“HIDOOTAY . . . XOOSSAARA DABBOTANAWU KEEHI KOSHSHIYAABA,” gidiyoogaa Hop in zi Ej of Anzayti giyo maxaafay yootees. “Qassi hegee maaddiyaabi baynnabadan qoppiyoogaa, boorasiyoogaanne yayyiyoogaa agganawu keehi maaddees.”

Hidootay nuuyyo koshshiyaaba gidiyoogaa Geeshsha Maxaafay yootees; qassi worddo hidootaappe nuuni naagettanaadan zorees. Mazamure 146:3y, “Asi ashshanau danddayenna gishshau, asaa halaqatun ammanettoppite” yaagees. Asay nuna ashshanawu oottiyo baaxiyan ammanettiyoogaappe, ba gelido qaala ubbaa polanawu wolqqay deˈiyo, nuna Medhdhidaagan ammanettiyoogee loˈˈo. I nuussi gelido qaalay aybee? Kaallidi deˈiyaagaa akeeka.

IITATETTAY XAYANA; XILLOTI SAROTETTAN MERINAWU DEˈANA: Mazamure 37:10, 11 hagaadan gees: “Iitaa oottiyaageeti guutta wodiyaappe guyyiyan de7okkona; . . . SHin ashkketi biittaa laattana; eti sarotettaaninne duretettaani ufaittidi daana.” Gujjidi paydo 29n, “Xilloti . . . [biittan] merinau de7ana” yaagees.

OLAY XAYANA: “[GODAY] sa7aa gaxaa gakkanaassi de7iya olaa teqqees; wonddafiyaa menttees; tooraa kinchchees; gonddalliyaakka taman xuuggees.”—Mazamure 46:8, 9.

SAHOY, WAAYEE WOY HAYQOY DEˈENNA: “Xoossaa keettai asaara de7ees; . . . Xoossai eta aifiyaappe afutta ubbaa quccana. Hagaappe sinttanau haiqoinne kayyoi woi waasoinne sahoi de7enna.”—Ajjuutaa 21:3, 4.

KATTAY UBBA ASAWU GIDI PALAHANA: “Biittan daro kattai mokko; dereti kattan kamettona.”—Mazamure 72:16.

ALAMIYAA XILLOTETTAN HAARIYA ISSI HAARUWAA—KIRISTTOOSA KAWOTETTAA: “Asai ubbai, kawotettati ubbainne dumma dumma qaalan haasayiya zareti ubbai ayyo haarettana mala, maatai, bonchchoinne kawotettai [Yesuus Kiristtoosayyo] imettiis. A maatai merinau shaarettenna maataa; a kawotettai mulekka xayennaagaa.”—Daaneela 7:14.

He gelido qaalati polettanaagaa waani ammanettana danddayiyoo? Yesuusi saˈan deˈiyo wode, Kawo gididi sunttettana danddayiyoogaa bessiis. I sahettidaageeta pattiis, hiyyeesata miziisinne hayqqidaageeta denttiis. Hegaappe aaruwan, asay sarotettaaninne issippetettan merinawu deˈanaadan maaddiya maarata gujjin, keehi koshshiyaabaa tamaarissiis. Ha alamiyaa wurssetta gallassa malaataa gujjin, sinttappe hananabaakka Yesuusi kasetidi yootiis.

Wurssetta gallassay sarotettaaninne woppan gidennan, keehi dummatiyaaban erettanaagaa Yesuusi kasetidi yootiis! Kumetta saˈan olay, koshay, wurssiya harggeenne biittay wolqqappe qaaxxiyoogee I “wodiyaa wurssettaayyo” yootido malaata. (Maatiyoosa 24:3, 7; Luqaasa 21:10, 11; Ajjuutaa 6:3-8) Yesuusi gujjidi hagaadan giis: “Makkalai dariyo gishshau, daro asaa siiqoi irxxana.”—Maatiyoosa 24:12.

Asaa siiqoy irxxiyoogee daro ogiyan qonccanaagaa Geeshsha Maxaafaa xaafida haray kasetidi geeshshidi yootiis. Naaˈˈantto Ximootiyoosa 3:1-5y, “wurssetta gallassi,” daro asay babaa, miishshaanne ufayttiyoobaa xallaa qoppanaagaa yootees. Eti otoranchchanne meqettaa iita gidana. So asay siiqoy baynnaagaa gidana; qassi naati banttana yelidaageetuyyo azazettennaageeta gidana. Haymaanootee cimmiyoogee meeze gidana.

Beetaa mala gidida he hanotati ha alamee wurssetta gallassan deˈiyoogaa bessoosona. He hanotati Kawotettaa haaruwan woppaa demmiyo wodee matattidoogaakka bessoosona. Yesuusi wurssetta gallassaabaa yootido hiraagan kaallidi deˈiyaabaakka odiis: “Asa ubbau markka gidana mala, kawotettaa wonggeliyaa mishiraachchoi sa7a ubban odettana; hegaappe guyyiyan, wurssettai gakkana.”—Maatiyoosa 24:14.

Ha mishiraachchoy iitabaa oottiyaageeti naagettanaadan oottees; qassi qaalaa gelido anjjuwaa mata wode xilloti demmanaagaa hidootan naaganaadan oottees. Neeni he anjjuwaabaa gujjada eranawu koyay? Yaatikko, ha maxeetiyawu wurssetta sinttaa hayyanaa beˈa.