“Ooninne ba laggiyaa bolli hanqqettidobai de7ikko, issoi issuwau atto yaago.”—QOLASIYAASA 3:13.

Nuuni ubbaykka balana danddayoos. Geella nuuni harata hanqqetissana woy eti nuna hanqqetissana danddayoosona. Hegaa giyoogee, nuussi harati atto gaana koshshees; qassi nuunikka haratussi atto gaana koshshees giyoogaa. Nuuni atto giyo wode, nuna hanqqetissida urawu lancciyaa oyqqiyoogaa aggoos giyoogaa. Nuuni “iitabaa ootti” zaarananne nuna naaqqida uraa mooro xallaa ubbatoo qoppana koshshenna. (Roome 12:17) SHin nuuni keehi qohettidabanne hegaabaa qoppiyoogaa aggana xayikko shin? Yaatikko nuuni he allaalliyaabaa bonchchuwan he izaawu xallaara haasayana koshshees. Nu halchchoy sarotettaa medhdhiyoogaappe attin, nuna likke woy hara ura mooranchcha kessanawu baaxetiyoogaa gidenna.—Roome 12:18.

“Issoi issuwaayyo intte huuphiyaa kaushshite.”—PILIPHPHISIYUUSA 2:3.

Nuuni nu huuphiyaa ziqqi oottiyaageetanne harata bonchchiyaageeta gidiyo wode harati nunaara deˈiyoogan ufayttana. Nuuni kehanne etawu qoppiyaageeta, qassi eriiddi nuuni eta qohennaageeta gidiyoogaa  eroosona. SHin nuuni haratuppe aadhdhoos giidi qoppikko woy nu koyiyoogaadan harati oottanaadan ubbatoo iisettikko ooshshaynne cabboy merettanaadan oottoos. Yaatikko asay nuukko shiiqenna, qassi nuussi amarida lagge xallay deˈana, ubba qassi ayba laggeenne nuussi deˈennan aggana danddayees.

‘Xoossay asa somˈˈo xeellenna; shin dere ubban baassi yayyiyaagaanne xillo ooso oottiyaagaa galatees.’—OOSUWAA 10:34, 35.

Nuna Medhdhidaagee eti deˈiyo biittaa, deretettan etawu deˈiya hanotaa woy eta meraa gaasuwan asaa issuwaa haraappe aattidi xeellenna. ‘Xoossay asa zare ubbaa issi uraappe medhdhiis.’ (Oosuwaa 17:26) Hegaa giyoogee ubba asay ishanttanne michchontta giyoogaa. Nuuni ubba asaa bonchchuwaaninne kehatettan oyqqiyo wode, eti ufayttanaadan oottoos, nuunikka ufayttoos, qassi nuna Medhdhidaagaakka ufayssoos.

‘Ashkketettaa maayite.’—QOLASIYAASA 3:12.

Nuuni ashkke gidiyo wode, harati ufayttanaadan oottoos. Ubba qassi nuuni hanqqettennaagaa eti eriyo gishshawu, nuna haasayissanawunne nu balidobaa yootanawu guyye gookkona. Issi uri nu bolli hanqqettikko, nuuni ashkketettan zaariyoobay he izaawu zarbbanaadan oottana danddayees. Leemiso 15:1y, “Liiqo haasayai hanqquwaa zarbbissees; shin porddolla qaalai hanqquwaa denttettees” yaagees.

“Ekkiyaagaappe immiyaagee anjjettidaagaa” woy ufayttiyaagaa.—OOSUWAA 20:35.

Ha wodiyan deˈiya daro asay yaareteesinne ba xallawu qoppees. SHin nuuni kehiyaageeta gidikko kaseegaappe aaruwan ufayttana. (Luqaasa 6:38) Keha uri ba aquwaappe aattidi harata siiqiyo gishshawu ufayttees. Hegaa mala siiqoy harati etawu kehiyo wode eti galatanaadaaninne nashshanaadan eta denttettees. (Qolasiyaasa 3:15) Nena hagaadan oychcha: ‘Taani galatiyaanne kehiya asaa doosiyaanaayye galatennanne kehenna asaa dosiyaanaa?’ Hegaappe ay tamaariyoo? Harati gidanaadan neeni koyiyoogaa mala asa gida.—Maatiyoosa 7:12.