MUUSE Higgee, haraphphiyaa buubaanne mara haraphphiyaa Yihoowawu yarshshiyoogaa paqqadees. Yarshshuwaabaa yootiya higgiyan ha naaˈˈu kafoti ubbatoo issippe qonccidosona; qassi issuwaa gishshaa hara goˈettana danddayettees. (Wog. 1:14; 12:8; 14:30) Hegee goˈˈiyaaba gididoy aybissee? Haraphphiyaa buuba issi issitoo demmana danddayettennaagee hegawu issi gaaso. Aybissi?

Haraphphiyaa buubati hombbiya aginatuppe simmin Israaˈeela biittaa ubbaappe harasaa boosona. Layttan layttan Xiqimita aginan, eti tohossa heeraappe hombbiyaa biittatukko boosona, yaatidi hombbiyaa wodiyan Israaˈeela biittaakko simmoosona. (Sii. 2:11, 12; Erm. 8:7) Hegaa gishshawu, beni Israaˈeelati haraphphiyaa buubata balgguwan yarshshanawu metootoosona.

Hara baggaara qassi, mara haraphpheti darotoo harasaa beenna gishshawu, laytta kumetta Israaˈeela biittan deˈoosona. Qassi mara haraphpheti son haarana danddayiyoobata. (Yohaannisa 2:14, 16​ra gatta xeella.) Baybil Plantis End Animalis giyo maxaafay yootiyoogaadan, “Yihudaa biittan deˈiya qeeri katamatuninne gita katamatun ubban son dicciya mara haraphpheti deˈoosona. Keetti deˈiyo asay ubbay haraphpheti deˈana danddayiyo keettaa woy godaa bolli xooˈiyaa giigissana danddayees.”—Isiyaasa 60:8​ra gatta xeella.

Hegaa gishshawu, Yihooway Israaˈeelati laytta kumetta demmana danddayiyo kafota yarshshanaadan paqqaddiyoogan siiqiyaagaanne aadhdhida eranchcha gidiyoogaa bessiis.