Loˈˈo Haymaanootee Asa Ubbaa Siiqanaadan Minttettees

“XOOSSAI siiqo gidiyo gishshau, siiqenna urai ooninne Xoossaa erenna.” (1 Yohaannisa 4:8) Hegaa gishshau, loˈˈo haymaanootee asa ubbaa siiqanaadan minttettana koshshees.

Daro haymaanooteti sahettidaageetussi, cimidaageetussinne hiyyeesatussi koshshiyaabaa kunttiyoogan loˈˈo ooso oottoosona. Eti kiitettida Yohaannisi: “SHin dure asi ooninne ba ishai metootiyoogaa be7iiddi, ayyo qarettennan ixxikko, ba wozanan Xoossaa siiqoi de7ees gaanau waani danddayii? Ta naatoo, nuuni oosuwaaninne tumatettan siiqettanaappe attin, coo haasayan woikko bolla doonan  siiqettanau bessenna” yaagido zoriyaa bantta yameti oosuwan peeshshanaadan minttettoosona.—1 Yohaannisa 3:17, 18.

Gidoppe attin, kawotettati olettiyo wode waatiyoonaa? Xoossay: “Neeni ne shooruwaa ne huuphedan siiqa” yaagido zoriyaa sarotetta wodiyan oosuwan peeshshidi, polotikan ayssiya issi uri woykko kawoy shooro biittaara olettanau koyiyo wode aggiigana koshshii?—Maatiyoosa 22:39.

Yesuusi: “Intte issoi issuwaara siiqettikko, ta erissiyo ashkkarata gidiyoogaa asai ubbai erana” yaagiis. (Yohaannisa 13:35) Kaalliya oyshaa zaariyo wode, ‘Ha haymaanootiyaa yameti doona xalaalan gidennan, oosuwankka ubba asaa ubba wode siiqiyoogaa bessiyoonaa?’ yaagada nena oycha.

HUUPHE YOHUWAA: Olaa.

GEESHSHA MAXAAFAY TAMAARISSIYOOBAA: Yesuusi ba erissiyo ashkkarata: “Intte morkketa siiqite; . . . inttena ixxiyaageetuyyo lo77obaa oottite” yaagidi azaziis.—Maatiyoosa 5:44.

Wotaaddarati Yesuusa oyqqanau yiido wode kiitettida PHeexiroosi Yesuusa ashshanau bisuwaa kessiis. SHin, Yesuusi: “Ne bisuwaa a shoohuwan zaarada wotta; aissi giikko, biso shoddiya ubbai bison haiqqana” yaagiis.—Maatiyoosa 26:52.

Kiitettida Yohaannisi: “Xoossaa naatu giddooninne xalahe halaqaa naatu giddon de7iya dummatettai hagan erettees; xillobaa oottenna urai woikko ba ishaa siiqenna urai ooninne Xoossaa Na7a gidenna. Aissi giikko, koiroosappe intte siyido kiitai, ‘Issoi issuwaara siiqettanau bessees’ yaagiyaagaa. Nuuni Qaayeela mala gidanau bessenna. Qaayeeli xalahe halaqaassa; yaanidi ba ishaa woriis” yaagidi xaafiis.—1 Yohaannisa 3:10-12.

OYSHAA: Ha haymaanootee ba yameti olan shaahettanaadan minttettii?

HUUPHE YOHUWAA: Polotikaa.

GEESHSHA MAXAAFAY TAMAARISSIYOOBAA: Issoti issoti Yesuusi maalaaliyaaba oottana danddayiyoogaa beˈi simmidi, i polotikan gelanaadan koyidosona. I eti koyidoogaadan oottidee? “Eti yiidi bana oiqqidi, wolqqan kawo oottanau haniyoogaa Yesuusi eridi, barkka deriyaa bolli naa77anttuwaa kiyiis.”—Yohaannisa 6:15.

Yesuusa oyqqidi, asay kawotettaa bolli denddanaadan oottees giidi wordduwan mootido wode, i: “Ta kawotettai ha sa7aana gidenna. Ta kawotettai ha sa7aana gididaakko, tana Aihudatuyyo aatti immennaadan, ta ashkkarati tau olettana; shin ta kawotettai ha sa7aana gidenna” yaagidi zaariis.—Yohaannisa 18:36.

Yesuusi erissiyo ashkkarata xeelliyaagan Xoossaakko woossido wode: “Taani etau ne qaalaa immaas; taani sa7aassa gidennaagaadan, etikka sa7aassa gidenna gishshau, sa7ai eta ixxiis” yaagiis.—Yohaannisa 17:14.

 OYSHAA: Polotikan ayssiya issoti issoti a yameta ixxanaba gidikkokka, ha haymaanootee Yesuusa leemisuwaa kaallidi polotikan geliyoogaappe haakkii?

HUUPHE YOHUWAA: Gaasoy baynnan ixxiyoogaa.

GEESHSHA MAXAAFAY TAMAARISSIYOOBAA: Ayhuda gidenna, qaxxarettibeennaageeti koyro Kiristtaane gidido wode, kiitettida PHeexiroosi: “Xoossai asa som77o xeellenna; shin dere ubban baassi yayyiyaagaanne xillo ooso oottiyaagaa galatiyoogaa taani tumu akeekaas” yaagiis.—Oosuwaa 10:34, 35.

Yaaqoobi koyro xeetu layttan deˈida Kiristtaanetussi: “Ta ishatoo, intte nu bonchcho Godaa Yesuus Kiristtoosa ammaniiddi, som77o xeellidi, asa bonchchoppite. Aissi giikko, worqqa migido wottidi, lo77o maayo maayida issi asi intte shiiquwaa yiikko, qassi curqqa maayo maayida hiyyeesa asikka yiikko, lo77o maayuwaa maayida bitaniyaa intte aatti bonchchidi a, ‘Neeni hagan ubbaappe lo77iya oidiyan utta’ giidi, qassi hiyyeesa bitaniyaa, ‘Neeni hinin eqqashsha; woi hagan ta tohuwaa matan sa7an utta’ giikko, Yaatin intte intte giddon shaahotettaa medhdhiyaageetanne iita qofaara de7iya daannata gidekketiiyye?” yaagidi xaafiis.”—Yaaqooba 2:1-4.

OYSHAA: Ubba asay Xoossaa sinttan issi lagge gidiyoogaanne haymaanootiyaa yameti zariyan woykko ikkonoomiyaa hanotan oonanne shaakki xeellana koshshennaagaa ha haymaanootee tamaarissii?

[Sinttaa 7n deʼiya misiliyaa qonccissuwaa]

Asaa giddon shaahotettaa medhiya polotikaa, zariyaanne ikkonoomiyaa dummatettaa xoonanaadan tamaarissiya haymaanootee awugee?