NEENI keehippe bonchiyo laggee neeyyo deˈiyaabadan qoppa; shin i neeni akeekana danddayennabaa oottees. Harati ne laggiyaa meqettaa iita giidi, i oottiyoobaa boroosonanne a bolli pirddoosona. Eti giyoobaa sohuwaara ammanuuteeyye, woy hegaabaa appe siyanaashin naaguutee? Hanidabaa odanau i heeran deˈennaba gidikko, a bolli eesuwan pirddennan danddayan naaguutee?

Etau zaaranaappe kase he yohuwaa loytta eranau koyennan aggakka. Neeni, ‘Ta laggiyaa loyttada eriyaanaa, qassi taani a bonchanaadan oottidabay aybee?’ gaada oychana danddayaasa. Hegee bessiyaaba. Xoossay meqettaa iiteeyye giya oyshaa xeelliyaagankka ha maaraa kaallana danddayoos.

Xoossay oottido issi issibaa akeekanau metootana danddayaasa, woy qassi issibay hananaadan i aybissi paqqadidaakko neeyyo kirqqi gaana danddayees. Xoossay meqettaa iita giyaanne neenikka etaagaadan a bolli pirddanaadan koyiya daro asay deˈees. SHin allaalliyaa loytta erana gakkanaashin a bolli eesuwan pirddennan agguutee? Ha oyshaa zaaroy neeni Xoossaa ay keena loytta eriyaakko bessiyaaba gidana danddayees. ‘Xoossay tau ay mala dabboo?’ yaagada nena oycha.

Neeni metootaydda deˈiyaaba gidikko, Xoossay tau dabbo gidenna gaanau kajjeelana danddayaasa. SHin takki gaada qoppa. Xoossay nena anjjiisippe attin, ne bolli meto ehibeenna. “Ha sa7aa haariyaagee” Yihoowa gidennan, Seexaanaa gidiyoogaa kasetidi beˈida. (Yohaannisa 12:31) Yaatiyo gishshau, ha alamiyan gakkiya metuwaappenne naaquwaappe dariya baggau gaasoy Seexaanaa. Qassi nuuni nagarancha gidiyoogeenne qoppennan haniyaabay nuna gakkiya daro metuwau gaaso gidiyoogaa maayikkii?

SHin Xoossay oottidobay aybee? Geeshsha Maxaafay Xoossay ‘saluwaanne saˈaa medhidoogaa,’ i nu bollaakka ‘maalaalissiya oorattaba ootti medhidoogaa,’ qassi, Yihooway ‘ne shemppuwaa ba kushiyan oyqqidoogaakka’ yootees. (Mazamure 124:8; 139:14; Daaneela 5:23) Ha ubbabaa birshshettay aybee?

Hegee, nuuni paxa deˈanaadan oottidaagee Medhidaagaa gidiyoogaa bessees. (Oosuwaa 17:28) Qassi deˈoy, saˈaa bolli deˈiya loˈˈiyaabay, siiqiyoogaaninne laggetettan ufayttiyoogee, hegaadankka singgidi, siyidi, bochidinne malˈˈuwaa masuhuwaa shaakkidi ufayttiyoogee ubbay Xoossaa imota. (Yaaqooba 1:17) Ha anjjoti, Xoossay nuuni bonchananne an ammanettana koshshiyo dabbo gidiyoogaa bessokkonaa?

Neeni Xoossan ammanettanau metootana danddayaasa. Geella an ammanettanau Xoossaa loytta erabeennabadan qoppana danddayaasa. Hegaadan qoppiyoogee wottin deˈiyaaba. Issoti issoti Xoossay meqettaa iita gaanaadan oottida ubbabaa ha qantta huuphe yohotun qonccissana danddayettenna. SHin Xoossaa loytti eranau danddayettida ubbabaa oottiyoogee bessiyaaba gidennee? * Hegaadan oottiyoogan, neeni Xoossaa xeelliyaagan tumaa eranaagaa ammanettoos. Xoossay meqettaa iitee? Akkay gidenna; “Xoossai siiqo.”—1 Yohaannisa 4:8.