Yesuusi Polotikaa Ayba Ogiyan Xeellidee?

YESUUSI saˈan haggaaziyo wode, polotikaaban daro paacee a bolli gakkidoogaa Wonggeliyaa xaafidaageeti qonccissidosona. Leemisuwau, Yesuusi baayyo layttay 30 heera gidin xammaqetti simmin daro takkennan, i alamiyaa haariyaagaa gidanaadan Dabloosi shoobbiis. Hegaappe takkidi, a haggaazuwaa wodiyan asay a kawoyanau koyiis. Guyyeppe qassi, asay i polotikaa laamiyaa kaalettiyaagaa gidanaadan denttettanau maliis. Yesuusi ay oottidee? Ha hanotata ane beˈoos.

Saˈaa haariyaagaa. Yesuusi “sa7an de7iya kawotetta” ubbaa bolli haaranaadan Dabloosi a shoobbidoogaa Wonggeleti bessoosona. Yesuusi saˈaa haariyaagaa gidiyaakko, tuggatiya asaa naatuyyo ay keena loˈˈobaa oottana danddayiyaakko qoppa! Asaa naatu dichau wozanappe qoppiyaanne polotikay metuwaa xayssana danddayees giidi qoppiya ooninne hegaa mala shoobiyaa ixxis gaanee? SHin Yesuusi he shoobiyaa ekkennan ixxiis.—Maa. 4:8-11.

Kawuwaa. Yesuusa wode deˈiya daro asay ikkonoomiyaabaaninne polotikaaban banttana metuwaappe shemppissana danddayiya, haariya ura keehippe koyidosona. Asay Yesuusau deˈiya eraaninne wolqqan maalaalettidi i polotikan gelanaadan koyiis. I waatidee? Wonggeliyaa xaafidaageetuppe issoy Yohaannisi, “Eti yiidi bana oiqqidi, wolqqan kawo oottanau haniyoogaa Yesuusi eridi, barkka deriyaa bolli naa77anttuwaa kiyiis” yaagiis. (Yoh. 6:10-15) Yesuusi polotikan gelanau koyibeennaagee qoncce.

Polotikaa laamiyaa kaalettiyaagaa. Asay Yesuusa woranaappe amarida gallassaa kasetidi aybi hanidaakko qoppa. Roome Kawotettaappe shaahettanau koyiya, Parisaawetu erissiyo ashkkaratinne Roomata dosiya, Heeroodisa aysuwaa kaafiyaageeti Yesuusakko yiidosona. Eti Yesuusi polotikan gelanaadan wolqqanttanau koyidosona. Ayhudati Roome kawuwau giiraa giiranau koshshiyaakkonne eti Yesuusa oychidosona.

Yesuusi etau hagaadan giidi zaaridoogaa Marqqoosi xaafiis: “‘Tana aissi paacceetii? Issi santtimiyaa haa ehiite; taani be7ais’ yaagiis. Eti au ehiidosona; ‘Ha merainne sunttai oogee?’ yaagidi eta [oychiis]. Oichchin eti, ‘Roome biittaa Kawuwaa Qeesaaraagaa’ yaagidosona. Yesuusi zaaridi eta, ‘Yaatikko, Qeesaaraagaa Qeesaarassi, Xoossaagaa Xoossaassi immite’  [yaagiis].” (Mar. 12:13-17) Yesuusi hegaadan zaaridoy aybissakko, Cherch end Isttet—Zi Isttoori of Tu Kinggdems giyo maxaafay hagaadan gees: “I polotikaa mase gididi oottanau ixxis giis, qassi Qeesaarau bessiyaabaanne Xoossau bessiyaabaa giddon zawaa essiis.”

Hiyyeesatettaa, iita oosuwaanne pirddaa pacaa mala metoy Yesuusa qofissenna giyoogaa gidenna. He wode asay azzanttiya hanotan deˈiyo gishshau i etau keehippe qarettidoogaa Geeshsha Maxaafay qonccissees. (Mar. 6:33, 34) Gidoppe attin, issoti issoti he wode Yesuusi polotikan gelanaadan denttettishinkka, i alamiyan deˈiya pirdda pacaa xayssanau tanggo ekkibeenna.

Ha leemisotuppe beˈiyoogaadan, Yesuusi polotikaa allaalliyan gelanau koyibeenna. Ha wodiyan deˈiya Kiristtaaneti shin ay oottana koshshii?