotan ufayttana woy azzanana danddayees. He wodiyaappe doommidi awu nabbabite. Intte nabbabiyoobaa i akeekennaba gidikkokka, hegee i gitatiyo wode nabbabiyoogaa dosanaadan maaddees.

Intte naꞌay intte Xoossaakko woossiyoogaa akeekees. I siyishin Yihoowakko woossite. (Zaarettido Wogaa 11:19) A kaassiyo wodekka gidin, Xoossay oottidobaa yootite. (Mazamure 78:3, 4) Intte naꞌay dicciyo wode, intte Yihoowa siiqiyoogaa akeekidi, ikka Yihoowa siiqana danddayees.

AY OOTTANA DANDDAYAY?

• Intte naꞌaa tamaarissanawu aadhida eratettaa immanaadan woossite

• I naatettan eranaadan intte koyiyoobaa zaaretti zaarettidi intte naꞌawu yootite