Issi issi asay xaafettida Xoossaa Qaalay laamettideeshsha giidi qoppees. Hananabaa yootiya Isiyaasi Xoossaa Qaalay, “merinau eqqidi de7ees” yaagiis. (Isiyaasa 40:8) Xoossay qaalaa gelidobay aynne laamettibeennaagaa waani ammanettana danddayiyoo?

Xoossay ba Qaalay laamettennaadaaninne hambbalaashettennaadan naaganawu awu wolqqay deˈees. Leemisuwawu, beni wode Xoossaa Qaalaappe duuqqidi kushiyan xaafiyaageeti aynne gujjennaadan, laammennaadaaninne pitaleta ubbaa qoodidi keehi naagettidi xaafidosona. Gidikkonne, asan bali xayenna; qassi issi issi xaafeti amaridabaa balidosona.

Kushiyan beni xaafettida shaˈan qoodettiya Xoossaa Qaalay deˈees. Kushiyan xaafettidaageeta issuwaa haraara geeddarssiyoogan mooruwaa woy balaa metootennan demmana danddayettees.—Gujjada eranawu, “Geeshsha Maxaafay Laamettidee Woy Walahettidee?” giya huuphe yohuwan jw.org/am saytiyan kiyidaagaa xeella.

Leemisuwawu, 1947n bedwins giyo sheeshshati Maxine Abbaa matan deˈiya gonggoluwaappe demmido, Maxine Abbaa Xaatta Maxaafata giyo beni xuufeta qoppa. He 2000⁠ppe dariya layttaa gamˈˈida beni xaafetida xuufeti Xoossaa Qaalaa shaaho. Eranchchati kushiyan beni xaafettida xuufeta ha wodiyan deˈiya Xoossaa Qaalaara geeddarssidosona. Eti ay demmidonaa?

Eranchchati kushiyan beni xaafettida xuufeta loytti pilggidi, ha wodiyan deˈiya xaafetida Xoossaa Qaalay koyro xaafettidaagaara issi mala gidiyoogaa akeekidosona. * Geeshsha Xuufeti aynne laamettennan deˈanaadan Xoossay ha wodiyaa gakkanaashin naagidoogaa ammanettana danddayoos.

Hegaa gishshawu, Xoossaa Qaalay likke gidiyoogaa kumetta wozanappe ammanettidi nabbabana danddayoos. Hegaa nu wozanan wottidi, Xoossay kiittin hananabaa yootiyaageetuppe Xoossaabaa nuuni ay tamaarana danddayiyaakko ane kaallidi pilggoos.