Asay merettido wodiyaappe doommidi, Medhdhidaagee kiitanchchatunne hananabaa yootiyaageetu baggaara haasayiis. Qassi, I yootidobaynne qaalaa gelidobay xaafettanaadan oottiis. Nuuni sinttappe ufayttana danddayiyoogaa Xoossay qaalaa geliis. Yaatin, Xoossay qaalaa gelidobata neeni ha wodiyan awuppe demmana danddayay?

Xoossay nuussi yootidobay Xoossaa qaalan deˈees. (2 Ximootiyoosa 3:16, 17) Xoossay I odidobaa xaafanaadan hananabaa yootiyaageeta waati goˈettidee? Xoossay xaafiyaageetu kahan ba qofaa wottin, eti hegaa xaafidosona. (2 PHeexiroosa 1:21) Hegaa issi alaafee oottiyooban leemisana danddayoos. Issi alaafee ba xaafee A gishshaa dabddaabbiyaa xaafanaadan oottikko, he dabddaabbee alaafiyaagaa gidiyoogaa nuuni eroos. Hegaadankka, Xoossay ba qofaa attuma asati xaafanaadan goˈettikkonne, Xoossaa Qaalay Xoossaagaappe attin, asaagaa gidenna.

Xoossaa Qaalay keehi koshshiyaaba gidiyo gishshawu, ubba asay nabbabanaadaaninne akeekanaadan I koyees. Ha wodiyan, A ‘merinaa wonggeliyaa mishiraachchoy asa ubbaayyo, zare ubbaayyo, dumma dumma biittaa qaala ubbaayyo’ gakkiis. (Ajjuutaa 14:6) Xoossay maaddin, A Qaalay kumettay woy appe amaridaagee alamiyan deˈiya hara ay maxaafaappenne aaruwan 3,000⁠ppe dariya qaalan deˈees.