NEENI UFAYTTAY? Ufayttikko, neeni ufayttanaadan oottiyay aybee? Neeni ufayttanaadan oottiyay ne so asay, ne oosoy woy ne ammanoy? Neeni timirttiyaa wurssanawu, ooso demmanawu woy ooratta kaamiyaa shammanawu koyiyoogaa malabay geella neeni ufayttanaadan oottana danddayees.

Daro asay bantta kessido hoolliyaa gakkiyo wode woy koyidobaa demmiyo wode keehi ufayttees. SHin, he ufayssay woqqa wodiyaa takkii? Darotoo, hegee guutta wodiyan xayiyaaba gidiyo gishshawu, hidootaa qanxxissana danddayees.

Ufayssay guuttaa ufayttiyoogaappe keehi hombbociyoogaa gakkanaashin asawu siyettiyaabaanne hegaa aggennaadan koyiyoogaara gayttida xayennan amarida wodiyaa takkiya woppaa geetettiis.

Ufayttidi deˈanawu, nuussi ubbabay deˈana koshshenna; qassi nuussi deˈiyaabay gidana giidi deˈiyoogaa nuuni tamaarana bessees. Hegaa gishshawu, nuuni, “Taani hagaa demmiyaakko woy hegaa oottiyaakko ufayttana” giikko, nu ufayttidi deˈana mule danddayokko.

Leemisuwawu, ufayssaa loˈˈo payyatettaara geeddarssa. Nuuni waani payya gidana danddayiyoo? Miyoobaanne bollaa minttiyoogaa gujjin, nu deˈo ubban maara deˈiyoogaana. Hegaadan, nu deˈuwan loˈˈo ogiyan deˈiyoogeenne suure maaraa kaalliyoogee ufayssaa demissees.

Ufayssiyaa demissiya maarati woy deˈo hanotati awugeetee? Issoy haraappe aadhdhiyaaba gidikkonne, kaallidi deˈiyaageeti keehi koshshiyaaba:

• DEˈIYAABAN WOPPU GIYOOGAANNE KEHATETTAA

• PAYYATETTAANNE UFAYSSAN GENCCIYOOGAA

• SIIQUWAA

• ATTO GIYOOGAA

• DEˈUWAWU HALCHCHIDOBAA AKEEKIYOOGAA

• HIDOOTAA

Ha usuppun maaratanne eeshshata ane loytti pilggoos.