Yihoowa Markkati Geeshsha Maxaafay tamaarissiyoobaa ammaniyo gishshawu polotikaaban oossinne exatokkona. Nuuni polotikaa asata denttettokko, dooruwaa wode doorokko, polotikan sunttettokko, woy kawotettaa laammanawu malokko. Nuuni hegaadan ammaniyoy Geeshsha Maxaafay ammanttiya gaasuwaa yootiyo gishshataassa.

•   Nuuni kawotettan sunttettanawu koyibeenna Yesuusa leemisuwaa kaalloos. (Yohaannisa 6:15) I ba erissiyo ashkkarati ‘saꞌaaba gidennaadan’ tamaarissiyoogan, eti ha alamiyaaban oossinne exatennan deꞌana bessiyoogaa qunxxissidi yootiis.—Yohaannisa 17:14, 16; 18:36; Marqqoosa 12:13-17.

•   Yesuusi, “Kawotettaa wonggeliyaa mishiraachchoi sa7a ubban odettana” giido wode yootido Xoossaa Kawotettawu nuuni ammanettoos. (Maatiyoosa 24:14) Nuuni Xoossaa Kawotettawu exatiyo gishshawu, he Kawotettay yaanaagaa markkattoos, qassi nuuni deꞌiyo biittaa gujjin ay biittaa polotikaa allaalliyankka gelokko.—2 Qoronttoosa 5:20; Efisoona 6:20.

•   Nuuni alamiyaaban oossinne exatennan deꞌiyo gishshawu, polotikaa kaafiya asa ubbawu Xoossaa Kawotettaabaa mishiraachchuwaa yayyennan yootana danddayoos. Nu haasayiyoobaaninne oottiyooban, Xoossaa Kawotettay ha alamiyaa metuwaa qaaranaagaa ammaniyoogaa bessoos.—Mazamure 56:11.

•   Nuuni polotikaa gaasuwan shaahettenna gishshawu, kumetta saꞌan ishanttudan issuwaa gidida. (Qolasiyaasa 3:14; 1 PHeexiroosa 2:17) SHin polotikaaban kelttiyaa geliya haymaanooteti bantta haymaanootiyaa kaalliyaageeti shaahettanaadan oottoosona.—1 Qoronttoosa 1:10.

 Kawotettata bonchchoos. Nuuni polotikaaban oossinne exatennaba gidikkonne, nu deꞌiyo biittaa kawotettaa sunttata bonchchoos. Nu hegaadan oottiyoy Geeshsha Maxaafay hagaadan azaziyo gishshaassa: “Asai ubbai deriyaa heemmiyaageetuyyo haarettanau bessees.” (Roome 13:1) Nuuni higgiyawu azazettoos, qaraxaa qanxxoos, qassi kawotettay ba biittaa asaa maaddanawu oottiyoobaa kaafoos. Nuuni kawotettaa eqettiyoogaappe, Geeshsha Maxaafay “sunttatettai de7iyo ubbatuyyo” woossanaadan yootiyo zoriyaa kaalloos; ubba, nu goynuwaa laꞌatettaara gayttidaagan eti kuuyiyo wode hegaadan oottoos.—1 Ximootiyoosa 2:1, 2.

 Qassi, harati polotikaara gayttidaagan kuuyiyo maataa bonchchoos. Leemisuwawu, nuuni dooruwaa wode cabbuwaa denttokko woy dooranawu koyiyaageetuban kelttiyaa gelokko.

 Nuuni oossinne exatennaagee ha wodiyan doommidabee? CHii. Kiitettidaageetinne koyro xeetu layttan deꞌida hara Kiristtaaneti kawotettaa sunttatuura gayttidaagan nuugaara issi malabaa oottidosona. Biyond Gud Intenshins giyo maxaafay hagaadan gees: “Beni Kiristtaaneti kawotettaa sunttata bonchchana bessiyoogaa maayettikkonne, polotikaa allaalletun gelana koyibookkona.” Hegaadankka, On ze Rod tu Sivilayzeshin giyo maxaafay beni Kiristtaaneti “kawotettan sunttettanawu koyibeennaagaa” yootiis.

 Nuuni polotikaaban oossinne exatennaagee deretettan woppay deꞌennaadan oottii? CHii. Nuuni sarotettaa dosiyaageeta gidiyo gishshawu, kawotettati nuussi yayyiyo ayba gaasoynne baawa. Yukireene Biittaa Saynisiyaa Dichchaa giyo dirijjitee 2001 kessido irpporttiyan yootidobaa akeeka. Nuuni polotikaaban oossinne exatennaagaa xeelliyaagan he dirijjitee hagaadan giis: “Ha wodiyan, Yihoowa Markkati oossinne exatennaagaa amaridaageeti ixxana danddayoosona; meqetti baynna Naaze haaroynne Koministte haaroy eta mootido waanna gaasoy hegaa.” Sooviyeete huqqunnidi haariyo wodekka Yihoowa Markkati “higgiyawu azazettidi deꞌidosona. Eti kawotettaa goshshaaninne paabirkkatun ammanettidinne bantta goꞌꞌaa aggi bayidi oottidosona, qassi kominstte haaruwaa qohiya aybanne oottibookkona.” He irpporttee wurssettan yootidoogaadan, Yihoowa Markkati ammaniyoobaynne oottiyoobay “ay biittaa kawotettankka woppaynne issippetettay xayanaadan oottenna.”