GEESHSHA MAXAAFAAPPE TOBBIYOOGAA
Nuna Metoy Gakkiyo Wode Xoossay Nuussi Qoppii?
Hagaappe kaallidi deˈiyaagee, issi Yihoowa Markkay issi uraara Geeshsha Maxaafaappe tobbiyoogaa bessiyaaba. Martto giyo Yihoowa Markkiyaa Saaro giyo maccaasee soo baasu giidi qoppoos.
I HAGEE HANANAADAN WAATIDI PAQQADII?
Martto: Taani hachi hagaa heeran deˈiya asau ha trakttiyaa immaydda deˈays. Huuphe yohoy Tumaa Eranau Koyay? yaagees. Hagee neessa.
Saaro: Hagee haymaanootebee?
Martto: Ee. Koyro sinttan deˈiya usuppun oyshata beˈa. Ha oyshatuppe augaa—
Saaro: Akkay gidana. Tanaara haasayaydda ne wodiyaa coo wurssoppa.
Martto: Neeni hegaadan giyoy aybissee?
Saaro: Taani Xoossay deˈiyoogaa siriyo gishshataassa.
Martto: Ne qofaa qottennan yootido gishshau galatays. Neeni beniisappekka hegaadan qoppay?
Saaro: Taani naatettan woosa keettaa bays. SHin haˈˈi biyoogaa aggoosappe takkaas.
Martto: Odishin, ta sunttay Martto.
Saaro: Taani Saaro.
Martto: Saaree, taani ammaniyoobaa neeni ammananaadan wolqqanttana koyikke. SHin issibaa erana koyays. Xoossay deˈiyoogaa neeni siranaadan oottidabay aybee?
Saaro: Ta aayyiyaa 17 layttappe kase kaamiyan deshettaasu.
Martto: Hegee azzanttiyaaba. A keehi qohettadee?
Saaro: Ee, a he wodeppe doommada qaaxxana danddayukku.
Martto: Nawuˈˈasho. Hegee nenakka qohidoogee qoncce.
Saaro: Ee. Taani ‘Xoossay deˈiyaaba gidikko, hagee hananaadan waati paqqadii? Hagaa mala metoy gakkanaadan Xoossay paqqadiyoy aybissee?’ gaada qoppiyoy hegaassa.
AYBISSI GIIDI OYCHIYOOGEE BALEE?
Martto: Neeni hegaadan qoppiyoogeenne oychiyoogee bala gidenna. Metoy nuna gakkiyo wode, aybissee giidi oychiyoogee wottin deˈiyaaba. Geeshsha Maxaafan etabay odettido issi issi ammanettida asatikka hegaa mala oyshaa oychidosona!
Saaro: Tumaa gay?
Martto: Ee. Issi leemisuwaa Geeshsha Maxaafaappe nena bessana.
Saaro: Ero.
Martto: Hananabaa yootiya ammanettida Imbbaaqoomi Xoossaa oychidobaa akeeka; hegee Imbbaaqooma shemppo 1, paydo 2nne 3n deˈees: “Abeet GODAU, neeni tana maaddanaadan taani xeesiyo wode, aude gakkanaashin siyennan ixxuutee? Qassi taani naaqettada neeyyo waassiyo wode, aude gakkanaashin ashshennan ixxuutee? Ha naaquwaa tana aissi bessai?” Ha oyshati ne oyshaara issi mala gidokkonaa?
Saaro: Issi mala.
Martto: Hegaadan oychido gishshau Xoossay Imbbaaqooma hanqqettibeenna; woy au ammanoy paccees gibeenna.
Saaro: Hegee garamiyaaba.
YIHOOWAY TUGGAA IXXEES
Martto: Xoossay nu metuwaa akeekiyoogaanne metoy gakkiyo wode, i nuussi qoppiyoogaa Geeshsha Maxaafay yootees.
Saaro: Hegee woygiyoogee?
Martto: Kessaabaa 3:7n deˈiya qofaa ane nena bessays. He xiqisiyaa neeni nabbabuutee?
Saaro: Ero. Hagaadan gees: “GODAI qassikka hagaadan yaagiis; ‘Taani Gibxxe biittan ta asai tuggatiyo tuggaa geeshsha be7ada, eti bantta kaabbotuppe waassiyo waasuwaa siyada, taani eta waayiyaa qoppaas.’”
Martto: Galatays. Ha xiqisiyaappe akeekiyoogaadan, ba asay tuggatiyo wode Xoossay hegaa beˈii?
Saaro: Ee, i beˈiyaaba milatees.
Martto: I hanettiiddi deˈiyaabaa coo beˈidi aggiigenna. He xiqisiyan kaallidi deˈiya qofaa zaarettada beˈa. Xoossay, “taani eta waayiyaa qoppaas” yaagiis. Hagee Xoossay asau qoppennaagaa bessiyaabee?
Saaro: CHii, gidenna.
Martto: Nuna metoy gakkiyo wode, i hegaa beˈiyoogaa xalla gidennan, nuussi qaretteesinne qoppees.
Saaro: Ee, tuma.
Martto: Hegaa nu wozanan wottidi, ba asay waayettido wode Xoossau aybi siyettidaakko yootiya hara leemisuwaa ane beˈoos. Hegee Isiyaasa 63:9n deˈees. He xiqisee, “Eta waayee ubban i waayettiis” yaagi doommees. Yaatin, Xoossay ba asay waayettiyo wode waayettees ga qoppay?
Saaro: Ee, xiqisee hegaadan gees.
Martto: Saaree, Xoossay nuussi keehi qoppees; qassi nuuni tuggatiyo wode beˈana koyenna. Nu waayettiyo wode ikka waayettees.
I DARO WODIYAA TAKKIDOY AYBISSEE?
Martto: Taani baanaappe kase, neeyyo issibaa yootana koyays.
Saaro: Ero, yoota.
Martto: Xoossaa wolqqaa xeelliyaagan Geeshsha Maxaafay yootiyoobaa akeeka. Taani qoppido xiqisee Ermmaasa 10:12. He xiqisiyaa neeni nabbabuutee?
Saaro: Ero. Hagaadan gees: “Ba wolqqan sa7aa medhdhidaagee, ba aadhdhida eran sa7aa essidaagee, ba akeekan salota miccidaagee a.”
Martto: Galatays. Ha xiqisiyaa qofay aybakko ane guuttaa qoppoos. Xoossay saluwaanne saˈaa, qassi a giddon deˈiyaabaa medhanau daro wolqqaa goˈettidoogaa maayikkii?
Saaro: Maayays.
Martto: Xoossau ubbabaa medhiyo wolqqay deˈiyaba gidikko, i nu metuwaa qaarana danddayees giyoogee bessiyaaba gidennee?
Saaro: Bessiyaaba.
Martto: Ane ne aayeebaa qoppa. Neeni i waayiyaa beˈiyo wode azzaniyoy aybissee?
Saaro: A ta aayyiyo; ta o siiqiyo gishshataassa.
Martto: O hachi pattanau neeyyo wolqqi deˈiyaaba gidiyaakko pattikkii?
Saaro: Hegee qoncce.
Martto: Hegee woygiyoogaakko qoppa. Xoossay nu metuwaa beˈiyoogaa, i nuussi qoppiyoogaanne au zawi baynna wolqqay deˈiyoogaa Geeshsha Maxaafay yootees. Yaatin, Xoossay nu metuwaa sohuwaara xayssanau kelttiyaa gelennaadan keehi danddayidoogaa akeekadii?
Saaro: Taani hagaadan mule qoppa erikke.
Martto: I nu metuwaa xayssanau hanno gakkanau kelttiyaa gelennan aggido gaasoy deˈiyaaba milatennee? a
Saaro: Deˈiyaaba milatees.
Martto: Hegaa xeelliyaagan Geeshsha Maxaafay yootiyoobaa hachi galla tobbana.
Saaro: Ero, saruwan gatto. b
Neeni akeekanau metootiyo Geeshsha Maxaafaa qofay deˈii? Yihoowa Markkatu haymaanootiyaa xeelliyaagan neeni eranau koyiyoobi deˈii? Deˈiyaaba gidikko, Yihoowa Markkatuppe issi ura oycha. I woy a hegaa neeyyo ufayssan yootana.
