XANNAˈIYO HUUPHE YOHUWA 29
MAZAMURE 121 Nuuni Nu Huuphiyaa Naagana Koshshees
Paaciya Eqettanawu Ubbatoo Giiga Utta
“Intte paaciyan gelenna mala naagi uttite, qassi mintti woossite.”—MAT. 26:41.
TAMAARANABAA
Ha huuphe yohoy nuuni nagaraa oottenna mala nuussi danddayettida keena baaxetana koshshiyogaa nuna hassayissees. Nuuni leddan leddan gita nagaraa oottanaadan denttettiyabatuppe naagettana koshshiyogaakka nuna hassayissees.
1-2. (a) Yesuusi bana kaalliyageeta woygi zoridee? (b) Yesuusa kaalliyageeti A aggidi baqatidoy aybissee? (Misiliyakka xeella.)
YESUUSI hagaadan giis: “Ayyaanay keehi koyiyogee tuma, shin ashoy shugo.” a (Mat. 26:41b) Ha qofay nuuni nagaranchcha gidiyogaanne balana danddayiyogaa Yesuusi akeekidoogaa bessees. Shin I yootidobay likkiyappe aaruwan nunan ammanettana koshshennaagaakka hassayissees. Yesuusi hagaadan gaanaappe amarida saatiyappe kase A kaalliyageeti A mule aggidi beennaagaa yootidosona. (Mat. 26:35) Eti suurebaa oottanawu koyidosona. Shin, paacee gakkin eta ammanoy sohuwara shugganaagaa eti akeekibookkona. Yaatiyo gishshawu, Yesuusi eta hagaadan zoriis: “Intte paaciyan gelenna mala naagi uttite, qassi mintti woossite.”—Mat. 26:41a.
2 Shin, Yesuusa kaalliyageeti naagi uttibeennaagee azzanttiyaba. Yesuusi oyqettido wode eti aara takkidonaayye, yayyidi baqatidonaa? Yesuusa kaalliyageeti naagi uttibeenna gishshawu mule oottokko giidobaa oottidosona; eti Yesuusa aggidi baqatidosona.—Mat. 26:56.
Yesuusi bana kaalliyageeti naagi uttanaadaaninne paaciya eqettanaadan yootikkonne eti A aggidi baqatidosona (Mentto 1-2 xeella)
3. (a) Nuuni Yihoowawu ammanettidi deˈanawu likkiyappe aaruwan nunan ammanettana bessennay aybissee? (b) Nuuni ha huuphe yohuwan ay beˈanee?
3 Nuuni likkiyappe aaruwan nunan ammanettana koshshenna. Nuuni Yihoowa ufayssennabaa oottennan agganawu murttidoogee tuma. Gidikkonne, nuuni nagaranchcha, qassi likke gidennabaa oottanawu sohuwara paacettana danddayoos. (Roo. 5:12; 7:21-23) Nuuni suure gidennabaa oottanawu qoppennan paacettana danddayoos. Nuuni Yihoowawunne A Naˈawu ammanettidi deˈanawu nagaraa oottennaadan naagettana mala Yesuusi yootido zoriya nuuni kaallana koshshees. Ha huuphe yohoy hegaadan oottanaadan nuna maaddana. Koyruwan, nuuni keehi naagettana koshshiyo hanotati awugeetakko beˈana. Yaatidi, paacciyabaappe waani naagettanaakko beˈana. Wurssettan, nuuni waani naagetti deˈanaakko beˈana.
NEESSI KEEHI PAACE GIDIDABAAPPE NAAGETTA
4-5. Guutta nagaraakka oottennan aggiyogee keehi koshshiyoy aybissee?
4 Guutta nagaraykka nuuni Yihoowara dabbotido dabbotay moorettanaadan oottana danddayees. Qassi hegee nuuni gita nagaraa oottanaadan denttettana danddayees.
5 Nagaraa oottanaadan nuuni ubbay paacettana danddayoos. Nuussi ubbawu paace gididabay deˈikkokka, issi issibati nuuni likke gidennabaa oottanaadan keehi paaccana danddayoosona. Leemisuwawu, pokkiya tuna nagaray issi urawu paace gidana danddayees. Hara uri qassi, mastterbeshiniya woy pornograafiya beˈiyogaa mala tunabaa eqettiyogee koshshana danddayees. Haray qassi elle hanqqettiyogaa, otorettiyogaa woy asaa yayyiyogaa agganawu baaxetiiddi deˈana danddayees. Yaaqoobi yootidoogaadan, “asi huuphiyan huuphiyan ba huuphe iita amuwan gooshettiyo wodenne cimettiyo wode paacettees.”—Yaaq. 1:14.
6. Nuuni aybaa xeelliyagan tumanchcha gidana koshshii?
6 Neeni neessi keehi paace gididabaa eray? Nuuni shugo gididobaa sheneho giyogeenne woy nuuni mino gidiyo gishshawu nagaraa oottokko giidi qoppiyogee bessennaba. (1 Yoh. 1:8) ‘Ayyaanaaban mino gididaageetikka’ naagettana xayikko, paacettana danddayiyogaa Phawuloosi yootidoogaa hassaya. (Gal. 6:1) Nuuni nuussi tumanchcha gidananne nu shugo miyyeta erana koshshees.—2 Qor. 13:5.
7. Nuuni xoonanawu baaxetana koshshiyabay aybee? Leemisuwa yoota.
7 Nuuni nuussi keehi paace gididabata erikko, waatana koshshii? He paaciya loytti eqettanawu baaxetana koshshees! Leemisuwawu, beni wode katamaa dirssawu keehi mino gidenna sohoy penggiya. Yaatiyo gishshawu katamaa penggiya loytti naagana koshshees. Hegaadankka, paaciya loytti eqettanawu nu shugo miyyiya xoonanawu baaxetana koshshees.—1 Qor. 9:27.
LIKKE GIDENNABAA OOTTIYOGAAPPE WAANI NAAGETTANA DANDDAYIYOO?
8-9. Leemiso shemppo 7n qonccida yelagay nagaraa oottiyogaappe naagettanawu waatana danddayiiddi aggidee? (Leemiso 7:8, 9, 13, 14, 21)
8 Nuuni nagaraappe waani naagettana danddayiyoo? Leemiso shemppo 7n odettida yelagaappe nuuni ay tamaarana danddayiyakko beˈa. I shaaramuxa maccaaseera zinˈˈiis. Paydo 22y he yelagay “sohuwaarakka” O kaallidi biidoogaa yootees. Shin, qommoora deˈiya paydoti yootiyogaadan, I yaatanaappe kase hara iitabata kuuyidoogee leddan leddan nagaraa oottanaadan denttettiis.
9 He yelagay gita nagaraa oottanaappe kase I oottidobay aybee? Koyruwan, qamman I “shaaramuxa maccaasee keettaa mataara kanttiis.” Yaatidi, I soo efiya ogiyakko biis. (Leemiso 7:8, 9 nabbaba.) Kaallidi, I he maccaasiyo beˈido wode baqatibeenna. Hegaa bollikka, A yeranaadan I eeno giis, qassi geella O loˈˈo asa giidi I qoppanaadan koyido gishshawu A yarshshuwa yarshshidoogaa yootido wode O ammaniis. (Leemiso 7:13, 14, 21 nabbaba.) He yelagay nagaraa oottanaadan denttettiya iitabatuppe naagettidaakko, I paaciyappenne nagaraappe naagettana danddayees shin.
10. Leemiso maxaafan odettida yelagaadan issi uri ha wodiyan balabaa waati oottana danddayii?
10 Ha taarikee Yihoowawu goynniya oonanne gakkana danddayiyabaa yootees. I gita nagaraa oottana danddayees, qassi guyyeppe ubbabay ‘sohuwara’ hanidabadan qoppana danddayees. Woy I hagaadan gaana danddayees, “Qoppennan haniis.” Gidikkonne, I hanidabaa loytti qoppiyo wode gita nagaraa oottanaappe kase I iitabaa kuuyidoogaa akeekennan waayi aggana. Geella I Yihoowa siiqennaageetuura laggetennan aggenna. Woy I allaxxanawu doorido amaridabay, Interneettiyan I beˈidobay woykko I biido sohoy issi Kiristtaaniyawu bessennaagaa gidana danddayees. Woy qassi I woossiyogaa, Geeshsha Maxaafaa nabbabiyogaa, shiiqota shiiqiyogaa woy haggaaziyogaa aggidaba gidana danddayees. Geella I Leemiso maxaafan odettida yelagaadan, daro iitabaa kuuyi simmidippe attin, ‘sohuwara’ gita nagaraa oottibeenna.
11. Nuuni nagaraa oottennaadan waatana koshshii?
11 Nuuni hegaappe ay tamaariyoo? Nuuni nagaraappe xalaala gidennan, nagaraa oottanaadan gaaso gidiyabatuppekka naagettana koshshees. Solomoni yelagaabaanne shaaramuxa maccaaseebaa yooti simmidi, hegaabaa loytti qonccissiis. I hagaadan zoriis: “I ogiyan gelada xayoppa.” (Lee. 7:25) Ubba qassi I hagaadan giis: “SHaaramuxa maccaasee heeri booppa; i keettaa penggiyaakko shiiqoppa.” (Lee. 5:3, 8) Nagaraa oottiyogaappe naagettanawu balabaa oottanaadan gaaso gidiyabatuppenne hanotatuppe nuuni naagettana koshshees. b Hegaa giyogee issi issibay Kiristtaanetussi bala gidana xayikkokka, hegee nuuni iitabaa oottanaadan paacciyabanne denttettiyaba gidiyogaa nu erikko hegaa oottokko giyogaa.—Mat. 5:29, 30.
12. Iyyoobi ay oottanawu murttidee, qassi hegee I paaciya eqettanaadan waati maaddidee? (Iyyooba 31:1)
12 Nuuni nagaraa oottanaadan denttettiya hanotatuppe naagettanawu murttana koshshees. Iyyoobi hegaadan oottiis. I hara maccaasaa xeellidi pokkobaa amottennaadan ba ‘ayfiyara maachchaa maacettiis.’ (Iyyooba 31:1 nabbaba.) I hegaadan murttidoogee wodiraa laammiyogaappe naagettanaadan A maaddiis. Nuunikka paacciyabaa oottanaadan nuna denttettana danddayiya aybippekka haakkanawu murttana danddayoos.
13. Nuuni qoppiyoban naagettana koshshiyoy aybissee? (Misiliyakka xeella.)
13 Nuuni qoppiyobankka naagettana koshshees. (Kes. 20:17) Amaridaageeti eti balabaa oottana xayikko, hegaabaa loytti qoppiyogee aynne qohenna giidi ammanoosona. Shin hegaadan qoppiyogee bala. Balabaa aggennan qoppiya uri hegaa oottanawu kaseegaappe aaruwan koyees. Yaanikko I balabaa oottennan agganawu keehi metootees. Nuuni issi issitoo balabaa qoppiyogee qoncce. Hegaadan qoppiyogaa sohuwara aggidi loˈˈobaa qoppiyogee keehi koshshiyaba. Nuuni yaatiyo wode, iita amuwawu denttettiya bala qofaa qoppenna gishshawu gita nagaraa oottiyogaappe naagettoos.—Pili. 4:8; Qol. 3:2; Yaaq. 1:13-15.
Paacettanaadan oottiya aybippekka nuuni haakkana koshshees (Mentto 13 xeella)
14. Paaciya eqettanawu nuna maaddana danddayiya harabay aybee?
14 Nuuni paaciya eqettanawu harabaa ay oottana danddayiyoo? Nuuni Yihoowa higgetussi azazettiyogee ubbatookka nuussi loˈˈo gidiyogaa mintti ammanettana koshshees. Yihooway koyiyogaadan qoppanawu nuuni issi issitoo metootana danddayoos. Shin, nuuni yaatanawu baaxetiyo wode tumuppe ufayttoos.
15. Suurebaa oottanawu amottiyogee nuuni paaciya eqettanaadan waati maaddii?
15 Nuuni ubbatoo suurebaa oottanawu amottana koshshees. Nuuni ‘iitabaa ixxidi loˈˈobaa dosiyo’ wode, suurebaa oottanawunne nagaraa oottanaadan denttettiya hanotatuppe naagettanawu kaseegaappe aaruwan murttoos. (Amo. 5:15) Nuuni mule qoppibeenna woy teqqana danddayenna hanotati nuna gakkiyo wode, nuuni suurebaa amottikko paaciya loytti eqettana danddayoos.
16. Ayyaanaabaa oosuwa oottiyogee naagettidi deˈanaadan nuna waati maaddii? (Misiliyakka xeella.)
16 Nuuni suurebaa oottiyogaa amottanawu waatana danddayiyoo? Nuuni nuussi danddayettida keenan ayyaanaaban xeelaa wottana koshshees. Nuuni shiiqota shiiqiyo wodenne sabbakiyo wode Yihoowa ufayssanawu kaseegaappe aaruwan amottoosinne balabaa oottanawu paacettokko. (Mat. 28:19, 20; Ibr. 10:24, 25) Xoossaa Qaalaa nabbabiyogaaninne xannaˈiyogan, qassi hegaa wotti dentti qoppiyogan kaseegaappe aaruwan loˈˈobaa dosoosinne iitabaa ixxoos. (Yaa. 1:8; Maz. 1:2, 3; 119:97, 101) Yesuusi bana kaalliyageetussi yootidobaa hassaya: “Intte paaciyan gelenna mala . . . mintti woossite.” (Mat. 26:41) Nuuni saluwan deˈiya nu Aawaa woossiyo wode, A maaduwa demmoosinne A ufayssanawu kaseegaappe aaruwan murttoos.—Yaaq. 4:8.
Nuuni kaseegaappe aaruwan Yihoowakko shiiqanaadan maaddiyabata ubbatoo oottiyogee paaciya eqettanaadan nuna maaddees (Mentto 16 xeella) c
NAAGETTADA DEˈA
17. Pheexiroosi xoonanawu metootido shugo miyyee aybee?
17 Nuuni nu shugo miyyetuppe amaridaageeta muleera xoonana danddayoos. Shin, nuuni shugo gidido harabata xoonanawu adussa wodiyawu aggennan baaxetiyogee koshshana danddayees. Ane kiitettida Pheexiroosabaa beˈoos. I asawu yayyidi heezzutoo Yesuusa kaddiis. (Mat. 26:69-75) Guyyeppe Pheexiroosi hegaadan yayyiyogaa aggidaba milatees; ayssi giikko, I Sanhediriniya sinttan Yesuusabaa xalatettan sabbakiis. (Oos. 5:27-29) Shin I amarida layttappe simmin, ‘qaxxarettidaageetuyyo yayyidi’ Ayhuda gidenna Kiristtaanetuura qumaa miyogaa aggiis. (Gal. 2:11, 12) Pheexiroosi zaarettidi asawu yayyiis. I asawu yayyiyogaa muleera aggibeennaba milatees.
18. Nu shugo miyyiyara gayttidaagan hanana danddayiyabay aybee?
18 Hegaa malabay nunakka gakkana danddayees. Waanidi? Nuuni xoonidobadan qoppiyo nu shugo miyyee zaarettidi nuussi paace gidana danddayees. Leemisuwawu, issi ishay hagaadan giis: “Pornograafiya beˈiyogaa tammu layttawu aggaas, qassi he metuwa xoonidoogaa ammanettaas. Shin taani issi issitoo hegaa zaarettada beˈanawu paacettaas.” Nu ishay ba shugo miyyiya xoonanawu aggennan baaxetidoogee ufayssiyaba. I shugo gididobaa ubba galla eqettana koshshiyogaanne ha iita alamiyan deˈido wode ubban yaatana koshshiyogaa akeekiis. A keettayiyanne galchchaa cimati maaddin I pornograafiya beˈiyogaappe loytti naagettana danddayiis.
19. Nuuni xoonibeenna shugo miyyee nuussi deˈikko waatana danddayiyoo?
19 Nuuni hanno gakkanawu xoonibeenna nu shugo miyyee nuuni balabaa oottanaadan denttettibeennaba gidikkonne waatana danddayiyoo? Yesuusi paaciyara gayttidaagan “naagi uttite” giidi zorido zoriya kaallana danddayoos. Neeni mino gididabadan qoppiyo wodetunkka paacettanaadan oottiya hanotatuppe ubbatoo naagetta. (1 Qor. 10:12) Ne shugo miyyiya xoonanaadan maaddidabata oottiyogaa aggoppa. Paaciyappe ubbatoo nena naaganawu ‘minna’ baaxeta.—2 PHe. 3:14.
UBBATOO NUNA NAAGIYOGAN DEMMIYO WOYTUWA
20-21. (a) Ubbatoo beegottidi paaciya eqettiyo wode nuuni demmiyo woytoy aybee? (b) Nuuni danddayiyogaa keena baaxetikko, Yihooway nuussi ay oottanee? (2 Qoronttoosa 4:7)
20 Ubbatoo beegottidi paaciya eqettiyogee nuussi keehi loˈˈo gidiyogaa ammanettana danddayoos. Nuuni nagaraa oottidi ‘guutta wodiyawu ufayttana’ danddayoos; shin nuuni Yihooway koyiyogaadan deˈiyo wode keehi ufayttoos. (Ibr. 11:25; Maz. 19:8) Ayssi giikko, nuuni I koyiyogaadan deˈanawu merettida. (Doo. 1:27) Nuuni Yihoowa ufayssiya ogiyan deˈikko, nu kahay geeshsha gidees; qassi nuuni merinawu deˈana danddayoos.—1 Xim. 6:12; 2 Xim. 1:3; Yih. 20, 21.
21 “Ashoy shugo” gidiyogee tuma. Shin hegaa giyogee nuuni shugo gididobaa xoonana danddayokko giyogaa gidenna. Yihooway nuussi koshshiya wolqqaa immanawu giigi uttiis. (2 Qoronttoosa 4:7 nabbaba.) Qassi Xoossay immiyo wolqqay “ubbaappe aadhdhiya” wolqqa gidiyogaa akeeka. Shin nuuni paaciya eqettanawu koyruwan nuussi danddayettida ubbabaa oottana koshshees. Nuuni nu wolqqaa keena baaxetikko, nuussi koshshiyo wodiyan Yihooway nuuyyo wolqqaa immiyogan nu woosaa zaaranaagaa ammanettana danddayoos. (1 Qor. 10:13) Ee, Yihooway maaddin nuuni ubbatoo beegottidi paaciya eqettana danddayoos.
MAZAMURE 47 Ubbatoo Yihoowa Woossa
a QONCCISSIDO QAALAA: Yesuusi Maatiyosa 26:41n ‘ayyaana’ giidoogee nuuni suurebaa oottanawu koyiyogaa bessiyaba. Yesuusi yootido “ashoy” nuuni nagaranchcha gidiyo gishshawu, darotoo balabaa qoppiyogaanne oottiyogaa qonccissees. Yaatiyo gishshawu, nuuni issi issitoo suurebaa oottanawu koyikkokka naagettana xayikko, nagaraanne balabaa oottana danddayoos.
b Gita nagaraa oottida issi uri Merinawu Ufayttada Deˈa! giya maxaafan timirtte 57 qofaa 1-3ninne Hidaare 2020 Wochchiyo Keelan, “Sitti Gaada Sinttau Xeella” giya huuphe yohuwan sinttaa 27-29n deˈiya mentto 12-17n maaddiya qofaa demmana danddayees.
c MISILIYA QONCCISSUWA: Issi ishay maallado, gallassa xiqisiya nabbabees, laaxaa saatiyan Geeshsha Maxaafaa nabbabees, qassi omarssan saaminttawu gidduwan shiiqiyo shiiquwan deˈees.
