Medhdhidaagee Deˈiyoogaa Eriyoogee keehi Koshshiyoy Aybissee?
Medhdhidaagee deˈiyoogaa eriyoogee keehi koshshiyaaba gidiyoy aybissee? Ubbaa danddayiya Xoossay deˈiyoogaa neeni ammananaadan naqaashay oottiyaaba gidikko, Geeshsha Maxaafay A ayyaanay kaalettin xaafettidoogaa bessiya naqaashaa pilgganawu neeni koyennan waaya aggana. Geeshsha Maxaafay yootiyoobaa neeni ammaniyaaba gidikko, kaallidi deˈiya ogetun goˈettana danddayaasa.
Neeni ne deˈuwan kaseegaappe aaruwan ufayttana
GEESHSHA MAXAAFAY HAGAADAN GEES: “[Xoossay] intteyyo iraa saluwaappe bukissees; kattaakka i wodiyan immees; qassi qumaa immidi, inttena daro ufaissees; yaatidi intteyyo lo77obaa [oottees].”—Oosuwaa 14:17.
HEGEE WOYGIYOOGEE?: Ha alamiyan neeni goˈettiyo ubbabay Medhdhidaagee immidoba. He imotata Immidaagee neessi ay keena qoppiyaakko neeni akeekiyo wode, kaseegaappe aaruwan A galatana.
Ha wodiyan nena maaddiya zoriyaa demmaasa
GEESHSHA MAXAAFAY HAGAADAN GEES: “He wode neeni xillotettaa, suure pirddaa, suuretettaanne lo77o ooso ubbaa erana.”—Leemiso 2:9.
HEGEE WOYGIYOOGEE: Xoossay nena Medhdhidaagaa gidiyo gishshawu, neeni ufayttanawu aybi koshshiyaakko erees. Neeni Geeshsha Maxaafaa nabbabiyo wode, ne deˈuwan maaddiya darobaa tamaarana danddayaasa.
Ne oyshatussi zaaruwaa demmaasa
GEESHSHA MAXAAFAY HAGAADAN GEES: “Xoossaakka loittada erana.”—Leemiso 2:5.
HEGEE WOYGIYOOGEE: Medhdhidaagee deˈiyoogaa neeni eriyoogee, kaallidi deˈiyaageetu mala keehi koshshiya oyshatussi zaaruwaa demmanawu nena maaddana danddayees: Deˈuwawu halchchidobi aybee? Metoy keehi daridoy aybissee? Nuuni hayqqiyo wode waaniyoo? Ha oyshatussi Geeshsha Maxaafaappe ammanttiya zaaruwaa demmana danddayaasa.
Sinttanawu hidootaa demmaasa
GEESHSHA MAXAAFAY HAGAADAN GEES: “‘Taani intteyyo halchchiyo halchchuwaa taani GODAI erais; hegeenne, intteyyo sintta wodiyaanne ufaissaa immana mala, saro halchchoppe attin, iita halchcho gidenna.’”—Ermmaasa 29:11.
HEGEE WOYGIYOOGEE: Xoossay iitatettaa, metuwaa, haray atto hayquwaakka xayssanawu qaalaa geliis. Xoossay immanawu qaalaa gelidoban ammaniyoogee, nena gakkiya metota xalatettan xoonanaadan maaddana.
Hageeta Beꞌadii?
BEEGOTTITE!
Ufayssaa Demmiyo Ogiyaa—Deˈuwawu Halchchidobaa Akeekiyoogaa
Deˈuwaa xeelliyaagan denttiyo keehi koshshiya oyshatuyyo aliya zaaruwaa demmiyoogee ufayssawu keehi koshshiyaaba.
