1-2. Naati nu ammanuwa xeelliyagan oyshaa oychchiyo wode, yelidaageeti waatana koshshii?

 NAATA dichchiyogee gita ooso gidiyogaa daroti maayettoosona. Intte aawa woy aayo gidikko, intte naatu ammanuwa minttanawu intte baaxetiyo baaxee galatissiyaba. (Zaa. 6:6, 7) Intte naati dicci dicci biyo wode Geeshsha Maxaafay yootiyo kandduwa maarata gujjin, nu ammanuwabaa oychchana danddayoosona.

² Intte naati oychchiyobay inttena koyro heeran hirggissana danddayees. Hegaa mala oyshati intte intte naatu ammanoy shuggiiddi deꞌiyabadan qoppanaadan oottana danddayoosona. Shin naati dicci dicci biyo wode bantta ammanuwa minttanawu oyshata oychchana koshshees. (1 Qor. 13:11) Yaatiyo gishshawu intte hirggana koshshenna. Intte naati nu ammanuwa xeelliyagan oychchiyo ubba oyshata eti suurebaa qoppanaadan maaddiyo injjedan xeellana danddayeeta.

3. Nuuni ha huuphe yohuwan ay beꞌanee?

³ Yelidaageeti (1) naati bantta ammanuwa minttanaadan, (2) Geeshsha Maxaafay yootiyo kandduwa maaraa nashshanaadan, qassi (3) bantta ammanuwawu exatanaadan waati maaddana danddayiyakko ha huuphe yohuwan beꞌana. Naati oyshata oychchiyogee loꞌꞌo gidiyoy aybissakko, qassi nu ammanuwabaa intte intte naatuura haasayanaadan oottana danddayiya issi issibatakka beꞌana.

INTTE NAATU AMMANOY MINNANAADAN MAADDITE

4. Intte naati woygi oychchana danddayiyonaa, qassi aybissi?

⁴ Xoossan ammaniyogee naati laattiyoba gidennaagaa Kiristtaane  gidida yelidaageeti akeekoosona. Intte Yihoowa ammaniyageeta gididi yelettibeekketa; qassi intte naatikka hegaa mala. Yaatiyo gishshawu, intte naati hagaadan giidi oychchana danddayoosona: ‘Xoossay deꞌiyogaa taani waata eriyanaa? Geeshsha Maxaafay yootiyobaa tumu taani ammanana danddayiyanaa?’ Nuuni nu ‘kumetta qofaa’ goꞌettidi ‘ubbabaa paacciyogee’ loꞌꞌo gidiyogaa Geeshsha Maxaafay yootees. (Roo. 12:1; 1 Tas. 5:21) Shin intte intte naatu ammanuwa minttanawu waatana danddayeetii?

5. Yelidaageeti bantta naati Geeshsha Maxaafaa mintti ammanaadan waati maaddana danddayiyonaa? (Roome 12:2)

⁵ Geeshsha Maxaafay yootiyobay tuma gidiyogaa shaakki eranaadan intte naata minttettite. (Roome 12:2 nabbaba.) Intte naati oyshata oychchiyo wode, Yihoowa Markkati Geeshsha Maxaafaa Xannaꞌanawu Maaddiya Xuufiya (Amaarattuwa) mala pilgganawu maaddiya miishshata goꞌettidi bantta oyshatussi zaaruwa waati demmanaakko he injjiyan bessite. Leemisuwawu, “Geeshsha Maxaafay” asi xaafido hara maxaafatu mala gidennan, “Xoossaa qaalaa” gidiyogaa intte naati akeekanaadan maaddanawu xuufetanne biidota pilgganaadan minttettana danddayeeta. (1 Tas. 2:13) Leemisuwawu, beni Asooretu katama gidida Nanawebaa pilggana danddayoosona. Kase, Geeshsha Maxaafaa eranchcha gidida amaridaageeti Nanawe giyo katamay baynnaagaa yootoosona. Shin 1850 heeran eranchchati Nanawe katamay deꞌidoogaa bessiyabaa bookkidi demmidosona; hegee Geeshsha Maxaafay likke gidiyogaa bessiyaba. (Sof. 2:13-15) Intte naati Nanawe katamaa xayoy Geeshsha Maxaafaa hiraagay polettanaadan waati oottidaakko eranawu, Hidaare 2021 Wochchiyo Keelan, “Eray?” giya huuphe yohuwa beꞌana danddayoosona. Intte naati nu xuufeti yootiyobaa hara xuufeti yootiyobaara geeddarssanaadan minttettite. Yaatiyogee, intte naati Geeshsha Maxaafay yootiyobay tuma gidiyogaa mintti ammanaadan maaddana.

6. Yelidaageeti bantta naati Geeshsha Maxaafay yootiyobay tuma gidiyogaa akeekanaadan waati maaddana danddayiyonaa? Leemisuwa yoota. (Misiliyakka xeella.)

⁶ Geeshsha Maxaafay yootiyobay tuma giyoy aybissakko intte naati akeekanaadan maaddite. Yelidaageeti Geeshsha Maxaafaabaa woy Xoossan ammaniyogaabaa ufayssiya ogiyan bantta naatuura haasayiyo daro injjeti deꞌoosona. Leemisuwawu, intte muuzemiya, ataakiltte sohuwa, woy Yihoowa Markkatu macara biiruwa xomoosikko he injjiya goꞌettidi Xoossaabaa woy Geeshsha Maxaafaabaa intte naata tamaarissana danddayeeta. Qassi intte muuzemiya biidi woy Intternneetiyan xomoosiyo wode, beni miishshati woy hanotati Geeshsha Maxaafaara waani gayttiyakko intte naata tamaarissana  danddayeeta. Mooꞌaabetu Shuchchaa geetettiya 3000 layttaa deꞌida shuchchaa bolli Xoossaa buzo sunttay deꞌiyogaa intte naati eriyonaa? He Mooꞌaabetu Shuchchay Paransaayen issi muuzemiyan deꞌees. Qassi Niwu Yorken, Warwiken Yihoowa Markkatu waanna biiruwan deꞌiya muuzemiyan “Geeshsha Maxaafaanne Xoossaa Sunttaa” giyo sohuwan Mooꞌaabetu Shuchchaa milatissidi giigissidobay deꞌees. Mooꞌaaba Kawoy Meeshi Israaꞌeela bolli makkalidoogee Mooꞌaabatu Shuchchan xaafettiis. Hegee Geeshsha Maxaafankka odettiis. (2 Kaw. 3:4, 5) Geeshsha Maxaafay yootiyobay tuma gidiyogaa bessiya naqaashaa intte naati akeekiyo wode eta ammanoy minnana.—2 Hanidabaa Odiya 9:6​ra gatta xeella.

7-8. (a) Meretatun beꞌiyo loꞌꞌiyabatuppe nuuni ay tamaarana danddayiyoo? Leemisuwa yoota. (Misiliyakka xeella.) (b) Intte naati Medhdhidaagaa mintti ammananaadan woygi oychchana danddayeetii?

⁷ Intte naati Yihooway medhdhidobata loytti qoppanaadan minttettite. Intte gaxariya biiddi woy gaden oottiiddi, meretatun beettiya makkisi giigissido keehi ufayssiyabaa intte naati akeekanaadan maaddite. Hegaa giigissida eranchchay deꞌiyogaa intte naati akeekanaadan maaddite. Leemisuwawu, saynttistteti meretatun beettiya xaaxetti xaaxetti uttidabaa milatiyabata daro layttawu pilggidosona. Nikola Famile giyo saynttisttee intte meretatun beettiya xaaxetti xaaxetti uttidabaa milatiyabata qoodiyo wode hegaa qooday gujji gujji biyogaa intte akeekana danddayiyogaa yootiis. He qooday Fabonashi sikuwens geetettees. Xaaxetti xaaxetti uttidabaa milatiyabata darobatun, hegeekka amarida gaalakisetun, xaadhdhiya keettatun, mittaa bonccotuuninne suufetun beꞌana danddayoos. a

⁸ Issi mala hanotan dicci dicci biya hara meretatubaa intte naati timirtte keettan tamaarana danddayoosona. Leemisuwawu, daro mittati daayoosona. Ano mittay gita daashshata kessees. Hegeetuppe guutta daashshati kiyoosona. Qassi kaallidi hara daashshatikka kiyoosona. He hanotay Frakital geetettees. Hegee hara meretatunkka deꞌees. Shin hegaa makkisidi giigissiday oonee? Yihooway medhdhido malaalissiyabata intte naati loytti qoppiyogee ubbabaa medhdhiday A gidiyogaa eti mintti ammanaadan maaddana danddayees. (Ibr. 3:4) Intte naati dicci dicci biyo wode, Xoossaa higgetussi azazettiyogee keehi koshshiyo gaasuwa naati akeekanaadan intte maaddana bessees. Yaatanawu hagaadan oychchana danddayeeta: “Nuna medhdhiday Xoossaa gidikko, nuuni waani ufayttanaakko I nuussi kaaletuwa immiyogee bessiyaba gidennee?” Yaatidi keehi maaddiya kaaletoy Geeshsha Maxaafan deꞌiyogaa intte naatussi yootana danddayeeta.

 GEESHSHA MAXAAFAY YOOTIYO KANDDUWA MAARATA NASHSHANAADAN MAADDITE

9. Intte naati Geeshsha Maxaafay yootiyo kandduwa maarata xeelliyagan oyshaa oychchanaadan oottana danddayiyabay aybee?

⁹ Geeshsha Maxaafay yootiyo kandduwa maarata xeelliyagan intte naati oychchikko, hegaa gaasuwa akeekanawu baaxetite. Geeshsha Maxaafay yootiyobay tuma gidiyogaa ammananawu metootidonaa, woy qassi bantta ammanuwabaa haratuyyo waati qonccissanaakko eribookkonaa? He hanotatun Merinawu Ufayttada Deꞌa! giya maxaafaa issippe xannaꞌiyogan Geeshsha Maxaafay yootiyo kandduwa maarata nashshanaadan intte naata maaddana danddayeeta. b

10. Intte naati Yihoowara dabbotaa minttiyogaa xeelliyagan loytti qoppanaadan waati maaddana danddayeetii?

¹⁰ Intte naati Yihoowara dabbotaa minttanaadan maaddite. Intte naata Geeshsha Maxaafaa xannaꞌissiyo wode, Merinawu Ufayttada Deꞌa! giya maxaafan odettida, naati bantta qofaa yootanaadan maaddiya oyshatanne leemisota goꞌettidi eta wozanan deꞌiyabaa eranawu baaxetite. (Lee. 20:5) Leemisuwawu, timirtte 8y Yihoowa, nuna qohuwappe naagiyabaanne maaddiyabaa yootiya siiqiya laggiyan leemisees. Koyro Yohaannisa 5:3 tobbi simmidi, hagaadan oychchana danddayeeta, “Yihooway he loꞌꞌo laggiya mala gidiyogaa eriyogee, I azazidobaa nuuni waati xeellanaadan oottana koshshii?” Hegee metenna oyshaa milatana danddayees, shin hegaadan oychchiyogee intte naꞌi Yihooway nuna siiqiyo gishshawu, he azazota immidoogaa akeekanaadan maaddana danddayees.—Isi. 48:17, 18.

11. Intte naati Geeshsha Maxaafay yootiyo maarata nashshanaadan waati maaddana danddayeetii? (Leemiso 2:10, 11)

¹¹ Geeshsha Maxaafay yootiyo maarata oosuwan peeshshiyogee nuna waati maaddiyakko tobbite. Geeshsha Maxaafaa woy gallassaa xiqisiya issippe nabbabiyo wode Geeshsha Maxaafay yootiyo maarati intte so asaa waati maaddidaakko tobbite. Leemisuwawu, minni oottiyogeenne tumanchcha gidiyogee demissiyo goꞌꞌaa intte naati akeekiyonaa? (Ibr. 13:18, NW) Qassi Geeshsha Maxaafay yootiyo maarata kaalliyogee payya gidanaadaaninne ufayttanaadan waati maaddiyakko intte qonccissana danddayeeta. (Lee. 14:29, 30) Hegaa mala maarata tobbiyogee intte naati Geeshsha Maxaafay yootiyo zoriya loytti nashshanaadan maaddana danddayees.—Leemiso 2:10, 11 nabbaba.

12. Issi aaway Geeshsha Maxaafay yootiyo zoriya kaalliyogee demissiyo goꞌꞌaa akeekanaadan ba naꞌaa waati maaddidee?

¹² Isteevayyonne A machcheeyyo Eetana giyo naꞌay deꞌees. Yihooway nuna siiqiyo gishshawu higgiya immidoogaa Eetani akeekanaadan eti waati maaddidaakko Isteevi yootiis; hagaadan giis: “Nuuni A hagaa mala oyshata oychida, ‘Yihooway nuuni A azazuwa azazettanaadan koyiyoy aybissee? Hegee I nuna siiqiyogaa waati bessii? Neeni he azazuwa azazettana xayikko aybi hananee?’” Hegaadan tobbidoogee Eetani Yihooway kessido kandduwa maaratun ammanettanaadan maaddiis. Isteevi gujjidikka hagaadan giis: “Nu halchchoy Geeshsha Maxaafay yootiyo hayyoy asa hayyuwappe keehi aadhdhiyogaa Eetani akeekanaadan maaddiyogaa.”

13. Yelidaageeti bantta naati Geeshsha Maxaafay yootiyo maaraa oosuwan peeshshanaadan waati loohissanaakko bessiya leemisuwa yoota.

¹³ Intte naati Geeshsha Maxaafay yootiyo maarata oosuwan peeshshanaadan loohissite. Leemisuwawu, intte naati tamaare son issi maxaafaa nabbabanaadan doorettana danddayoosona. He maxaafay an odettida asatudan shori baynnabaa oottanaadan woy hanqquwa suullanaadan minttettana danddayees. Asay hegaa malabaa oottiyo woy haasayiyo wode, Yihoowawu aybi siyettiyakko intte naati qoppanaadan oyshata oychchana danddayeeta. (Lee. 22:24, 25;  1 Qor. 15:33; Pili. 4:8) Hegee intte naati kifiliyan he maxaafaabaa tobbiyo wode, bantta asttamaariyawunne banttanaara tamaariyageetuyyo markkattanaadan maaddana danddayees.

INTTE NAATI BANTTA AMMANUWAWU EXATANAADAN MAADDITE

14. Yelaga gidida Kiristtaaneti haratuura aybaa xeelliyagan tobbanawu yayyana danddayiyonaa, qassi aybissi?

¹⁴ Yelaga gidida Kiristtaaneti bantta ammanuwawu exatanawu issi issitoo yayyana danddayoosona. Leemisuwawu, eti lodda laamiyan ammanenna gaasuwa haratussi qonccissana koshshiyo wode yayyana danddayoosona. Aybissi? Eta asttamaareti lodda laamee tuma giidi tamaarissana danddayoosona. Intte aawa woy aayo gidikko, intte naati bantta ammanuwawu loytti exatanaadan waati maaddana danddayeetii?

15. Issi yelaga Kiristtaanee ba ammanuwa minttanaadan aybi maaddana danddayii?

¹⁵ Intte naati bantta ammanuwa minttanaadan maaddite. Intte naati Medhdhidaagan ammaniyo gishshawu yeellatana bessenna. (2 Xim. 1:8) Aybissi? Daro saynttisttetikka deꞌoy qoppennan issi kutti doommibeennaagaa woy qaadadan yibeennaagaa ammanoosona. He saynttistteti deꞌuwan deꞌiya muttumurettida ubbabaa medhdhida eranchchay deꞌiyogaa bessiya naqaashaa demmidosona. Hegaa gishshawu, eti kumetta saꞌan timirtte keettatun odettiya lodda laamiya timirttiyan ammanokkona. Hara ishanttinne michchontti meretan ammanaadan oottida gaasuwa intte naati pilggiyogee bantta ammanuwa minttanaadaaninne xala gidanaadan maaddana danddayees. c

16. Yelidaageeti bantta naati Medhdhidaagan ammaniyo gaasuwa yootanawu giigettanaadan waati maaddana danddayiyonaa? (1 PHeexiroosa 3:15) (Misiliyakka xeella.)

¹⁶ Intte naati Medhdhidaagan ammaniyo gaasuwa yootanawu giigettanaadan maaddite. (1 PHeexiroosa 3:15 nabbaba.) Intte jw.org saytiyan meretaabaanne lodda laamiyabaa yootiya qofata pilggiyogee inttena maaddana danddayees. Medhdhidaagee deꞌiyogaa harati akeekanaadan maaddanawu intte naati yan deꞌiya issi qofaa doorana danddayoosona. He qofaa intte naatuura tobbite. Intte naati banttanaara tamaariyageetuura palamettana koshshennaagaa hassayissite. Issi uri hegaabaa haasayanawu koyikko, intte naati hegaabaa akeekanawu metennanne ammanttiya ogiyan qonccissanaadan  minttettite. Leemisuwawu, issippe tamaariyagee hagaadan gaana danddayees: “Taani ammaniyobay beꞌiyobaa xalaala, qassi Xoossaa beꞌa erikke.” Kiristtaane gidida issi yelagay hagaadan zaarana danddayees: “Neeni asi deꞌiyo heeraappe haakkidi deꞌiya woraa giddon hemettaydda shuchchan loytti keexettida keettaa beꞌidabadan qoppa. Ne hegaabaa woygay? Hegaa keexxida asi deꞌiyogee qoncce. Saꞌaanne deꞌuwan deꞌiya ubbabaa xeelliyagankka hanotay hegaa mala. Hegaa medhdhidaagee deꞌiyogee qoncce!”

17. Yelidaageeti bantta naati Geeshsha Maxaafaa tumaa haratuyyo yootiyo injjiya koyanaadan waati minttettana danddayiyonaa? Leemisuwa yoota.

¹⁷ Intte naati Geeshsha Maxaafaa tumaa haratussi yootiyo injjiya koyanaadan minttettite. (Roo. 10:10) Geeshsha Maxaafaabaa harata tamaarissiyogaa muuziqa miishshaa kaaꞌiyogaa tamaariyogaara geeddarssana danddayeeta. Hegaa tamaariyagee koyro heeran kaaꞌanawu metenna muuziqaa meezetana danddayees. Muuziqaa miishshaa kaaꞌiyogee loddan loddan metennaba gidees. Hegaadankka, issi yelagay koyro heeran ba ammanuwabaa qanttan yootana danddayees. Leemisuwawu, I banaara tamaariyagaa hagaadan oychchana danddayees: “Saynttistteti darotoo meretaa milatissidi oottiyogaa eray? Ufayssiya issi biiduwa ane nena bessays.” Hagaa Giigissiday Deꞌii? giyagaappe issi biiduwa bessi simmidi I hagaadan oychchana danddayees: “Issi saynttisttee meretan deꞌiyabaa milatissidi oottiyo wode sabettikko, nuuni meretaa beꞌiyo wode oona sabbana bessii?” Hegaadan tobbiyogee aara tamaariyagee Yihoowabaa gujjidi eranawu koyanaadan oottana danddayees.

INTTE NAATI BANTTA AMMANUWA MINTTANAADAN UBBATOO MAADDITE

18. Yelidaageeti bantta naati Xoossan mintti ammananaadan ubbatoo waatana danddayiyonaa?

¹⁸ Nuuni Yihoowa ammanenna asay kumido alamiyan deꞌoos. (2 PHe. 3:3) Hegaa gishshawu, yelidaageetoo intte naata Geeshsha Maxaafaa xannaꞌissiyo wode, eti Xoossaa Qaalaanne I kessido kandduwa maarata kaseppe aaruwan bonchchanaadan maaddiyabata pilggana mala minttettite. Yihooway medhdhidobata xeelliyagan issippe tobbiyogan eti loytti qoppanaadaaninne Yihoowan loytti ammananaadan maaddite. Polettida malaalissiya Geeshsha Maxaafaa hiraagata eti akeekanaadan maaddite. Ubbaappe aaruwan, intte naatuura woossite; qassi etawu woossite. Intte yaatiyo wode, intte naatu ammanuwa minttanawu intte baaxetiyo baaxiya Yihooway anjjanaagaa ammanettana danddayeeta.—2 Odi. 15:7.