Geeshsha Ayyaanaa—medhanau Goˈettidoogaa!
Geeshsha Ayyaanaa—medhanau Goˈettidoogaa!
“GODAA qaalan saloti merettidosona. A doonaappe kiyiya shemppuwan etan de7iya awai, aginainne xoolintteti oosettidosona.”—MAZ. 33:6.
1, 2. (a) Saluwaanne saˈaa xeelliyaagan asaa naatu eray gujji gujji biidoy ayba ogiyaanee? (b) Zaaroy koshshiyo oyshay awugee?
XEETAAPPE dariya layttaappe kase daro saynttistteti, salo gufanttuwan deˈiya gaalakisee woykko xoolinttetu citay milkkiwey geetettiyaagaa xalla giidi qoppidosona. Eti salo gufanttuwaa aahotettaa ay keena guutti xeellidonaa! Ha wodiyan, salo gufanttuwan 100 biilooneppe dariya gaalakisee deˈiyoogaadan asay qoppees; hegeetuppe issoti issoti biilooniyan qoodettiya xoolintteta oyqqidaageeta. Haahuwan deˈiyaabaa kaseegaappe aaruwan bessiya teleskopeta goˈettiyo wode, beˈiyo gaalakisetu qooday gujji gujji bees.
2 Saynttistteti xeetu layttappe kase salo gufanttobaa eriyoobay guutta gidiyoogaadan, saˈaabaa eriyoobaykka guutta. Xeetu layttappe kase deˈida asati eriyoobay banttappe kase deˈidaageetuugaappe aadhiyoogee erettidaba. Gidikkokka, meretay ay keena loˈˈiyaakkonne muttumurettidaakko, qassi saˈay ba bolli deˈiya meretau koshshiyaabaa waatidi kunttiyaakko he wodeegaappe aaruwan ha wodiyan erettiis. Sinttappe nuuni saˈaabaanne saluwaabaa darobaa tamaaranaagee sirissenna. SHin, Ha ubbabay koyro waani merettidee? giidi oychiyoogee bessiyaaba. Medhidaagee Geeshsha Maxaafaa bagaara hegaa qonccissidoogaa xallan, ha oyshaa zaaruwaa erana danddayoos.
Meretay Maalaalissees
3, 4. Xoossay salo gufantto saˈa micettaa waatidi medhidee, qassi a oosoy a bonchissiyoy ayba ogiyanee?
3 “Xoossai salotanne sa7aa koiro medhdhiis” yaagiya, Geeshshaa Maxaafau doomettan deˈiya qaalati salo gufanttoynne saˈa micettay waani merettidaakko qonccissoosona. (Doo. 1:1) Aybinne baynna wode, beettiya saluwaa, saˈaanne salo gufanttuwan saˈa micettan deˈiya ubbabaa medhanau Yihooway ubbabaappe wolqqaama gidida ba ayyaanaa goˈettiis. Hiillancha uri issibaa medhanau ba kushiyaanne medhiyo miishshaa goˈettees; shin Yihooway ba gita oosuwaa polanau ba geeshsha ayyaanaa kiittees.
4 Geeshsha Maxaafay geeshsha ayyaanaa Xoossaa ‘biradhiyan’ leemisees. (Luq. 11:20, NW; Maa. 12:28) A ‘kushiyaa oosoti,’ giishin Yihooway ba geeshsha ayyaanan medhidobati a keehippe bonchissoosona. Mazamuraawee, “Saloti Xoossaa bonchchuwaa haasayoosonanne salotu gufanttoi i ba kushiyan oottidobaa awaajjees” yaagidi yexxiis. (Maz. 19:1) Beettiya meretay Xoossaa geeshsha ayyaanay maalaalissiya wolqqa gidiyoogaa qonccissiyoogee tuma. (Roo. 1:20) Waatidi qonccissii?
Zawi Baynna Xoossaa Wolqqaa
5. Yihooway medhanau goˈettido geeshsha ayyaanay ay keena wolqqaamakko leemisuwan qonccissa.
5 Nu qofaappe aaruwan aaho gidida salo gufantto saˈa micettay, Yihoowa wolqqaynne abbee zawi baynnaagaa gidiyoogaa qonccissees. (Isiyaasa 40:26 nabbaba.) Awa ayfiyaa qoppite. Xoolinttetuppe issuwaa gidida, awa ayfee saˈaappe 150 biiloone kilo meetireppe dariyaagaa haakkees; qassi 15 miiloone digire Selishese gidiyaagaa hoˈˈees. Awa ayfee keehippe michiyaaba gidikkokka, saˈan deˈiya ubbabay deˈon deˈanaadan bessiya sohuwan deˈees. Awaa xalla gidennan biilooniyan qoodettiya hara xoolinttetakka medhanau zawi baynna wolqqaynne abbee koshshidoogee qoncce. Hegaadan oottanau koshshida wolqqay Yihoowayyo deˈees.
6, 7. (a) Nuuni Xoossay ba geeshsha ayyaanaa bessiyaagaadan goˈettiis gaana danddayiyoy aybissee? (b) Salo gufanttoy qaadadan hanibeennaagaa bessiyay aybee?
6 Xoossay medhanau ba geeshsha ayyaanaa bessiya ogiyan goˈettidoogaa qonccissiyaabay nu yuushuwan kumiis. Leemisuwau, dumma dumma meray deˈiyo kuwaasee kumido saaxinee intteyyo deˈiyaabadan qoppite. Saaxiniyaa qaattidi kuwaasiyaa walakkeetta. Yaatidi, ubba kuwaasiyaa issi kutti saˈan laaleeta. Ubba kuwaasee ba meran meran issippe shiiqidi saˈan wodhees giidi qoppeetii? SHiiqennaagee qoncce! Kaalli xeellennan oottiyoobay ubbay mankkatiyoogaappe maara xayees. Asay hegee tuma gidiyoogaa ammanees.
7 Gido shin, nuuni salo gufanttuwaanne a giddon deˈiyaabaa xannaˈiyo wode ay akeekiyoo? Zawi baynnanne keehippe maaraa naagida gaalakiseti, xoolinttetinne pilaaneeteti ubbay bali baynnan yuuyiyoogaa akeekoos. Hegee ubbay qaadadan woykko halchennaaninne kaalli xeellennan hanidaba gidana danddayenna. Yaatiyo gishshau nuuni, Maaraa mankkaa naagida salo gufanttuwaa medhanau koyro goˈettido wolqqay aybee? yaagidi oychana bessees. Saynisiyan pilggiyoogaa xallan, salo gufanttuwaa medhanau goˈettido wolqqaa eranau asaa naatu abbee asha. Gidikkokka, he wolqqay salo gufantto saˈa micettan keehippe gita gidida, Xoossaa geeshsha ayyaanaa gidiyoogaa Geeshsha Maxaafay yootees. Mazamuraawee, “GODAA qaalan saloti merettidosona. A doonaappe kiyiya shemppuwan etan de7iya awai, aginainne xoolintteti oosettidosona” yaagidi yexxiis. (Maz. 33:6) Nuuni qammi saluwaa xeelliyo wode, he xoolinttetuppe beˈana danddayiyoy keehi guutta.
Geeshsha Ayyaanaanne Saˈaa
8. Nuuni tumuppe Yihoowa oosuwaabaa eriyoy ay keenee?
8 Eranau danddayiyo ubbabaara gatti xeelliyo wode, meretaabaa nuuni eridobay keehippe guutta. Iyyoobi, “Hageeti ubbai Xoossai oottido oosotuppe amaridaageeta; nuuni siyoogee saasuketta xalaala” giidoogaadan, Xoossay medhidobaa xeelliyaagan ha wodiyankka nuussi deˈiya eray keehi guutta. (Iyy. 26:14) Yihoowa meretaabaa loytti akeekida Kawuwaa Solomoni, xeetan qoodettiya layttay aadhi simmin, “Xoossai ubbabaa a wodiyan wodiyan loittidi oottiis. Xoossai asaa wozanan merinatettaa wottiis; hegaa gidikkonne, Xoossai oottidobaa ubbaa koiruwaappe wurssettai gakkanaashin, asai wurssidi eranau danddayenna” yaagiis.—Era. 3:11; 8:17.
9, 10. Xoossay saˈaa medhiyo wode goˈettido wolqqay aybee, koyro heezzu meretaa gallassatun oosettida issi issibati aybee?
9 Gidikkokka, Yihooway ba oosuwaa xeelliyaagan erana koshshiya ubbaa qonccissiis. Leemisuwau, keehi daro wodiyaappe kase Xoossaa ayyaanay saˈan ooso bolli deˈiyoogaa Geeshsha Maxaafay yootees. (Doomettaabaa 1:2 nabbaba.) He wode saˈan mela sohoynne pooˈoy baawa; shemppiyo carkkoykka deˈiyaaba milatenna.
10 Meretaa medhido usuppun gallassatun Xoossay oottidobaa Geeshsha Maxaafay qonccissees. He gallassati 24 saatee deˈiyo gallassata gidennan, keehi daro wode. Koyro gallassi Yihooway pooˈoy saˈaa bolli pooˈiyoogaa doommanaadan oottiis. Hegee guyyeppe awa ayfeenne aginay saˈan qonccidi beettido wode polettiis. (Doo. 1:3, 14) Naaˈˈantto gallassi saˈaa heeran deˈiya carkkoy giigiis. (Doo. 1:6) He wode, saˈan haattay, pooˈoynne carkkoy deˈiyaaba gidikkokka mela sohoy baawa. Heezzantto gallassaa doomettan, mela biittay saˈa yuushuwan deˈiya haattaappe pude kiyanaadan Yihooway ba geeshsha ayyaanaa goˈettiis. (Doo. 1:9) Heezzantto gallassaaninne hegaappe simmin deˈiya wodetun hara maalaalissiyaabati oosettidosona.
Geeshsha Ayyaanaanne Saˈan Deˈiya Meretata
11. Muttumurettida, giiganne loˈˈiya ogiyan merettida deˈon deˈiyaabati ay qonccissiyoonaa?
11 Xoossaa ayyaanay keehi maalaaliya ogiyan giigida deˈoy deˈiyoobati merettanaadankka oottiis. Heezzantto meretaa gallassaappe usuppuntta gallassa gakkanaashin deˈiya wodiyan Xoossay ba geeshsha ayyaanaa goˈettidi dumma dumma qommo mittaa, maataa, doˈaanne mehiyaa medhiis. (Doo. 1:11, 20-25) Yaatiyo gishshau, aybippenne aadhiya diizayiniyan giigidoogaa qonccissiya, muttumurettida, giiganne loˈˈiya ogiyan merettida deˈon deˈiya zawi baynnabati deˈoosona.
12. (a) Di en ee oosoy aybee? (b) Di en ee oottiyo laamettenna muruta oosuwaappe nuuni ay tamaarana koshshii?
12 Deˈon deˈiyaabaa qommoy laamettennan yeletaappe yeletau aadhanaadan oottiya Di en ee (deoxyribonucleic acid) qoppite. Deˈuwan deˈiya ayfiyan beettennabata, maataa, danggarssaa, bilu huwel giyo gita moliyaanne asaa naata gujjin, saˈaa bollan deˈon deˈiyaabay ubbay yelettanaadan oottiyay Di en ee. Saˈan deˈiya meretati keehippe dumma dumma gidikkonne, eti meretan laattiyoobaappe darobau kaaleto gidiya Di en ee laamettenna; qassi aadhida daro wodiyan meretaa giddon deˈiya dummatettay laamettennan deˈanaadan oottiis. Yaatiyo gishshau, saˈan deˈiya dumma dumma qommo meretati, Xoossaa Yihooway halchidoogaadan issoy issuwaara gayttiyo muttumurettida hanotan bantta oosuwaa oottiiddi deˈoosona. (Maz. 139:16) Ha keehi murutanne giiga gidida gaytotettay meretay Xoossaa “biradhiyaa” woykko geeshsha ayyaanaa ooso gidiyoogau hara naqaasha.
Saˈan Merettidabatuppe Aadhiyaagaa
13. Xoossay asaa waatidi medhidee?
13 Keehi daro layttay aadhi simmin, qassi Xoossay deˈuwan deˈiyaanne deˈon deˈenna darobaa medhi simmin, saˈay ‘giigiichibeennanne aybinne baynna mela soho’ gidiyoogee attiis. Gidikkokka, Yihooway geeshsha ayyaanaa goˈettidi medhiyoobay he wode wuribeenna. Saˈan merettida ubbabaappe aadhiyaagaa medhana hanees. Usuppuntta gallassaa wurssettaa heeran Xoossay asaa medhiis. Yihooway hegaadan oottidoy ayba ogiyaanee? Saˈan deˈiyaabaa goˈettidi ba geeshsha ayyaanan hegaadan oottiis.—Doo. 2:7.
14. Asaa naata mehiyaa doˈaappe dummayiya waannabay aybee?
14Doomettaabaa 1:27y, “Xoossai asaa ba leemisuwan medhdhiis; i a Xoossaa leemisuwan medhdhiis; i eta attumaasanne maccaasa medhdhiis” yaagees. Nuuni Xoossaa leemisuwan merettida giyoogee, siiqanaadan, koyidobaa dooranaadaaninne Medhidaagaara dabbotaa medhanaadan oottidi Yihooway nuna medhiis giyoogaa. Yaatiyo gishshau, nu guuggee mehiyaa doˈaagaappe keehi dumma. Yihooway babaanne i medhidobaa merinau ufayssan tamaarana danddayiyo ogiyan asaa naatu guuggiyaa giigissiis.
15. Addaameyyoonne Hewaaniyyo imettida hidootay aybee?
15 Asaa naatu taarikiyaa doomettan, Addaameenne a machiyaa Hewaana saˈaanne a bolli deˈiya maalaaliya ubbabaa pilgganaadaaninne an ufayttanaadan Xoossay etau immiis. (Doo. 1:28) Yihooway daro qumaanne gannatiyaa etau giigissiis. Merinau deˈiyoonne polo gidida, biilooniyan qoodettiya zerettau siiqo aawanne aayo gidiyo hidootay etau imettiis. SHin hanotay hegaadan hanibeenna.
Geeshsha Ayyaanau Deˈiya Sohuwaa Akeekiyoogaa
16. Koyro asati makkalidaba gidikkokka, nuussi ayba hidootay deˈii?
16 Addaameenne Hewaana banttana Medhidaagaa galatidi azazettiyoogaappe, banttana siiqiyoogan makkalidosona. Hegaappe denddidaagan, polo gidenna eta zerettay ubbay waayettiis. SHin nu koyro aawaynne aayyiyaa oottido nagaraa gaasuwan moorettida ubbabaa Xoossay waatidi giigissanaakko Geeshsha Maxaafay qonccissees. Yihooway koyro halchidobaa polanaagaakka Geeshsha Maxaafay yootees. Saˈay merinaa deˈuwaa anjjuwaa demmiya, payyatettay deˈiyo ufayttiya asan kumida gannate gidana. (Doo. 3:15) Ha ufayssiya anjjuwan ammaniyo ammanuwaa naagidi deˈanau, Xoossaa geeshsha ayyaanaa maadoy nuuyyo koshshees.
17. Nuuni haakkana bessiyo qofay awugee?
17 Yihoowa geeshsha ayyaanaa demmanau nuuni woossana koshshees. (Luq. 11:13) Hegaadan oottiyoogee meretay Xoossaa kushe ooso gidiyoogau nuuyyo deˈiya ammanuwaa minttanaadan maaddees. Ha wodiyan, naqaashi baynna worddo qofan baasettida, Xoossi baawa giyo ammanoynne lodda laamiyaa qofay dari dari biis. Keehi darida ha worddo qofay nuna balettana woy yashshana koshshenna. Hegaa mala worddo qofaanne aara gaytotettay deˈiyo laggetu sugettaa eqettanau Kiristtaaneti ubbay giigettana bessees.—Qolasiyaasa 2:8 nabbaba.
18. Salo gufantto saˈa micettaanne asaa naatu doomettaabaa qoppiyo wode, Medhida eranchay deˈiyoogaa kashi giyoogee eeyyatetta gidiyoy aybissee?
18 Geeshsha Maxaafaaninne Xoossan ammaniyo ammanoy meretay merettidoogaa kaafiya naqaashaa wozanappe pilggiyoogan minniyoogee qoncce. Salo gufantto saˈa micettaanne asaa naatu doomettaabaa wotti dentti qoppiyoogan, saynisiyan erana danddayiyoobaappe attin ubbabay merettanaadan oottida hara wolqqi deˈees gi ammaniyoogee bessennabadan daroti qoppoosona. Gidoppe attin, nuuni hanotaa hegaadan xeelliyaaba gidikko, naqaashatuppe amaridaageeta shaakki xeelliyaageeta gidoos. Hegaa bollikka, giiga ogiyan deˈiya, halchuwan giigida “qoodi bainna”qoncce gidida meretaa xaasayi xeelliyaageeta gidoos. (Iyy. 9:10; Maz. 104:25) Nuuni Kiristtaane gidiyoogaadan, meretaa medhanau Yihooway eratetta kaaletuwan goˈettido wolqqay geeshsha ayyaanaa gidiyoogaa eroos.
Geeshsha Ayyaanaanne Xoossan Nuuni Ammaniyoogaa
19. Xoossay deˈiyoogaanne a ayyaanay oottiyoogaa issi urau qonccissiyaabay aybee?
19 Xoossan ammananau, qassi a siiqanaunne bonchanau nuuni meretaabaa ubbabaa erana koshshenna. Issi uraara laggetiyoogaadan, Yihoowan ammaniyoogee eriyoobaappe aadhiyaaban baasettidaba. Laggetu giddon deˈiya gaytotettay issoy issuwaa loyttidi eriyo wode minniyoogaadan, nuuni Xoossaabaa darobaa tamaariyo wode an ammaniyo ammanoy minnees. I nu woosaa zaariyo wodenne a baaso siraataa nu deˈuwan oosuwan peeshshiyoogaa goˈˈaa nuuni akeekiyo wode, i deˈiyoogee nuuyyo qonccees. Yihooway nuna kaalettiyoogaa, naagiyoogaa, a oosuwan nuuni baaxetiyo wode anjjiyoogaanne nuuyyo koshshiyaabaa kunttiyoogaa qonccissiyaabay gujji gujji biyo wode, kaseegaappe aaruwan akko shiiqoos. Ha ubbabay Xoossay deˈiyoogaanne a geeshsha ayyaanay oottiyoogaa keehippe qonccissiyaaba.
20. (a) Xoossay salo gufantto saˈa micettaanne asaa naata medhidoy aybissee? (b) Nuuni Xoossaa ayyaanaa kaaletuwaa ubbatoo kaalliyaaba gidikko, ay demmanee?
20 Geeshsha Maxaafaa xaafidaageeti “Geeshsha Ayyaanai kaalettin, Xoossaa qaalaa” haasayido gishshau, Yihooway ba wolqqaa goˈettiyoogau Geeshsha Maxaafay keehi loˈˈo leemiso. (2 PHe. 1:21) Geeshsha Maxaafaa akeekan xannaˈiyoogee ubbabaa medhiday Xoossaa gidiyoogaa nuuni ammaniyo ammanuwaa minttana danddayees. (Ajj. 4:11) Yihooway medhanaadan denttettiday ufayssiya a eeshshaa, siiquwaa. (1 Yoh. 4:8) Yaatiyo gishshau, saluwan deˈiya nu siiqo Aawaabaa harati eranaadan maaddanau nuuyyo danddayettida ubbabaa oottiyaageeta gidoos. Nuuni Xoossaa ayyaanaa kaaletuwaa ubbatoo kaalliyaaba gidikko, merinau abaa tamaariyo maataanne injjiyaa demmoos. (Gal. 5:16, 25) Nuuni ubbay Yihoowabaanne a gita oosuwaabaa ubbatoo tamaariyaageetanne i saluwaa, saˈaanne asaa naata medhanau ba geeshsha ayyaanaa goˈettido wode bessido siiquwaa leemisuwaa nu deˈuwan qonccissiyaageeta gidoos.
Qonccissana Danddayay?
• Saloynne saˈay Xoossay geeshsha ayyaanaa goˈettiyoogaabaa nuna ay tamaarissii?
• Xoossaa leemisuwan merettidoogan nuuni ayba maata demmidoo?
• Meretaabaa qonccissiya naqaashaa nuuni pilggana koshshiyoy aybissee?
• Yihoowaara deˈiya dabbotaa nuuni minttana danddayiyoy ayba ogetuunee?
[Oyshata]
[Sinttaa 13n deʼiya misiliyaa qonccissuwaa]
Salo gufantto saˈa micettan qonccida maaray meretaabaa nuuni ay tamaaranaadan oottii?
[Sinttaa 13 qonccissuwaa]
Xoolintteta: Anglo-Australian Observatory/David Malin Images
[Sinttaa 14n deʼiya misiliyaa qonccissuwaa]
Di en ee ha ubba meretau waatidi issi mala ogiyan oottii?
[Sinttaa 16n deʼiya misiliyaa qonccissuwaa]
Intte ammanuwau exatanau giigettidetii?
